މިއަހަރުގެ އޭއެފްސީ ކަޕްގެ ޕްރިލިމިނަރީ ބުރުގައި ބަންގްލަދޭޝްގެ ޑާކާ އަބަހާނީއާއި ދެކޮޅަށް ކުޅޭ މެޗަށް މާޒިޔާ ބަންގްލަދޭޝްއަށް ފުރައިފިއެވެ.
ބަންގްލަދޭޝްގައި ކުޅޭ މި މެޗުގެ ފުރަތަމަ ލެގު ކުޅޭނީ މިމަހުގެ 5 ވަނަ ދުވަހު ޑާކާގައެވެ. އަދި ދެވަނަ ލެގުގެ މެޗު މިމަހު 12 ވަނަ ދުވަހު ކުޅޭނީ ރާއްޖޭގައެވެ. އޭއެފްސީ ކަޕުގައި މާޒިޔާއަށް އިތުރަށް ކުރިޔަށް ދެވެން އޮތީ މި މެޗު ކާމިޔާބުކޮށްގެންނެވެ. މި މެޗު ކާމިޔާބުކޮށްފިނަމަ ފުރުސަތު ބޮޑީ އިންޑިއާގެ ގަދަބާރު ބެންގަލޫރު އެފްސީއާ ޕްލޭއޮފް ބުރުގައި ވާދަކުރަން ޖެހުމެވެ.
ޕްރިލިމިނަރީ ބުރުގައި ޑާކާ އަބަހާނީއާއި ވާދަކުރުމަށް ބަންގްލަދޭޝްއަށް ފުރުމުގެ ކުރިން ޗަމްޕާ ސެންޓްރަލް ހޮޓެލްގައި ރޭ ވަނީ ޚާއްސަ ޑިނަރ ނައިޓެއްވެސް ބާއްވާފައެވެ. މި ޑިނަރ ނައިޓްގައި މިނިސްޓަރ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙްމަދު މަހުލޫފްވެސް ވަނީ ބައިވެރިވަޑައިގެންފައެވެ.
ބަންގްލަދޭޝްގެ ޑާކާ އަބަހާނީއާއި ދެކޮޅަށް ކުޅޭ މެޗަށް މާޒިޔާވެފައިވާ ތައްޔާރީތަކާއި ގުޅޭގޮތުން ވާހަކަ ދައްކަމުން މާޒިޔާގެ ކޯޗު މަރުޖާން ސެކުލޮސްކީ ބުނީ މިމެޗަށް ތައްޔާރުވާން މާ ގިނަ ވަގުތެއް ނުލިބޭކަމަށެވެ. އެގޮތުން މާލޭގައި 3 ދުވަހު ފަރިތަކުރުންތައް ކުރިޔަށްގެންދިޔުމަށްފަހު ބަންގްލަދޭޝްއަށްގޮސް އެ ޤައުމުގައި މެޗުގެ ކުރިން 2 ދުވަހު ފަރިތަކުރުންތައް ކުރިޔަށް ގެންދަން ވަގުތު ލިބޭނެކަމަށެވެ. ނަމަވެސް ލީގުގައި މި ފަހުން ރަނގަޅު މެޗުތަކެއް ކުޅުމުން ކުޅުންތެރިން ތިބީ ވަރަށް ފިޓްކޮށްކަމަށް ސެކުލޮސްކީ ބުންޏެވެ.
ސެކުލޮސްކީ ބުނީ ކުޅުންތެރިންނަށް އޭނާ އިތުބާރުކުރާ ކަމަށާއި، މާޒިޔާއަކީ ޑާކާ އަބަހާނީ ބަލިކުރެވޭ ފެންވަރުގެ ޓީމެއްކަމަށެވެ. އަދި ޕްރިލިމިނަރީ ބުރުގައި ބަންގްލަދޭޝްގައާއި ރާއްޖޭގައި ކުޅޭ މެޗުވެސް ވަރަށް މުހިއްމުކަމަށް ސެކުލޮސްކީ ބުންޏެވެ.
މާޒިޔާގެ ކެޕްޓަން އަސަދުﷲ ޢަބްދުﷲ ބުނީ މާޒިޔާގައި މިވަގުތު ތިބި ކުޅުންތެރިންނަކީ ރާއްޖޭގައި ތިބި އެންމެ މޮޅެތި ކުޅުންތެރިންކަމަށާއި، މި ކުޅުންތެރިންނާއެކު ރަނގަޅު ނަތީޖާއެއް ނެރެވޭކަމުގެ އުއްމީދު ވަރަށް ބޮޑުކަމަށެވެ.