"ސްޓްރެޓެޖައިޒިން އިސްލާމިކް ފައިނޭންސް އިން ދަ މޯލްޑިވްސް" ނަމުގައި އިސްލާމިކް ފައިނޭންސް ސިމްޕޯސިއަމްއެއް ބާއްވައިފިއެވެ.
މި ސިމްޕޯސިއަމްއަކީ މޯލްޑިވްސް ސެންޓަރ ފޮރ އިސްލާމިކް ފައިނޭންސް، އެމް.ސީ.އައި.އެފުން އިސްނަގައިގެން، ދިވެހި ރާއްޖޭގައި އިސްލާމިކް ފައިނޭންސް އިތުރަށް ހަރުދަނާކުރުމަށް އެކުލަވާލާފައިވާ ސްޓްރިއަރިންގ ކޮމިޓީގެ ފަރާތުން ރާއްޖޭގައި ފުރަތަމަ ފަހަރަށް ބޭއްވި އިސްލާމިކް ފައިނޭންސް ސިމްޕޯޒިއަމްއެވެ.
އެއް ދުވަހުގެ މުއްދަތަކަށް ކުރިއަށްދިޔަ މި ސިމްޕޯޒިއަމްގައި، އިސްލާމިކް ފައިނޭންސާ ގުޅުން ހުރި ދައުލަތުގެ އެންމެހާ މުއައްސަސާތަކާއި، ކުންފުނިތައް އަދި އިސްލާމިކް ބޭންކުތަކާއި، ތަކާފުލް އޮޕަރޭޓާސް ބައިވެރިވިއެވެ. މި ސިމްޕޯޒިއަމްގެ މައިގަނޑު މަޤްޞަދަކީ، ސަރުކާރުގެ މެނިފެސްޓޯގެ އެއް އަމާޒުކަމަށްވާ، ދިވެހިރާއްޖޭގައި އިސްލާމިކް ފައިނޭންސްގެ ނިޒާމު ފުޅާކޮށް، ތަރައްޤީކޮށް، ބައިނަލްއަޤްވާމީ ގޮތުން ފާހަގަކޮށްލެވޭ ފަދަ އިސްލާމިކް ފައިނޭންސް ގެ މަރުކަޒަކަށް ރާއްޖެ ހެދުމަށްޓަކައި ވާންޖެހޭ އެންމެހައި ތައްޔާރީތައް ވުމަށް ބޭނުންވާ ލަފަޔާއި މަޝްވަރާ ހޯދުމެވެ. އަދި އިސްލާމިކް ފައިނޭންސްގެ ދާއިރަގައި ދިވެހިރާއްޖެއަކީ މި ސަރަހައްދުގެ މައި މަރުކަޒަކަށް ހެދުމަށްޓަކައި، ދައުލަތުގެ ފަރާތުން ކުރަން ކަނޑައަޅާ ކަންތައް ފާހަގަކޮށް ތައްޔާރުކުރާ "އިސްލާމިކް ފައިނޭންސް މާސްޓަރ ޕްލޭން" ތައްޔާރުކުރުމަކީވެސް ސިމްޕޯސިއަމްގެ މަޤްޞަދެކެވެ.
މޯލްޑިވްސް މަނިޓަރީ އޮތޯރިޓީގެ ކޮންފަރެންސް ހޯލުގައި ބޭއްވުނު މި ސިމްޕޯޒިއަމް ފަށްޓަވައިދެއްވުމުގެ ގޮތުން ޝަރަފްވެރި މެހެމާން މިނިސްޓަރ އޮފް ސްޓޭޓް ފޮރ ފިނޭންސް އަލްފާޟިލް އިސްމާޢީލް ޢަލިމަނިކު ދެއްކެވި ވާހަކަފުޅުގައި، އިސްލާމިކް ފައިނޭންސް ގައި "ފިންޓެކް" ގެ މުހިންމު ކަމުގެ މައްޗަށް އަލިއަޅުވާލެއްވިއެވެ. އަދި އިސްލާމިކް ފައިނޭންސް އިންޑަސްޓްރީގައި ފިންޓެކް ފުޅާދާއިރާއެއްގައި ބޭނުންކުރުމަކީ މުހިއްމު ކަމެއް ކަމަށާއި، "ފިންޓެކް"ގެ އެންމެހައި އަސާސްތައް ދިވެހިރާއްޖޭގައި ފުޅާ ދާއިރާއެއްގައި ބޭނުންކުރުމަށް ގޮވާލެއްވިއެވެ. މީގެ އިތުރުން، ދައުލަތުން ދޫކުރާ ސެކިއުރިޓީސްގެ ތެރޭގައި އިސްލާމިކް ފައިނޭންސްގެ އަސާސްތަކާއި އެއްގޮތަށް ދޫކުރެވޭ ސެކިއުރިޓީސް އިތުރުކުރުމުގެ މުހިންމު ކަމުގެ މައްޗަށް ބާރުއަޅުއްވައި ވާހަކަފުޅުދެއްކެވިއެވެ.
މި ސިމްޕޯޒިއަމްގައި، އެމް.ސީ.އައި.އެފް އާއި ކެޕިޓަލް މާރކެޓް ޑިވެލޮޕްމަންޓް އޮތޯރިޓީ (ސީ.އެމް.ޑީ.އޭ) އަދި މޯލްޑިވްސް މަނިޓަރީ އޮތޯރިޓީ (އެމް.އެމް.އޭ) އިން ތަފާތު 3 ޕްރެޒެންޓޭޝަނެއް ހުށަހަޅުއްވާދެއްވާފައިވާއިރު، ކަމާބެހޭ އިދާރާތައް ހިމެނޭގޮތަށް ކުރިއަށްގެންދެވުނު ޕެނަލް ޑިސްކަޝަނެއްވެސް ކުރިއަށް ގެންދަވާފައިވެއެވެ. ޕެނަލް ޑިސްކަޝަންގައި، މިނިސްޓްރީ އޮފް ފިނޭންސް، އެމް.އެމް.އޭ، މިނިސްޓްރީ އޮފް އިކޮނޮމިކް ޑިވެލޮޕްމަންޓް، ސީ.އެމް.ޑީ.އޭގެ އިތުރުން އެމް.ސީ.އައި.އެފްގެ ކަމާބެހޭ ބޭފުޅުން ބައިވެރިވެވަޑައިގަތެވެ.
މި ސިމްޕޯޒިއަމްގައި ހުށަހެޅުނު ކަންކަމަށް ރިޢާޔަތްކޮށް ޕޮލިސީ ޕޭޕަރެއް އެކުލަވާލުމުގެ މަސައްކަތް ކުރިއަށް ގެންދިއުމަށް ހަމަޖެހިފައިވާކަމަށް މި މަސައްކަތް ކުރުމަށް އެކުލަވާލާފައިވާ ސްޓިއަރިންގ ކޮމިޓީން މަޢުލޫމާތުދެއެވެ.