އެކި ބޭނުންފުޅުތަކަށް ރައީސުލްޖުމްހޫރިއްޔާ ބޭނުންފުޅުކުރަމުން އަންނަ މާލެ އަތޮޅު އާރަށް، ކޮރޯނާވައިރަހަށް ކަރަންޓީނުކުރާ ފެސިލިޓީއެއްގެ ގޮތުގައި ކަނޑައަޅައިފިއެވެ.
ކޮރޯނާވައިރަހުން ރައްކާތެތިވުމަށް ސަރުކާރު އަޅުއްވަމުންދާ ފިޔަވަޅުތަކާބެހޭ އެންމެ ފަހުގެ މަޢުލޫމާތު ޙިއްސާކުރައްވަމުން ޓްއަރިޒަމް މިނިސްޓަރ ޢަލީ ވަޙީދު ވީދާޅުވީ އާރަށް ކަރަންޓީނު ފެސިލިޓީއެއްގެ ގޮތުގައި ބޭނުންކުރެއްވުމަށް ހުށަހެޅުއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްކަމަށެވެ. އަދި އެރަށް މިހާރުވަނީ އެކަމަށް ތައްޔަރުކޮށްފައިވާކަމަށެވެ.
"އެހެންވީމަ އާރަށް އެހުރީ ފްލީ ތައްޔާރަށް. ކޮރޯނާވައިރަހާ ގުޅިގެން ރައްޔިތުން ވިޔަސް އަދި މިކަމުގަ ފަތުރުވރިއަކުވިޔަސް ކަރަންޓީން ކުރަންޖެހިއްޖެނަމަ އެ އޮޕްޝަން ރައީސުލްޖުމްހޫރިއްޔާ އެވަނީ ޓަސްކްފޯސްއަށް ދެއްވާފައި. އެހެންވީމަ ޓަސްކްފޯހުން މެޑިކަލީ ބަލަންޖެހޭ ބެލުންތައް ބެލުމަށްފަހު ކަރަންޓިން ފެސިލިޓީއަށް ގެންދާނެ ގޮތްތައް ނިންމާނެ. އަޅުގަނޑުމެން ރައްޔިތުންގެ ކަންބޮޑުވުންތަކަށް ބަލާނަން." މިނިސްޓަރ ޢަލީ ވަޙީދު ވިދާޅުވިއެވެ.
މިނިސްޓަރ ވިދާޅުވީ އާރަށުގެ އިތުރުން ފަރުކޮޅުފުށީގައި އިތުރު ފެސިލިޓީތައް ޤާއިމްކުރުމުގެ މަސައްކަތްކުރަމުން އަންނަކަަމަށާ، މިރެޔާއި ހަމައަށް ރޫމްތައް ނިމޭނެކަމަށެވެ. އަދި އައުޓް ބްރޭކަަކަށް ހިނގައްޖެ ހިނދެއްގައި އެކަންކުރުމަށްވެސް ވަކި ރަށެއް ކަނޑައެޅުމުގެ މަސައްކަތްކުރަމުން އަންނަކަމަށާއި، ދުނިޔޭގައި ކޮރޯނާ ވައިރަސް ފެތުރޭ ބާރުމިނަށް ބަލާފައި ރާއްޖެއިން ތައްޔާރުވާންޖެހޭ ހުރިހާ ހާލަތަކަށް ތައްޔާރުވެފައިވާކަމުގެ ޔަޤީންކަން މިނިސްޓަރ ދެއްވިއެވެ.
މިނިސްޓަރގެ ވާހަކަފުޅުގައި މިދިޔަ ޖެނުއަރީ 31 އިން ފެށިގެން އިތުރު ތާމަލް ކެމެރާތައް ރާއްޖެ ގެނެސްފައިވާކަމަށާ، ރާއްޖެއަށް މީހުން އެތެރެވާ ކޮންމެ ދޮރާއްޓަކުން އެތެރެވާ ކޮންމެ މީހެއް ތާމަލް ކެމެރާއިން ސްކްރީން ކުރެވޭނެކަމަށެވެ. އަދި 4 ފެބުރުއަރީގައި މިދާއިރާގެ މާހިރުންނާއި އިތުރު ކެމެރާ ސެޓަޕްތައްވެސް ގެންނާނެކަމަށް ވިދާޅުވިއެވެ. އެއީ އެމެރިކާއާއި ޔޫކޭ ފަދަ ޤައުމުތަކުގައި މިހާރުވެސް ބޭނުންކުރާ ފަދަ ސެޓަޕްތަކެއްކަން ފާހަގަކުރައްވާ މިނިސްޓަރ ވިދާޅުވީ، ސަރުކާރުގެ ވިސްނުމަކީ ރާއްޖެ އެތެރެވާ މީހުން މީހަރަށްވުރެ ހަރުދަނާކަމާއެކު ބެލުންކަމަށެވެ.