ކޮރޮނާވައިރަސް ފެތުރުން ހުއްޓުވުމަށް އެއްގަމުން ޗައިނާއާ ގުޅިފައިވާ ސަރަޙައްދީ ރޮނގު ބަންދުކުރުމަށް ހޮންގްކޮންގްގެ ސިއްޙަތާބެހޭ އިއްތިޙާދުން އެދުނު އެދުމަށް އިޖާބަދިނުމަށް ހޮންގްކޮންގްގެ ޗީފު އެގްޒަކަޓިވް ކެރީ ލާމް ދެކޮޅުހައްދަވައިފިއެވެ.
ހޮންގްކޮންގްގެ ހޮސްޕިޓަލްތަކުގެ މުވައްޒަފުން ގުޅިގެން ދާދިފަހުން އުފެއްދި އިއްތިޙާދުން ބުނެފައިވަނީ ޗައިނާއާ ގުޅިފައިވާ ސަރަޙައްދީ ރޮނގު ބަންދު ނުކޮށްފިނަމަ އެއިއްތިޙާދަށް ނިސްބަތްވާ 6،500 މުވައްޒަފުން މަސައްކަތް ހުއްޓާލައި ހަޅުތާލުކުރާނެކަމަށެވެ. ނަމަވެސް ލާމްވަނީ ސަރަޙައްދީ ރޮނގު ބަންދުކުރުމަށް ދެކޮޅުހައްދަވާ ހަޅުތާލުނުކުރުމަށް މުވައްޒަފުންގެ އިއްތިހާދަށް އިލްތިމާސް ކުރައްވާފައެވެ.
ކޮރޯނާވައިރަސް ފެތުރެމުންދާތީ ދުނިޔޭގެ ސިއްޙަތު ޖަމްޢިއްޔާ ޑަބްލިއުއެޗްއޯއިންވަނީ ދުނިޔޭގައި ސިއްޙީ ނުރައްކަލުގެ ކުއްލި ޙާލަތު އިއްލާނުކޮށްފައެވެ. ކުއްލި ނުރައްކަލާއެކުވެސް ޒަރޫރީ ޙާލަތެއްގައި މެނުވީ ވިޔަފާރިއާއި ދަތުފަތުރުގެ ކަންކަން ހުއްޓުވަން މަސައްކަތް ނުކުރުމަށް އެޖަމްޢިއްޔާއިން އެދިފައިވެއެވެ. ކޮރޯނާވައިރަސް ފެތުރުން ހުއްޓުވުމަށް ހޮންގްކޮންގުން އިޖުރާއާތުތަކެއްވަނީ އިޢުލާންކޮށްފައެވެ.
ކެރީ ލާމްވަނީ ސިއްޙަތާބެހޭ މަސްއޫލުވެރިން އަމިއްލައަށް ފިޔަވަޅުތައް ނޭޅުމަށް އެދިވަޑައިގެންފައެވެ. ލާމް ވިދާޅުވީ މިދިޔަ ޖަނަވަރީ މަހުގެ ތިރީސްވަނަ ދުވަހު ސަރަޙައްދީ ރޮނގު ހުރަސްކޮށް ހޮންގްކޮންގްގެ 37،000 މީހުން ޗައިނާއަށް ދަތުރުކޮށްފައިވާކަމަށެވެ. އެދުވަހު ޗައިނާއިން އެއްގަމު މަގުން އެނބުރި ހޮންގްކޮންގަށް އައީ އެންމެ %9.7 މީހުންކަމަށެވެ. މިއީ އެއްގަމު މަގުން އަންނަ މީހުންގެ ޢަދަދު މަދުކަން އަންގައިދޭކަމެއްކަމަށާއި އެއްގަމު މަގުން ހޮންގްކޮންގްއާ ގުޅިފައިވާ ޗައިނާގެ ގިނަ ސިޓީތައްވަނީ ބަންދުކޮށްފައިކަމަށްވެސް ލާމް ވިދާޅުވިއެވެ.