އޮސްޓްރޭލިއާގެ ޖަންގަލިތަކުގައި ރޯވި ބިޔަ އަލިފާންގަނޑުތައް ނިއްވާލުވުމުގައި ބައިވެރިވި އަލިފާން ނިވާ މީހުންނަށް އެހީވުމަށް 338 ފޫޓުގެ ފިއްޒާއެއް އަލައިފިއެވެ.
އޮސްޓްރޭލިއާގެ އެކި ހިސާބުތަކުގައި ރޯވި ބިޔަ އަލިފާންގަނޑުތައް ނިއްވާލެވުނީ ތިން މަސްދުވަސްފަހުންނެވެ. މިހާތަނަށް އޮސްޓްރޭލިއާގައި ރޯވި އެންމެ ނުރައްކާތެރި އަލިފާންގަނޑުތަކުގައި އެތައް މިލިއަން ހެކްޓަރެއްގެ ބިން އަނދާ، އެތައް ސަތޭކަ ގެއެއް އަނދާ، މިލިއަނެއްހާ ޖަނަވާރުވަނީ މަރުވެފައެވެ. މިދިޔަ އަހަރުގެ ސެޕްޓެންބަރު މަހުން ފެށިގެން އަނދަމުންދިޔަ އަލިފާންގަނޑުތައް ނިއްވުމުގައި އޮސްޓްރޭލިއާގެ އެކި ސްޓޭޓުތަކުގައި މަސައްކަތްކުރާ އަލިފާން ނިވާ މީހުންގެ އިތުރުން ހިލޭ ސާބަހަށް އެތައް ބަޔަކު މަސައްކަތްކޮށްފައިވެއެވެ. ނަމަވެސް ފުރާނަ އަތް މައްޗަށް ލައިގެން ބޮޑުބިޔަ އަލިފާންގަނޑުތަކާ ހަނގުރާމަކުރި 90 އިންސައްތަ މީހުންނަށް އެއްވެސް އުޖޫރައެއް ނުލިބެއެވެ.
އެމީހުންގެ ހިތްވަރުގެ އަގުވަޒަންކޮށް، އެމީހުންނަށް އެހީވުމަށް ފައިސާ ހޯދުމުގެ ގޮތުން އޮސްޓްރޭލިއާގައި ހިންގާ އިޓަލީވިލާތުގެ ރެސްޓޯރަންޓަކުންވަނީ 338 ފޫޓުގެ ފިއްޒާއެއް އަޅާފައެވެ. ގިނަ ބައެއްގެ ބުރަ މަސައްކަތުން އެފިއްޒާ ތައްޔާރުކުރެވުނީ 4 ގަޑިއިރުންނެވެ. އެގޮތުން، އެޕިއްޒާ އެޅުމަށް އެއް މީޓަރުގެ ފުއްގަނޑުތަކެއް ގުޅާލާ، އޭގެ މައްޗަށް ޓޮމޯޓާ ސޯސްއާއި މޮޒެރެއްލާ ޗީސް އެޅުމުގެ އިތުރުން ސީޒަންކޮށްފައިވާ ބެސިލް ފަތާއި އޮރެގަނޯއާއި އޮލިވް އޮއިލް ބޭނުންކުރިއެވެ. އެޕިއްޒާ ފިހުނީ ކޮންވޭޔަރ އަވަނެއްގައި ބައިބަޔަށެވެ. ޕިއްޒާ ފިހެވުމުން ފަޅާފައިވަނީ 4،000 ފޮއްޗެވެ. ޕިއްޒާ ފޮތިތައް ވިއްކައިގެން ލިބުނު ހުރިހާ ފައިސާއެއް ހަދިޔާކޮށްފައިވަނީ ނިއު ސައުތު ވޭލްސް ރޫރަލް ފަޔަރ ސަރވިސަށެވެ.
ޕިއްޒާ ޢާންމުންނަށް ދައްކާލުމުން އެއާއި ގުޅޭ ފޮޓޯތަކާއި ވީޑިއޯތައް މިހާރުވަނީ ވައިރެލްވެފައެވެ. ޕިއްޒާ އެޅި ރެސްޓޯރަންޓުން މިހާރުވަނީ އެޕިއްޒާ އެޅުމަށް ބޭނުންކުރި ފުށުގެ ޢަދަދު ދިމާކުރުމަށް މުބާރާތެއްވެސް ހުޅުވާލާފައެވެ.
ދުނިޔޭގައި މިހާތަނަށް ފިހުނު އެންމެ ދިގު ޕިއްޒާގައި ހުރީ 6،330.30 ފޫޓެވެ.