ލީގުގެ ތިންވަނަ ބުރުގެ ފުރަތަމަ މެޗުގައި އީގަލްސް އަތުން ޓީސީ އަށް ލިބުނީ ހައްގު މޮޅެއްކަމަށް ކްލަބް އީގަލްސްގެ ކޯޗު މުހައްމަދު ޝިޔާޒް (މޯހަން) ބުނެފިއެވެ.
ޕްރިމިއަރ ލީގުގެ ތިންވަނަ ބުރުގައި ޓީސީ އާއި އީގަލްސް ކުޅުނު ފުރަތަމަ މެޗު ޓީސީއިން ކާމިޔާބުކުރީ 0-1 ގެ ނަތީޖާއަކުންނެވެ. މެޗުގައި ޓީސީގެ ހަމައެކަނި ލަނޑު ދެވަނަ ހާފުގައި އެޓީމަށް ކާމިޔާބުކޮށްދިނީ އިސްމާއިލް އީސައެވެ. މި މެޗުގެ ކުރިން ލީގުގެ ދެވަނަ ބުރުގެ ފަހު މެޗުގައި އީގަލްސްއާއި ޓީސީ ބައްދަލުކުރި މެޗު ކާމިޔާބުކުރީ އީގަލްސްއިންނެވެ.
މެޗަށްފަހު ނޫސްވެރިންނާއި ވާހަކަ ދައްކަމުން ކްލަބް އީގަލްސްގެ ކޯޗު މުހައްމަދު ޝީޔާޒް (މޯހަން) ބުނީ، މިހާރު ކަންތައްތައް މިދިޔަ ގޮތުން ދެ ވަނަ މަގާމުގައި ލީގު ނިންމަން ބޭނުންނަމަ އީގަލްސް އަށް ހަމަޖެހިލެވެން ނެތް ކަމަށެވެ. އަދި ދެ ވަނަ އަށް ޓާގެޓްކޮށްގެން މަސައްކަތްކުރާއިރު ދެން ހުރި މެޗުތަކުން މޮޅުވުން ނޫން ގޮތެއް ނެތްކަން މޯހަން ފާހަގަކުރިއެވެ. މޯހަން ބުނީ ކުރި އީގަލްސްއިން ނަގާފައި އޮތް 5 ޕޮއިންޓްގެ ލީޑު މި މެޗުން ބަލިވުމާއެކު 2 ޕޮއިންޓަށް ހަނިވެފައިވާކަމަށާއި، އުއްމީދަކީ ކުރިޔަށް ހުރި މެޗުތަކުގައި ރަނގަޅު ކުޅުމެއް ދައްކައި އެ މެޗުތައް ކާމިޔާބުކުރުން ކަމަށް މޯހަން ބުންޏެވެ.
މެޗަށްފަހު ވާހަކަ ދައްކަމުން ޓީސީ ސްޕޯޓްސް ކްލަބުގެ ކޯޗު މުހައްމަދު ޝާޒްލީ ބުނީ، މި މެޗުގެ ކުރިން އެންމެ ފަހުން ކުޅުނު މެޗުގައި އީގަލްސްއިން ޓީސީ ބަލިކޮށްފައި އޮތުމުން މި މެޗުގައި ޓޭގެޓަކަށްވީ އީގަލްސް އަތުން 3 ޕޮއިންޓް ހޯދުންކަމަށެވެ. ޝާޒްލީ ބުނީ މިދިޔަ މަހުގެ 12 އިން ފެށިގެން 4 ދުވަހުން 1 ދުވަހު ޓީސީ އަންނަނީ މެޗު ކުޅެމެން ކަމަށާއި، ކުރިޔަށް ހުރި މެޗުތައް ހުރީވެސް އެހެންކަމަށެވެ.