އީރާނާ ދެކޮޅަށް އަޅުއްވާނެ ފިޔަވަޅުތައް ބައްލަވަމުންދާކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ޢިރާޤުގައި ހުންނަ އެމެރިކާގެ ދެއަސްކަރީ މަރުކަޒަކަށް އީރާނުން ދިން ޙަމަލާތަކަށްފަހު، ފުރަތަމަ ފަހަރަށް ދުނިޔެއާ މުޚާތަބުކުރައްވާ ވާހަކަދައްކަވަމުން އެމެރިކާގެ ރައީސް ވިދާޅުވީ އީރާނުން ދިން ޙަމަލާތަކަށްފަހު، ކުރިއަށް ދެން އަޅުއްވާނެ ފިޔަވަޅުތަކާމެދު ވިސްނަވަމުންދާކަމަށެވެ. އަދި އީރާނާ ދެކޮޅަށް އެމެރިކާއިން އަޅާފައިވާ ފިޔަވަޅުތަކަށްވުރެ ވަރުގަދަ ފިޔަވަޅުތަކެއް އަޅާނެކަމުގެ އިންޒާރު ޓްރަމްޕްވަނީ ދެއްވާފައިއެވެ. ނަމަވެސް، މީގެ ކުރިން އޭނާވަނީ އީރާނާ ދެކޮޅަށް އެމެރިކާއިން އަޅާފައިވަނީ އެޅެން އޮތް އެންމެ ވަރުގަދަ ފިޔަވަޅުތައްކަމަށް ވިދާޅުވެފައެވެ.
މީގެ ކުރިން ހަރުކަށިކަމާއެކު މައްސަލަތަކާއި ކުރިމަތިލައްވާ އެމެރިކާގެ ރައީސް ޓްރަމްޕް ވިދާޅުވީ އީރާނުން ދިން މިސައިލް ޙަމަލާތަކުގައި އެމެރިކާގެ އެއްވެސް މީހަކަށް ގެއްލުމެއް ނުލިބޭކަމަށެވެ، ނަމަވެސް، ޙަމަލާތަކުގެ ރައްދުގައި އެމެރިކާއިން އަޅާނެ އެއްވެސް އަސްކަރީ ފިޔަވަޅެއްގެ ވާހަކަ ޓްރަމްޕް ވިދާޅެއް ނުވެއެވެ. އޭނާ މީގެ ކުރިން ވިދާޅުވީ އެމެރިކާގެ އެއްވެސް މީހަކަށް ނުވަތަ ތަނަކަށް ޙަމަލާއެއް ދީފިނަމަ، ރައްދުގައި އެމެރިކާއިން ހީވެސްނުކުރާވަރުގެ ޙަމަލާތަކެއް އީރާނަށް ދޭނެކަމަށެވެ. އަދި ޙަމަލާ ދޭނެ 52 ތަނެއް ފާހަގަކުރައްވާފައިވާކަމަށާއި އޭގެ ތެރޭގައި އީރާނުގެ ތާރީޚީ އަދި ސަޤާފީ ތަންތަން ހިމެނޭކަމަށެވެ.
އެމެރިކާގެ އާރާބާރު ދުނިޔެއަށް ދެއްކެވުމުގެ ގޮތުން ޓްރަމްޕް ވިދާޅުވީ އެމެރިކާއަކީ މިހާރު ދުނިޔޭގެ އެންމެ ގިނައިން ތެޔޮ އުފައްދާ ޤައުމުކަމަށާއި މެދުއިރުމަތީގެ ތެލަށް ބަރޯސާނުވެ އެޤައުމަށް މިހާރު އުޅެވޭނެކަމަށެވެ. އަދި އޭނާގެ ވެރިކަމުގައި އެޤައުމުގެ އަސްކަރިއްޔާ އިތުރަށް ވަރުގަދަކުރައްވާ ޒަމާނީ ކުރައްވާފައިވާކަމަށެވެ. އެގޮތުން، ފާއިތުވި 3 އަހަރު ދުވަހުގެ ތެރޭގައި 2.5 ޓްރިލިއަން އެމެރިކާ ޑޮލަރު އަސްކަރިއްޔާއަށް ޚަރަދުކުރައްވާފައިވާކަމަށް އޭނާ ވިދާޅުވިއެވެ. ޓްރަމްޕް ވިދާޅުވީ އެމެރިކާގައިވެސް މިސައިލް އެބަހުރިކަމަށާއި ކުރިއަށްވުރެ ބޮޑު އަދި މޮޅެތި މިސައިލް މިހާރު އެބަހުރިކަމަށެވެ.
އިނގިރޭސިވިލާތް، ފަރަންސޭސިވިލާތް، ޖަރުމަންވިލާތް، ރަޝީއާ އަދި ޗައިނާއިން އީރާނާއެކު އެކުލަވާލާފައިވާ ނިއުކްލިއަރ އެއްބަސްވުމުން ވަކިވާންޖެހޭކަމަށްވެސް ޓްރަމްޕް ވިދާޅުވިއެވެ. އަދި މިހާރު އޮތް އެއްބަސްވުމަށްވުރެ ހަރުދަނާ އެއްބަސްވުމެއް އެކުލަވާލަން ޖެހޭކަމަށް ޓްރަމްޕް ވިދާޅުވިއެވެ. މީގެ އިތުރުން، ވިލާތުގެ އަސްކަރީ އިއްތިޙާދު ނޭޓޯއިން މިހާރަށްވުރެ ފުޅާ ދާއިރާއެއްގައި މެދުއިރުމަތީގައި ޙަރަކާތްތެރިވާންޖެހޭކަމަށްވެސް އެމެރިކާގެ ރައީސް ވިދާޅުވިއެވެ. ނަމަވެސް، މިއީ ނޭޓޯގައި ހިމެނޭ ޤައުމުތަކުން އެއްބަސްވާނެކަމެއްކަމަކަށް ނުބެލެވެއެވެ.
މީގެ އިތުރުން، ޓްރަމްޕް ވިދާޅުވީ އީރާނުން ފަހަތަށް ޖެހޭތަން މިހާރު ފެނިވަޑައިގަންނަވާކަމަށެވެ. ނަމަވެސް ފާއިތުވި 24 ގަޑިއިރުގެ ތެރޭގައި އީރާނުގެ އެކިފަންތީގެ ވެރިންވަނީ ވަރަށް ޖޯޝާ ފޯރިއާއެކު ވާހަކަދައްކަވާފައެވެ. އަދި އީރާނުން ދިން ޙަމަލާތަކުގެ ރައްދުގައި އެމެރިކާއިން ޙަމަލާއެއް ދީފިނަމަ، މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް ޙަމަލާދޭނެކަމުގެ އިންޒާރު އީރާނުގެ އިސްވެރިންވަނީ ދެއްވާފައެވެ.
ގިނަ ތަޖުރިބާކާރުން ބުނާގޮތުގައި އީރާނުން ޙަމަލާދިންތާ އެތައް ގަޑިއިރެއް ފަހަނައަޅާދިޔަފަހުން ޓްރަމްޕް ދެއްވި ހިޠާބުގައި ގިނަ ކަންތައްތަކެއްގެ ޖަވާބެއް ނުލިބެއެވެ. ބަދަލުގައި ފެނިގެންދިޔައީ ކުރީ ސަރުކާރުގެ ބޮލުގައި ކަންތައްތަކެއް އެޅުއްވުމަށް މަސައްކަތްކުރެއްވި ތަނެވެ.