ޕުޓިން ސޫރިޔާގައި، އިންޑޮނޭޝިޔާގެ އަސްކަރިއްޔާ ދެކުނު ޗައިނާ ކަނޑަށް، އަދި ސުލައިމާނީ ބަޣްދާދަށް ދިޔުމުގެ ބޭނުމަކީ ކޮބާ؟
މިއީ މިއަދު ދުނިޔޭގައި ހިނގި ކަންކަމުގެ ތެރެއިން ފާހަގަ ކުރެވުނު ބައެއް ޙާދިސާތަކެވެ.
ރޭޕް މައްސަލަ ސާބިތުވި މީހުންނަށް އިންޑިޔާގައި މަރުގެ ޙުކުމް އިއްވުން
2012ވަނަ އަހަރު އިންޑިޔާގެ ވެރިރަށް ނިއު ދިއްލީގެ ބަހެއްގެ ތެރޭގައި 23 އަހަރުގެ އަންހެނަކު ރޭޕްކޮށް މަރާލުމުގެ ކުށް ސާބިތުވި 4 މީހުން މިމަހުގެ 22ވަނަ ދުވަހު ދަންޖައްސާ މެރުމަށް އެޤައުމުގެ ކޯޓަކުން ނިންމައިފިއެވެ.
އިންޑޮނޭޝިޔާގެ ހަނގުރާމަމަތީ މަތިންދާބޯޓުތައް ދެކުނު ޗައިނާ ކަނޑަށް
އެކްސްކްލޫސިވް އެކޮނޮމިކް ޒޯން (އީއީޒެޑް)ގެ މައްސަލާގައި ޚިޔާލު ތަފާތުވެފައިވާ ދަނޑިވަޅެއްގައި އިންޑޮނޭޝިޔާގެ އަސްކަރީ ބާރު ދެއްކުމުގެ ބޭނުމުގައި އެޤައުމުގެ ހަނގުރާމަމަތީ މަތިންދާބޯޓުތައް ދެކުނު ޗައިނާ ކަނޑަށް ފޮނުވައިފިއެވެ. މިޚިޔާލު ތަފާތުވުން ފެތުރިފައިވަނީ ޗައިނާގެ މަސް ބޯޓުތަކަކާއެކު ކޯސްޓް ގާޑުގެ އުޅަނދެއް އިންޑޮނޭޝިޔާގެ ކަނޑުގެ ސަރަޙައްދަށް ވަނުމުންނެވެ. ޗައިނާއާއި އިންޑޮނޭޝިޔާއަކީ ޒަމާންވީ ގާތްގުޅުމެއް އޮންނަ ދެޤައުމެވެ. އެގޮތުން ޗައިނާއަކީ އިންޑޮނޭޝިޔާގެ އެންމެ ބޮޑު ވިޔަފާރީގެ ބައިވެރިޔާއެވެ. އަދި އިންޑޮނޭޝިޔާގައި އެންމެ ގިނަ އިންވެސްޓްވެސް މިހާތަނަށްކޮށްފައިވަނީ ޗައިނާއިންނެވެ.
ޕުޓިން ސޫރިޔާގައި
ރަޝިޔާގެ ރައީސް ވްލަޑްމީރް ޕުޓިން ސޫރިޔާއަށް ވަޑައިގެން އެޤައުމުގެ ރައީސް ބައްޝާރުލް އަސަދާ ބައްދަލުކުރައްވައިފިއެވެ. ޕުޓިން ބައްޝާރާ ބައްދަލުކުރެއްވީ ރަޝިޔާއާއި ސޫރިޔާއާ ގާތްގުޅުމެއް އޮންނަ އީރާނުގެ އަސްކަރީއެއްވެރިއެއް އެމެރިކާއިން މަރާލުމުން މެދުއިރުމަތީގައި ނުތަނަވަސްކަން އުފެދިފައިވާ ދަނޑިވަޅެއްގައެވެ. މިއީ 2011ވަނަ އަހަރު ސޫރިޔާގެ ދާޚީލީ ހަނގުރާމަ ފެށުނު ފަހުން ޕުޓިން އެޤައުމަށް ވަޑައިގެންނެވި ދެވަނަ ފަހަރެވެ.
ސުލައިމާނީ ބަޤްދާދަށް ދިޔުމުގެ ބޭނުމަކީ ކޮބާ؟
އެމެރިކާއިން ދިން ވައިގެ ޙަމަލާތަކެއްގައި އީރާނުގެ އަސްކަރީވެރިއެއްކަމަށްވާ ޤާސިމް ސުލައިމާނީ މަރާލީ އީރާނުގެ ސަރުކާރުގެ މަންދޫބެއްގެ ގޮތުން ޢިރާޤުގެ ބޮޑުވަޒީރު ޢާދިލް ޢަބްދުލް މަހްދީއާ ބައްދަލުކުރައްވަން ބަޣްދާދުގައި ހުންނަވަނިކޮށްކަމަށް ހާމަވެއްޖެއެވެ. ޢިރާޤުގެ ބޮޑުވަޒީރުގެ ވާހަކަތަކުން ހާމަވެފައިވާގޮތުގައި މެދުވެރިއެއްގެ ދައުރު ޢިރާޤުން އަދާކޮށްގެން އީރާނާ ސަޢުދީ ޢަރަބިއްޔާއިން މަޝްވަރާކުރަމުންނެވެ. ނަމަވެސް، އެމެރިކާއިންވަނީ ސުލައިމަނީ ޢިރާޤަށް ދިޔައީ އީރާނުގެ ސަރުކާރުގެ މަންދޫބެއްގެ ހައިސިއްޔަތުންކަމަށް ދެކެވޭ ވާހަކަތައް ދޮގުކޮށްފައެވެ.
ޤުދުސް ފޯސަށް ދޭ އެހީ އިތުރުކުރުން
އީރާނުގެ ރިވަލިއުޝަނަރީ ގާޑްސްގެ ގޮތްޕެއްކަމަށްވާ ޤުދުސް ފޯސަށް އެޤައުމުގެ ސަރުކާރުން ދޭ މާލީ އެހީތެރިކަން އިތުރުކުރުމަށް އެޤައުމުގެ ޤާނޫނުހަދާ މަޖިލިހުން ފާސްކޮށްފިއެވެ. އެގޮތުން، ޤުދުސް ފޯސަށް 200 މިލިއަން ޔޫރޯ ދިނުމަށްވަނީ ފާސްކޮށްފައެވެ. މިނިންމުން އައިސްފައިވަނީ އެމެރިކާއިން ދިން ވައިގެ ޙަމަލާތަކެއްގައި ޤުދުސް ފޯސްގެ އިސްވެރިޔާ ޤާސިމް ސުލައިމާނީ މަރުވެފައިވާ ދަނޑިވަޅެއްގައެވެ.