ޤައުމި ވޮލީ ލީގުގެ ޗެމްޕިއަންކަން ދިވެހި ސިފައިންގެ ކުލަބުން ހޯދައިފިއެވެ.
ސިފައިންނަށް ޤައުމީ ލީގުގެ ޗެމްޕިއަންކަން ލިބުނީ ޖުމްލަ 16 ޕޮއިންޓާއިއެކުގައެވެ. ދެވަނައަށްދިޔަ ޕޮލިސް ކުލަބަށް ލިބުނީ 15 ޕޮއިންޓެވެ. ލީގުގެ ފަހު މެޗުގައި ސިފައިން އަތުން ޕޮލިސް މޮޅުވިކަމުގައިވިޔަސް އެޓީމަށް ޗެމްޕިއަންކަން ނުލިބުނީ 5 ސެޓު ކުޅެގެން ނަތީޖާ ނެރެން ޖެހުމުންނެވެ. މި މެޗު ތިން ސެޓު އެއް ސެޓުން ނުވަތަ ސީދާ ތިން ސެޓުން ޕޮލިސް މޮޅުވިނަމަ އެޓީމަށް ޗެމްޕިއަންކަން ލިބޭނެއެވެ.
މެޗުގެ ހުރިހާ ސެޓެއްވެސް ދިޔައީ ވަރަށް ވާދަވެރިކޮށެވެ. ފުރަތަމަ ސެޓު ޕޮލިހުން ފަންސަވިސް ތޭވީހުން ކާމިޔާބުކުރިއިރު، ދެވަނަ ސެޓު ސިފައިން ހޯދީ ސައްބީސް ސައުވީހުންނެވެ. މެޗުގެ ތިންވަނަ ސެޓު ޕޮލިހުން ސައްބީސް ސައުވީހުން ކާމިޔާބުކުރި ނަމަވެސް ޖެހިގެން އައި ސެޓު ސައްބީސް އަށާވީހުން ކާމިޔާބުކޮށް ލީގުގެ ޗެމްޕިއަންކަން ކަށަވަރުކުރިއެވެ. މެޗުގެ ފަހު ސެޓު ޕޮލިހުން ހޯދީ ފަނަރަ އެގާރައިންނެވެ. ފައިނަލް މެޗުގެ މޮޅު ކުޅުންތެރިޔާގެ މަގާމް ހޯދީ ޕޮލިސް ކުލަބުގެ ދީޕްތީ ރޮމޭޝްއެވެ.
ޤައުމީ ވޮލީ ލީގުގެ އެންމެ މޮޅު ކުޅުންތެރިޔާގެ މަގާމް ހޯދީ ފައިނަލް މެޗުގައި މޮޅު ކުޅުމެއް ދެއްކި ދިވެހި ސިފައިންގެ ކުލަބުގެ އާދަމް ނަސީމެވެ. މުބާރާތުގެ އެންމެ މޮޅު އައުޓްސައިޑް އެޓޭކަރަކީ ޕޮލިސް ކުލަބުގެ އިސްމާއިލް ސާޖިދެވެ. ސެކަންޑް ބެސްޓް އައުޓްސައިޓް އެޓޭކަރަކީ ޕޮލިހުގެ އަލީ ހުޒާމެވެ. އެންމެ މޮޅު އޮޕޮސިޓް ކުޅުންތެރިއަކަށް ދިވެހި ސިފައިންގެ ކުލަބުގެ އަހުމަދު އަބްދުލްކަރީމް ހޮވުނުއިރު، އެންމެ މޮޅު މިޑްލް ބްލޮކަރަކީ ޕޮލިސް ކުލަބުގެ ހުސައިން ޔޫސުފެވެ. ސެކަންޑް ބެސްޓް މިޑްލް ބްލޮކަރަކީ ގުޑީސްގެ އާދަމް ފައިރޫޒެވެ. ލީގުގެ އެންމެ އުއްމީދީ ކުޅުންތެރިޔަކަށް ގުޑީސްގެ ޝަމާއިލް ހުސައިން ހޮވުނުއިރު، އެންމެ މޮޅު ލިބަރޯއަކީ ސިފައިން ކުލަބުގެ އަހުމަދު ނަބީލެވެ. އަދި އެންމެ މޮޅު ކޯޗަކީ ޗެމްޕިއަން ސިފައިން ކުލަބުގެ ކޯޗު މުމްޒާތް އަލީއެވެ.