ޓެކްސީ ޑްރައިވަރު، ޤާސިމް ޙަސަން މަރާލި މައްސަލައިގެ ތަހުޤީޤުގައި ކުށަށް އިޢުތިރާފުވެފައިވާ އަދުހަމް މުހައްމަދު ފިޔަވައި އިތުރު އެއްވެސް މީހަކު މިޖަރީމާގައި ބައިވެރިވެފައިވާކަން މިހާތަނަށް ތަޙުޤީޤަށް އެނގިފައި ނުވާކަމަށް ފުލުހުން ހާމަކުރައްވައިފިއެވެ.
ޤާސިމްގެ މަރުގެ ތަޙްޤިޤާ ގުޅޭ މަޢުލޫމާތު ހާމަކުރެއްވުމަށް ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ފުލުހުންގެ، ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓްގެ ހެޑް، ސްޕްރިންޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ ޤާސިމް ޙަސަން މަރާލާފައިވަނީ ފޭރެންކުރި މަސައްކަތުގައި ވަޅިން ބިރުދައްކައި ހަޅޭއްލެވުމުން އެކަން ހުއްޓުވުމަށްކުރި މަސައްކަތުގެ ތެރޭގައިކަމަށެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓްގެ ހެޑް ސްޕްރިންޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ ޤާސިން ހަސަން މަރާލާފައިވަނީ އޭނާއަށް ޓާގެޓްކޮށްގެން ހިންގި ޢަމަލެއް ނޫންކަން ސާބިތުވެފައިވާކަމަށެވެ. މަރުގެ ތަޙުޤީޤުގައި މިހާރު ފުލުހުންގެ ބެލުމުގެ ދަށުގައި ހުރި ޅ.ހިންނަވަރު ބޮޑުހިޔާގޭ އުމުރުން 21 އަހަރުގެ އަދުހަމް މުހައްމަދު ކޯޓުގައިވެސް ވަނީ ކުށަށް އިޢުތިރާފުވެފައެވެ. އޭނާވަނީ ކަން ހިގިގޮތް ތަފްސީލުކޮށް ކިޔައިދީފައިކަމަށްވެސް ޝިފާއު ވިދާޅުވިއެވެ.
ގާސިމް މަރާލާފައި ވަނީ އަދުހަމް ފޭރެން ކުރި މަސައްކަތުގައި ގާސިމްގެ ކަރުގައި ހިފައި ވަޅިން ބިރުދެއްކުމުން، އޭނާގެ ކިބައިން ސަލާމަތް ވުމަށް ޤާސިމް ކުރިމަސައްކަތް ހުއްޓުވުމުގެ ގޮތުން ވަޅިން ހަމަލާދީގެންކަމަށް ފުލުހުން ހާމަކުރެއްވިއެވެ. ޤާސިމް ހަސަންއަށް ދިން ހަމަލާތަކުގައި އަތްތިލަ ވަރަށް ބޮޑަށް ޒަޚަމްވެފައިވާ ކަމަށާއި، އަދި ޤާސިމްގެ އަޑު ކަނޑުވާލުމަށް އަދުހަމް ޤާސިމްގެ ކަރަށް ވަޅިން ހަމަލާދީފައިވާކަމަށް ފުލުހުން ވިދާޅުވިއެވެ.
"އަދުހަމް މުހައްމަދު މިހާރު ކުށަށް އިއުތިރާފްވެެފައިވާއިރު، ދައުވާ ކުރުމުގައި އެޔަށް އެކަނި ބަރޯސާވެފައެއް ނުވޭ. މިއީ ޤާސިމްއަށް ޓާގެޓް ކުރެވިފައިވާ ކްރައިމްއެއްކަމަށް ނުބަލާ އަޅުގަނޑުމެން ފަހުން އިންވެސްޓިގޭޝަން ކުރިއަށްގެންގޮސްފައި." ސްޕްރިންޓެންޑެންޓް އޮފް ޕޮލިސް ހަސަން ޝިފާއު ވިދާޅުވިއެވެ.
ޤާސިމް ހަސަން މަރާލި މައްސަލަގައި ތަހުޤީޤުގައި އަދުހަމް ފިޔަވައި އިތުރު އެއްވެސް މީހަކު ބައިވެރިވެފައިވާކަން މިހާތަނަށް ތަޙުޤީޤަށް ސާބިތުވެފައިނުވާކަމަށް ޝިފާއު ވިދާޅުވިއެވެ. މި ޢަމަލު ހިންގުމަށް އަދުހަމް ބޭނުންކުރި ވަޅިއަކީ ހުޅުމާލޭގެ ކެފޭއަކުން މަސްކަނޑަންކަމަށްބުނެ އޭނާ ހޯދި ވަޅިއެއްކަމަށާ، އޭނާ ލައިގެން ހުރި ގަމީހަކީ އަދުހަމްގެ އެކުވެރިއެއްގެ ގަމީހެއްކަމަށްވާއިރު، މިއިން އެއްވެސް މީހެއްގެ ބައިވެރިވުން މިޢަމަލުގައި ހިމެނޭކަން ސާބިތުވެފައިނުވާކަމަށް ފުލުހުން ވަނީ ހާމަކުރައްވާފައެވެ.
ފުލުހުންވަނީ އަދުހަމް އެހާދިސާ ހިންގިއިރު ލައިގެންހުރި ފަޓުލޫނާއި ގަމީސްވެސް ތަހުގީގަށް ހޯދާފައެވެ. އަދި ގާސިމަށް ހަމަލާދިން ވަޅި އެސަރަހައްދުގެ ވަޅެއްގެ ތެރެއިން ހޯދާފައިވާކަމަށް ފުލުހުން ވިދާޅުވެފައިވެއެވެ.
މިމައްސަލާގައި ހުޅުމާލެއާއި، ހުޅުލެއާއި، މާލޭގެ ގިނަ އަދަދެއްގެ ސީސީޓީވީ ފުޓޭޖް ބަލައި ތަހުގީގަށް އެނަލައިޒް ކޮށްފައިވާކަމަށާ، އެގޮތުން 67 ކެމެރާއެއްގެ 193 ސީސީޓީވީ ފުޓޭޖް އެނަލައިޒް ކޮށްފައިވާކަމަށް ފުލުހުން ވިދާޅުވެއެވެ. މިއީ ވަގުތުން ބަލާނަމަ 1270 ގަޑިއިރާއި 15 މިނިޓްގެ ވަގުތުކަމަށް ފުލުހުން ވިދާޅުވެއެވެ.
ފުލުހުން ވިދާޅުވެފައި ވަނީ މިމައްސަލާގައި ގާސިމްގެ ޤާތިލް ކުށަށް އިޢުތިރާފްވިޔަސް ދައުވާ ކުރުމުގައި އެޔަށް އެކަނި ބަރޯސާނުވާނެކަމަށެވެ.