ޓެކްސީ ޑްރައިވަރު، ގާސިމް ހަސަން މަރާލާފައި ވަނީ ފޭރެން ކުރި މަސައްކަތުގައި ވަޅިން ބިރުދައްކައި ހަޅޭއްލެވުމުން އެކަން ހުއްޓުވުމަށްކުރި މަސައްކަތުގެ ތެރޭގައިކަމަށް ފުލުހުން ވިދާޅުވެއްޖެއެވެ.
ގާސިމްގެ މަރާއި ގުޅޭގޮތުން ފުލުހުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓްގެ ހެޑް، ސްޕްރިންޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ ގާސިމް މަރާލާފައި ވަނީ ޅ.ހިންނަވަރު ބޮޑުހިޔާގޭ އުމުރުން 21 އަހަރުގެ އަދުހަމް މުހައްމަދުކަމަށެވެ. އަދި އޭނާ ދެނެގަނެވުނީ ފުލުހުންނަށް ކާރުން ލިބުނު ފޮރެންސިކް ހެއްކަށް ބިނާކޮށް ހިންގި ތަހުޤީޤުން ކަމަށެވެ. އަދި އޭނާ ހައްޔަރު ކުރުމުން ކުށަށް އިއުތިރާފްވެ އެކަން ކުރިގޮތްވެސް އަދުހަމް ކިޔައިދީފައިވާ ކަމަށް އޭނާ ވިދާޅުވިއެވެ.
ގާސިމް މަރާލާފައި ވަނީ އަދުހަމް ފޭރެން ކުރި މަސައްކަތުގައި ގާސިމްގެ ކަރުގައި ހިފައި ވަޅިން ބިރުދެއްކުމުން ސަލާމަތް ވުމަށް ކުރިމަސައްކަތް ހުއްޓުވުމުގެ ގޮތުން ވަޅިން ހަމަލާދީގެންނެވެ.
މިގޮތުން އަދުހަމްގެ ކިބައިން ސަލާމަތް ވުމަށް ޤާސިމް މަސައްކަތް ކުރުމުގެ ތެރޭގައި އޭނާގެ އަތްތިލަ ވަރަށް ބޮޑަށް ޒަޚަމްވެފައިވާ ކަމަށާއި، އަދި ޤާސިމްގެ އަޑު ކަނޑުވާލުމަށް އަދުހަމް ޤާސިމްގެ ކަރަށް ވަޅިން ހަމަލާދިނީކަމުގައި ފުލުހުން ވިދާޅުވިއެވެ.
މިމައްސަލާގައި ފުލުހުންވަނީ ގާސިމް މަރާލި އަދުހަމް އެހާދިސާ ހިނގައިދިޔައިރު ލައިގެންހުރި ފަޓުލޫނާއި ގަމީސްވެސް ތަހުގީގަށް ހޯދާފައެވެ. އަދި ގާސިމަށް ހަމަލާދިން ވަޅި އެސަރަހައްދުގެ ވަޅެއްގެ ތެރެއިން ހޯދާފައިވާކަމަށް ފުލުހުން ވިދާޅުވެފައިވެއެވެ.
ފުލުހުން ބުނީ މިމައްސަލާގައި ހުޅުމާލެއާއި، ހުޅުލެއާއި، މާލޭގެ ގިނަ އަދަދެއްގެ ސީސީޓީވީ ފުޓޭޖް ބަލައި ތަހުގީގަށް އެނަލައިޒް ކޮށްފައިވާކަމަށެވެ. އެގޮތުން 67 ކެމެރާއެއްގެ 193 ސީސީޓީވީ ފުޓޭޖް އެނަލައިޒް ކޮށްފައިވާކަމަށެވެ. މިއީ ވަގުތުން ބަލާނަމަ 1270 ގަޑިއިރާއި 15 މިނިޓްގެ ވަގުތުކަމަށް ފުލުހުން ވިދާޅުވެއެވެ.
ފުލުހުން ވިދާޅުވެފައި ވަނީ މިމައްސަލާގައި ފުލުހުން ގާސިމްގެ ގާތިލް ކުށަށް އިއުތިރާފްވިޔަސް ދައުވާ ކުރުމުގައި އެޔަށް އެކަނި ބަރޯސާނުވާނެކަމަށެވެ. ފުލުހުން ދަނީ މިމައްސަލާގައި އިތުރަށް ތަހުގީގް ކުރަންޖެހޭ ކަންކަން ތަހުގީގްކޮށް، އަދިވެސް ބަލަންޖެހޭ ސީސީޓީވީ ފުޓޭތްވެސް ބަލަމުންދާކަމަށެވެ.