ހަރުކަށި ފިކުރާއި ގުޅޭގޮތުން ދީނީ ޢިލްމުވެރިންގެ މެދުގައި އުފެދިފައިވާ ޚިޔާލު ތަފާތުވުންތައް ހައްލުކުރުމުގެ ގޮތުން ދީނީ ޢިލްމުވެރިންނާއި މަޝްވަރާކުރުމުގެ މަސައްކަތް އިސްލާމިކް މިނިސްޓްރީން ފަށައިފިއެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން އިސްލާމިކް މިނިސްޓަރ ޑރ.އަހްމަދު ޒާހިރު ޢަލީ ވިދާޅުވީ، ދީނީ ގިނަ ޢިލްމުވެރިންނަކީ ހަރުކަށި ވިސްނުންތަކާއި ދެކޮޅު ބައެއްކަމަށެވެ. ނަމަވެސް ބައެއް ދީނީ ޢިލްމުވެރިންގެ މެދުގައި ޚިޔާލު ތަފާތުވުން އެފެދިފައިވަނީ ހަރުކަށި ފިކުރު ފަތުރަން މަސައްކަތްކުރާ މީހުންނާއި ދެކޮޅަށް ފިޔަވަޅު އަޅަންފެށުމުންކަމަށެވެ.
މިނިސްޓަރ ވިދާޅުވީ ސޯޝަލް މީޑިއާގައި ދީނީ ޢިލްމުވެރިން އެއްބަޔަކު އަނެއްބަޔަކަށް ރައްދުވާގޮތަށް ވާހަކަ ދެއްކުމަކީ މިކަންކަން އިތުރަށް ގޯސްވެގެންދާނެ ކަމެއްކަމަށާއި، އެހެންކަމުން އެފަދަ ވާހަކަތައް ނުދެއްކުމަށް އިލްތިމާސްކުރާ ކަމަށެވެ.
އިސްލާމިކް މިނިސްޓަރ އަޙްމަދު ޒާހިރު ވިދާޅުވީ، ދީނުގެ ނަމުގައި ހަރުކަށި ފިކުރު ފެތުރުމާއި ދެކޮޅަށް ހުރިހާ ޢިލްމުވެރިންވެސް މަސައްކަތްކުރަންޖެހޭކަމަށެވެ. މިނިސްޓަރ ވިދާޅުވީ، ދީނީ ޢިލްމުވެރިންގެ މެދުގައި އުފެދިގެން އުޅޭ ޚިޔާލުތަފާތުވުންތައް ޙައްލުކުރުމަށް މަޝްވަރާކުރުމަށް ދީނީ ޢިލްުވެރިންނާއެކު އެއްމޭޒެއްގެ ދަށަށް ގެނައުމުގެ މަސައްކަތް ފަށާފައިވާކަމަށެވެ. އަދި މާލަސްތަކެއް ނުވެ އެކަމަށް ޙާއްލެއް ގެނެވި ހުރިހާ ޢިލްމުވެރިންގެ މެދުގައި އެއްބަސްވުމަކަށް އާދެވިދާނެކަމަށް ޤަބޫލުރައްވާކަމަށް އިސްލާމިކް މިނިސްޓަރ ވިދާޅުވިއެވެ.
ހުރިހާ ދީނީ ޢިލްމުވެރިންވެސް މަސައްކަތްކުރަންވާނީ މުޖުތަމަޢުގެ ހަމަޖެހުމަށްކަން ފާޙަގަކުރައްވާ އިސްލާމިކް މިނިސްޓަރ ވިދާޅުވީ، ދީނީ ޢިލްމުވެރިންނަކީވެސް ބިދުއަވެރިންކަމަށް ދެކިގެން ހަރުކަށި ގޮތްތަކެއް ގެންގުޅޭ މީހުންނާމެދު ފިޔަވަޅު އަޅަން ފެށުމުން އުފެދިފައިވާ ޚިޔާލުތަފާތުވުންތައް ޙައްލުކުރެވޭނެކަމަށެވެ.
އިސްލާމިކް މިނިސްޓްރީން ވަނީ ދީނީ ތަގުރީރު ކުރުމާއި، ވައުޛު ބުނުމަށް ތިން ޢިލްމުވެރިޔަކަށް ދީފައިވާ ހުއްދަ ބާޠިލްކޮށްފައެވެ. ދިވެހިރައްޔިތުންގެ ދީނީ އެއްބައިވަންތަކަން ހިމާޔަތް ކުރުމުގެ ގާނޫނުއާއި އަދި އެ ޤާނޫނޫގެ ދަށުން ހެދިފައިވާ ޤަވާއިދުތަކުގެ ދަށުން ތިން މީހަކަށް ދީނީ ތަގުރީރު ކުރުމާއި، ވައުޡު ބުނުމަށް އެ މިނިސްޓްރީން ދީފައިވާ ހުއްދަ ހިފަހައްޓާފައިވަނީ، ނ. ޅޮހި، މަނަދޫގޭ އަބްދުއްރަހީމް މުހައްމަދު، ސ. މީދޫ ދެކުނުގެ ޖައުފަރު ފާއިޒުގެ އިތުރުން ގދ. ތިނަދޫ ރެޑްސީ މުހައްމަދު ހަސަންއެވެ.
އިސްލާމިކް މިނިސްޓަރ ވިދާޅުވީ ވަގުތީ ގޮތުން ދަރުސް ދިނުން ހުއްޓުވާފައި ވީނަމަވެސް، އެމީހުން އެކަންކަން އިސްލާހުކުރާ މިންވަރު ދެނެގަތުމަށްފަހު އިޞްލާހުކޮށްފިނަމަ އެ ސަސްޕެންޝަން މުރާޖަޢާކުރާނެކަމަށެވެ. އަދި އެ އިލްމުވެރިނާއެކު އެއްބަސްވުމެއް އެކުލަވާލުމަށް މަސައްކަތްކުރާކަމަށްވެސް އިސްލާމިކް މިނިސްޓަރ ޑރ.އަޙްމަދު ޒާހިރު ވިދާޅުވިއެވެ.