މާލޭގައި މަސްތުވާތެކީގެ ވިޔަފާރި ކެފޭ އުސޫލުން ހިންގަމުންދިޔަ ގެތަކަކުން 33 މީހަކު ހައްޔަރުކޮށްފި

މާލޭގައި މަސްތުވާތަކެތި ބޭނުންކޮށް ވިއްކާ އޭގެ ވިޔަފާރިކުރާ ތަންތަން ހޯދުމަށް ފުލުހުން ހިންގި އޮޕަރޭޝަންގައި 33 މީހަކު ހައްޔަރުކޮށްފިއެވެ.

މި މީހުން ހައްޔަރުކޮށްފައިވަނީ މަސްތުވާތަކެތީގެ ވިޔަފާރި ކުރާ ނެޓްވޯކްތަކަށް ނިސްބަތްވާ ފަރާތްތަކުން މާލޭގެ ބައެއް ގޭގައިގައި މަސްތުވާތަކެތި ބޭނުންކޮށް ވިއްކާ ވިޔަފާރިކޮށް އެގެތަކުގައި ކެފޭ އުސޫލުން މަސްތުވާތަކެތީގެ ޚިދުމަތް ލިބޭގޮތަށް ތައްޔާރު ކޮށްފައިވާ ގެތަކަށް އަމާޒުކޮށގެން ފުލުހުން ހިންގި ޚާއްސަ އޮޕަރޭޝަނެއްގައެވެ.

ފުލުހުން ބުނީ މިއޮޕަރޭޝަންގެ ދަށުން މިރޭ މ.ލޮނުމިދިލިގެ ބަލާ ފާސްކޮށް އެގެއިން އަށާރަ އަހަރުން ދަށުގެ 4 ފިރިހެން ކުދިންނާއި އަށާރަ އަހަރުން މަތީގެ ދެ ފިރިހެނުންނާއި އަށާރަ އަހަރުން މަތީގެ އަންހެނެއްގެ އިތުރުން ބިދޭސީ ފިރިހެނަކުވެސް ހައްޔަރުކޮށްފައިވާ ކަމަށެެވެ. އަދި އެގެއިން ތިރީސް އަށް ހާހަށްވުރެ ގިނަ ދިވެހި ފައިސާ އާއި އެކި ޤައުމުތަކުގެ ފައިސާވެސް ފެނިފައިވާ ކަމަށެވެ. މިފައިސާތައް ފެނިފައިވަނީ އެގެއިން ހައްޔަރުކުރި އަށާރަ އަހަރު ނުފުރޭ ކުއްޖެއްގެ ވޮލެޓުން ކަމަށް ފުލުހުން ބުނެއެވެ. އަދި އެގެއިން މަސްތުވާތަކެތި ކަމަށް ބެލެވޭ އެއްޗެއް ހުރި 20 ރަބަރު ޕެކެޓް ފެނިފައިވާ ކަމަށްވެސް ފުލުހުން ބުނެއެވެ.

މަސްތުވާތަކެތީގެ ވިޔަފާރި ކުރާ ނެޓްވޯކްތައް ހޯދުމަށް ފުލުހުން ހިންގާ މިއޮޕަރޭޝަންގައި މިމަހުގެ ތެރޭގައި ފުލުހުންވަނީ މ.ލޮނުމިދިލިގޭގެ އިތުރުން މާލޭގެ 4 ގެއެއް ބަލާ ފާސްކޮށްފައެވެ. ފުލުހުން ބުނީ މަސްތުވާތަކެތީގެ ވިޔަފާރި ފުޅާދާއިރާއެއްގައި ކުރަމުންދިޔަ މިގެތަކަކީ އެތަންތަނުގެ ވެރިފަރާތް ނުވަތަ ކުއްޔަށް ހިފާފައިވާ ފަރާތްތަކުގެ ރުހުމާއެކު މާލީ މަންފާ ހޯދުމުގެ ނިޔަތުގައި އެކަން ކުރަމުންދިޔަ ގެތަކެއްކަން ފާހަގަ ކުރެވިފައިވާކަމަށެވެ. އަދި މި އޮޕަރޭޝަންތަކަކީ އެ ގެތަކުގެ ވެރިފަރާތް ނުވަތަ ކުއްޔަށް ހިފާފައިވާ ފަރާތް ޒިންމާދާރު ކުރުމަށް ނުވަތަ ޖިނާއީ ތަޙްޤީޤެއް ހިންގައި އެފަރާތްތަކާއި މެދު ފިޔަވަޅު އެޅުމަށްޓަކައި، ހިންގި އޮޕަރޭޝަން ތަކެއްކަމަށެވެ.

ފުލުހުން ހިންގި އޮޕަރޭޝަނުގައި ބަލައި ފާސްކުރި ގެތަކަކީ:

- 05 ޑިސެންބަރު 2019 ވަނަ ދުވަހު ބަލާފާސްކުރެވިފައިވޭ.
- މިގެ ބަލާފާސްކުރުމަށްފަހު މަސްތުވާތަކެތިކަމަށް ޝައްކުކުރެވޭ އެއްޗިއްސާ އެކު 11 މީހުން ހައްޔަރުކުރެވިފައި

- 12 ޑިސެންބަރު 2019 ވަނަ ދުވަހު ބަލާފާސްކުރެވިފައިވޭ.
- މިގެ ބަލާފާސްކުރުމަށްފަހު މަސްތުވާތަކެތިކަމަށް ޝައްކުކުރެވޭ އެއްޗިއްސާ އެކު 04 މީހުން ހައްޔަރުކުރެވިފައި

- 16 ޑިސެންބަރު 2019 ވަނަ ދުވަހު ބަލާފާސްކުރެވިފައިވޭ.
- މިގެ ބަލާފާސްކުރުމަށްފަހު މަސްތުވާތަކެތިކަމަށް ޝައްކުކުރެވޭ އެއްޗިއްސާ އެކު 10 މީހުން ހައްޔަރުކުރެވިފައި

- 18 ޑިސެންބަރު 2019 ވަނަ ދުވަހު ބަލާފާސްކުރެވިފައިވޭ.
- މިގެ ބަލާފާސްކުރުމަށްފަހު މަސްތުވާތަކެތިކަމަށް ޝައްކުކުރެވޭ އެއްޗިއްސާ އެކު 04 މީހުން ހައްޔަރުކުރެވިފައި

މިގެތަކަކީ ތަކުރާކޮށް މީގެ ކުރިންވެސް މިފަދަ މައްސަލަ ތަކުގައި ބަލާފާސްކޮށްފައިވާ ގެތަކެއްކަން ފުލުހުން ވަނީ ފާހަގަކޮށްފައެވެ.