ކުޅުދުއްފުށީ، މޯބައިލް ފިހާރަ ފަޅާލައިގެން ގިނަ އަދަދެއްގެ މޯބައިލް ފޯނުތަކެއް ވަގަށް ނެގި މައްސަލާގައި މީހަކު ހައްޔަރުކޮށްފި އެވެ.
މިވައްކަން ކޮށްފައި ވަނީ، މިދިޔަ އަންގާރަ ދުވަހުގެ ރޭގެ މެންދަމުގެ ވަގުތުގައެވެ.
"ގާޑިޔާ" ފިހާރަ ފަޅާލި މަންޒަރު ވަނީ އެތަނުގައި ހުރި ސީސީޓީވީ ކެމެރާތަކަށް އަރާފަ އެވެ.
ކެމެރާތަކުން ފެންނަ ގޮތުގައި ބުރުގާ އަޅައިގެން އަންހެން ހެދުން އަޅައިގެން އައި އެ މީހާ ވަނީ ފިހާރަ ބޭރުގައި ހުރެގެން ބިއްލޫރިގަނޑެއް ތަޅާލައި އެތަނުން ގިނަ އަދަދެއްގެ މޯބައިލް ފޯނު ވަގަށް ނަގައި އަތުގައި އޮތް ހޭންޑް ބޭގަކަށް އަޅައިގެން ގެންގޮސްފައެވެ.
މި މައްސަލައާ ގުޅިގެން ފުލުހުން ވިދާޅުވީ، މި މައްސަލަ ފުލުހުންނަށް ހުށަހެޅީ އަންގާރަ ދުވަހުގެރޭ ފަތިހު 5:45 ހާއިރު ކަމަށާއި ވައްކަމާ ގުޅިގެން ސީސީޓީވީ ފުޓޭޖް ބަލައިގެން ކުރި މަސައްކަތުން ވައްކަން ކުރިކަމަށް ތުހުމަތުކުރެވޭ މީހާ ދެނެގަނެވި، ކޯޓް އަމުރެއްގެ ދަށުން އޭނާ ހައްޔަރުކޮށްފައިވާ ކަމަށެވެ.
މިމައްސަލާގައި ހައްޔަރުކޮށްފައި ވަނީ 28 އަހަރުގެ ދިވެހި ފިރިހެނެއްކަމަށާއި އަދި އޭނާ ވަގަށް ނަގާފައިވާ ފޯނުތައްވެސް ހޯދިފައިވާ ކަމަށް ފުލުހުން ވަނީ ވިދާޅުވެފައެވެ. ވަގަށް ނެގި ފޯނުތަކުގެ ތެރެއިން އެއް ފޯނު ހޯދާފައި ވަނީ ބިދޭސީއަކަށް ވިއްކާލާފައިވަނިކޮށެވެ.