މޯލްޑިވްސް އިމިގްރޭޝަނުން ކޯލް ސެންޓަރުގެ ޚިދުމަތް ދޭން ފަށައިފިއެވެ.
މިކަމަށްޓަކާ ބޭއްވި ޚާއްސަ ރަސްމިއްޔާތެއްގައި އިމިގްރޭޝަންގެ ކޯލް ސެންޓަރުގެ ޚިދުމަތް އިފްތިތާޙު ކޮށްދެއްވީ މިނިސްޓަރ އޮފް ޑިފެންސް، އަލްއުސްތާޛާ މާރިޔާ އަޙްމަދު ދީދީ އެވެ. މިރަސްމިއްޔާތުގައި ވާހަކަފުޅު ދައްކަވަމުން ޑިފެންސް މިނިސްޓަރ މާރިޔާ ވިދާޅުވީ، ކޯލް ސެންޓަރުގެ ޚިދުމަތް ވެގެންދާނީ ރައްޔިތުންނަށް ދެވޭ ވަރަށް މުހިންމު ޚިދުމަތަކަށް ކަމަށާއި، ރާއްޖޭގެ ކޮންމެ ތަނެއްގައި ހުރި ނަމަވެސް ރައްޔިތުންނަށް ލިބެންޖެހޭ މަޢުލޫމާތު ލިބޭވަރު ކޮށްދެއްވުމަކީ ރަނގަޅު ފެށުމެއް ކަމަށެވެ. އަދި ރާއްޖޭގެ ހުރިހާ ހިސާބަކަށް ވެސް ޕާސްޕޯޓުގެ ޚިދުމަތާއި އެނޫންވެސް ގިނަ ޚިދުމަތްތަކެއް ލިބޭނެ އިންތިޒާމް ހަމަޖެއްސުމުގެ މުހިންމުކަން މިނިސްޓަރ ފާހަގަކުރެއްވިއެވެ.
ޑިފެންސް މިނިސްޓަރ ވިދާޅުވީ، ސަރުކާރުގެ ސިޔާސަތާއި އެއްގޮތްވާގޮތުގެ މަތީން، ރާއްޖޭގެ ހުރިހާ ރައްޔިތުންނަށް ހަމަހަމަކަމާއިއެކު ޚިދުމަތް ލިބޭނެ ގޮތެއް ހޯދާދިނުމަކީ ސަރުކާރުގެ އަމާޒެއް ކަމަށާއި އަދި ރާއްޖޭގެ ހުރިހާ ރައްޔިތުންނަށް ސަރުކާރުންދޭ އެންމެހާ ޚިދުމަތްތައް ލިބޭނެ ގޮތްތައް ހޯދައިދިނުމަކީ ސަރުކާރު ހިންގެވުމާއި ހަވާލުވެގެން ތިބޭ ބައެއްގެ މަސްޢޫލިއްޔަތެއް ކަމަށެވެ.
މި ރަސްމިއްޔާތުގައި ވާހަކަފުޅު ދައްކަވަމުން، ކޯލް ސެންޓަރެއް ހުރުމުގެ މުހިންމުކަމާއި ގުޅޭގޮތުން ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު އަޙުމަދު ޙުސެއިން ވިދާޅުވީ، ރައްޔިތުންނަށް ބޭނުންވާ މަޢުލޫމާތު އެކަށީގެންވާ ގޮތުގައި ނުލިބޭކަމުގެ ޝަކުވާ އަބަދުވެސް ލިބޭކަމަށެވެ. އަދި އަލަށް ތަޢާރަފުކުރި މިޚިދުމަތާއެކު އިމިގްރޭޝަނުން ސާފުކުރަން ބޭނުންވާ މަޢުލޫމާތުތައް ރައްޔިތުންނަށް ފަސޭހަކަމާއެކު ލިބިގެންދާނެކަމަށް ކޮންޓްރޯލަރ ޖެނެރަލް ވިދާޅުވިއެވެ.
ކޮންޓްރޯލަރ ޖެނެރަލް އިތުރަށް ވިދާޅުވީ، މިއަހަރު ތެރޭގައި ކުރުމަށް ކަނޑައެޅި ކަންތައްތަކުގެ ތެރެއިން ގާތްގަނޑަކަށް ނުވަދިހަ ތިނެއް އިންސައްތަ ހާސިލްވެފައިވާ ކަމަށެވެ. އަދި އިމިގްރޭޝަންގެ މަޤުސަދަކީ، ރައްޔިތުންނާއި ގުޅިގެން ޒަމާނީ ވަސީލަތްތަކުގެ ބޭނުންކޮށް، ރައްޔިތުންނަށް ލުއިފަސޭހަ ޚިދުމަތްތަކެއް ފޯރުވައިދިނުން ކަމަށެވެ.
އިމިގްރޭޝަނުން އަލަށް ދޭންފެށި ކޯލް ސެންޓަރު މެދުވެރިކޮށް އިމިގްރޭޝަނުން ދެމުންގެންދާ ހުރިހާ ޚިދުމަތްތަކާއި ގުޅޭގޮތުން މަޢުލޫމާތު ފޯރުވައިދެވޭނެ ކަމަށް އެ މުއައްސަސާއިން ވިދާޅުވެއެވެ. އިމިގްރޭޝަނުގެ ކޯލް ސެންޓަރުގެ ނަންބަރަކީ 1434 އެވެ.