މަސައްކަތްތެރިންގެ ހައްޤުތަަކަށް ވަކާލާތުކުރާ އދގެ އިދާރާ އިންޓަނޭޝަނަލް ލޭބަރ އޯގަނައިޒޭޝަން، އައިއެލްއޯއަށް 100 އަހަރު ފުރުން ފާހަގަކުރުމަށް ރާއްޖޭގައި ބައިސްކަލު ބުރެއް ބާއްވައިފިއެވެ.
އިކޮނޮމިކް މިނިސްޓްރީން ހުޅުމާލެ ސެންޓްރަލް ޕާކުގައި ކުރިއަށްގެން ދިޔަ މި ބައިސްކަލު ބުރުގައި ދެ ޖިންސުގެ ގިނަ އަދަދެއްގެ މީހުން ވަނީ ބައިވެރިވެފައެވެ.
މި ބައިސްކަލު ބުރަށް ފަހު، އިކޮނޮމިކް މިނިސްޓްރީގެ ޑެޕިއުޓީ މިނިސްޓަރ އަހުމަދު މުޖާހިދު ދެއްކެވި ވާހަކައިގައި ވަނީ ރާއްޖެއިން މަސައްކަތްތެރިންގެ ހައްޤުތަށް ހިމާޔަތްކުރުމަށް ކުރާ މަސައްކަތްތަކަށް އަލިއަޅުއްވާލައްވާފައެވެ. އެގޮތުން މަސައްކަތުގެ މާޙައުލުގައި ދުޅަހެޔޮ ހަމަހަމަ އަސާސްތައް ދެމެހެއްޓުމަށް މަސައްކަތްކުރަމުންދާކަން މުޖާހިދު ފާހަގަކުރެއްވިއެވެ. މީގެ އިތުރުން އައިއެލްއޯއިން އެ އަމާޒަށް ވާސިލްވުމަށް ކުރަމުން ގެންދާ މަސައްކަތްތަކަށް ޑެޕިއުޓީ މިނިސްޓަރ ޝުކުރު އަދާކުރެއްވިއެވެ.
"މަސައްކަތް ތެރިންނަށް ފަހި ދުޅަހެޔޮ މާޙައުލެއް ފޯރުކޮށްދިނުން މުހިންމު. މިހާރު އަޅުގަނޑުމެން މިކަމަށް މުހިންމު މަސައްކަތްތަކެއް އެބަކުރަން." ޑެޕިއުޓީ މިނިސްޓަރ މުޖާހިދު ވިދާޅުވިއެވެ.
މި ހަރަކާތުގައި ބައިވެރިވި ފަރާތްތަކުން ވަނީ މަސައްކަތުގެ މާޙައުލުގައި ގެންގުޅެން ބޭނުންވާ ޝިއާރުތަށް ބައިސްކަލު ބުރުގެ ތެރެއިން ދައްކާލާފައެެވެ. މި ބައިސްކަލު ބުރުގައި އިކޮނޮމިކް މިނިސްޓްރީގެ އިސް ބޭފުޅުންނާއި، އައިއެލްއޯއިން ރާއްޖެއަށް ކަނޑައަޅުއްވާފައި ހުންނަވާ ކަންޓްރީ ރެޕްރެޒެންޓޭޓިވް ސިމްރަން ސިންގްވެސް ބައިވެރިވެވަޑައިގެންނެވިއެވެ. އިންޓަނޭޝަންލް ލޭބަރ އޯގަނައިޒޭޝަނަށް 100 އަހަރު ފުރުން ފާހަގަކުރުމަށް ބާއްވާ ރަސްމީ ޖަލްސާ މާދަމާ އޮންނާނެއެވެ.