ފިކުރީ އުފެއްދުންތައް އާއްމުކޮށް ނެރުމުގެ ބައެއް ކަންކަން ހިލޭ ކޮށްދިނުމަށް ޕީއެސްއެމްއިން ނިންމައިފި
ފިކުރީ އުފެއްދުންތައް އާއްމުކޮށް ނެރުމުގެ ބައެއް ކަންކަން ހިލޭ ކޮށްދިނުމަށް ޕަބްލިކް ސަރވިސް މީޑިއާ، ޕީއެސްއެމްއިން ނިންމައިފިއެވެ.
މީގެ ތެރޭގައި ޤައުމަށް މުހިންމު، ޢިލްމީ މަސައްކަތްތަކާއި ހޯދުންތަކާއި، އުފެއްދުންތެރި ފޮތާއި ދިރާސާ ކަރުދާހާއި، ޝާއިޢުކުރެވޭ އެކިއެކި ޢިލްމީ ލިޔުންތައް ޢާންމުކޮށް ނެރުމަށް އެހީވުން ހިމެނެއެވެ. ޕީއެސްއެމް އިން މިގޮތަށް ހަމަޖއްސާފައިވަނީ މިފަދަ އުފެއްދުންތަކަށާއި އުފެއްދުންތެރިންނަށް އެހީތެރިވެދީ ހިއްވަރުދިނުމުގެ ގޮތުންނެވެ.
އެގޮތުން ހިލޭ ކޮށްދިނުމަށް ހަމަޖެހިފައި ވަނީ ދިރާސާތަކާއި ޢިލްމީ އަދި ފިކުރީ އުފެއްދުންތައް ނެރުމަށް ބާއްވާ ޙަފްލާތަކެވެ. މި ހަފްލާތައް ޕީއެސްއެމްގެ ރޭޑިއޯ ބިލްޑިންގް ސިނެކޯ މާލަމުގައި ބޭއްވުމުގެ އިންތިޒާމްތައް އަޑާއެކު ހަމަޖެއްސައިދިނުމަށް ވަނީ ނިންމާފައެވެ. އަދި ޕީއެސްއެމްގެ ރޭޑިއޯ ޗެނަލްތަކާއި ޓީވީ ޗެނަލްތަކުން ގެނެސްދޭ، މިފަދަ ކަންކަމާ ގުޅުންހުރި ޕްރޮގްރާމްތަކުގައި އެ ރިލީޒްކުރާ އުފެއްދުމަކާއި ގުޅުންހުރި މަޢުލޫމާތު ގެނެސްދިނުމުގެ ފުރުޞަތުވެސް ދިނުމަށް ވަނީ ހަމަޖެހިފައެވެ.
މީގެ އިތުރުން މިފަދަ ކަންކަމާ ގުޅިގެން ހޯދުމަށް އެދޭ ޚިދުމަތްތަކުގެ ތެރެއިން، އިތުރު ޚިދުމަތަކަށް އެދުމުން އޮންނަ އުސޫލެއްގެ މަތީން އެކަންވެސް ހަމަޖައްސައިދިނުމަށް ޕީއެސްއެމުން ވަނީ ނިންމާފައެވެ.
މިފަދަ ޚިދުމަތްތައް ލިބިގަންނަ ފަރާތްތަކުން ޕީއެސްއެމްއަށް ކޮށްދޭންޖެހޭ ހަމައެކަނި ކަމަކީ، އެ އުފެއްދުމެއްގެ ކޮޕީއެއް، ޕީއެސްއެމްގެ ކޮންޓެންޓް ލައިބްރަރީއަށް ހަދިޔާކުރުމެވެ.