ނޫމަޑި ކުންފުންޏަށް ބަދަލު ދޭން ނިންމުމުގައި އިހުމާލުވާ ފަރާތްތަކުގެ މައްސަލަ ބަލާ، ފިޔަވަޅު އެޅުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން ފާސްކޮށްފިއެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީގެ ބައްދަލުވުމުގައި އެކޮމިޓީގެ ގިނަ މެމްބަރުން ވިދާޅުވީ ދައުލަތުން ނޫމަޑި ކުންފުންޏަށް ބޮޑު ބަދަލެއް ދޭންޖެހުނީ ކުރީގެ ހައުސިންގ މިނިސްޓަރ ޑރ.މުހައްމަދު މުޢިއްޒު އާބިޓްރޭޝަންގައި ނޫމަޑި ކުންފުންޏާ އެއްކޮޅަށް ހެކިބަސްދީ ވާހަކަ ދެއްކުމުގެ ސަބަބުންކަމަށެވެ. އެހެންކަމުން މިމައްސަލަ ކަމާ ގުޅުން ހުރި މުއައްސަސާތަކުން ތަޙްޤީޤްކޮށް، މިކަމުގައި އިޙްމާލްވާ ފަރާތްތަކާމެދު ފިޔަވަޅު އެޅުމަށްވެސް ކޮމިޓީގެ މެންބަރުން ގޮވާލެއްވިއެވެ.
ހައުސިންގ މަޝްރޫޢުތަކެއް ހިންގުމަށް ދައުލަތުން ނޫމަޑިއާއެކު ވެފައިވާއެއްބަސްވުން އުވާލި މައްސަލައިގައި ނޫމަޑިން، އާބިޓްރޭޝަނަށް ހުށަހެޅީ 155 މިލިއަން ޑޮލަރު ނުވަތަ 2.3 ބިލިއަން ރުފިޔާ އަދި އާބިޓްރޭޝަނާ ގުޅޭ އެހެން ޚަރަދުތައް ހޯދުމަށެވެ. ނޫމަޑިއާއެކު ކުރީގެ ރައީސް މުޙައްމަދު ވަހީދުގެ ސަރުކާރާއި ކުރީގެ ރައީސް ނަޝީދުގެ ސަރުކާރުގައި ހައުސިން ޔުނިޓްތަކެއް އެކިރަށްރަށުގައި އެޅުމަށް ހެދި އެއްބަސްވުން ބާޠިލްކުރުމުން ސަރުކާރުން ވަނީ ކޯޓުން ބޭރުން އެ މައްސަލަ ހައްލުކޮށް ނޫމަޑިއަށް 55 މިލިއަން ޑޮލަރުގެ ބަދަލެއް ދިނުމަށް ޙުކުމްކޮށްފައެވެ.
މިމައްސަލައާ ގުޅިގެން ކުރީގެ ހައުސިންގ މިނިސްޓަރ ޑރ. މުޙައްމަދު މުޢިއްޒު ކޮމިޓީއަށް ޙާޒިރުކޮށްފައިވާއިރު އެ ކޮމިޓީއަށް އޭނާ ދޮގު މަޢުލޫމާތު ދީފައިވާކަމަށްވެސް ގިނަ މެންބަރުން ވަނީ ތުހުމަތުކޮށްފައެވެ.