ކުރީގެ ރައީސް އަބްދުﷲ ޔާމީންގެ މައްޗަށް ކްރިމިނަލް ކޯޓުން އިއްވާފައިވާ ޙުކުމް ހައިކޯޓަށް އިސްތިއުނާފަށް ހުށަހަޅައިފިއެވެ.
ޕީޕީއެމް-ޕީއެންސީ ކޯލިޝަނުން މިއަދު ބޭއްވި ޕްރެސް ކޮންފަރެންސެއްގައި ޕީއެންސީގެ ލީޑަރު އަބްދުއްރަހީމް އަބްދުﷲ ވިދާޅުވީ، މަނީ ލޯންޑަރިންގެ ކުށް ސާބިތުވުމާ ގުޅިގެން ރައީސް ޔާމީން 5 އަހަރަށް ޖަލަށްލުމާއެކު 5 މިލިއަން ޑޮލަރުން ޖޫރިމަނާކުރުމަށް ކުރި ޙުކުމް ރައީސް ޔާމީންގެ ޤާނޫނީ ވަކީލުންގެ ފަރާތުން ހައިކޯޓުގައި އިސްތިއުނާފްކޮށްފައިވާކަމަށެވެ. އަދި ހައިކޯޓަށް ހުށަހެޅި މައްސަލައިގައި ރައީސް ޔާމީންގެ މައްޗަށް އިއްވާފައިވާ ޙުކުމް ތަންފީޒުކުރުން ފަސްކޮށްދިނުމަށާއި އެމަނިކުފާނު ކަފާލާތުގެ ދަށުން ދޫކޮށްދިނުމަށްވެސް އެދިފައިވާކަމަށް އަބްދުއްރަހީމް ވިދާޅުވިއެވެ.
ރައީސް ޔާމީންގެ މައްޗަށް އިއްވި ހުކުމް އިސްތިއުނާފަށް ހުށަހަޅާފައިވާއިރު، އެމަނިކުފާނު މިހާރު ހުންނެވީ މާފުށި ޖަލުގައެވެ. ބުރާސްފަތިދުވަހު އިއްވި ޙުކުމާއެކު އެމަނިކުފާނު މާލޭ ޖަލުގައި ބެެހެއްޓުމަށްފަހު މާފުށި ޖަލަށް ބަދަލުކޮށްފައިވަނީ މިއަދުގެ ވަގުތެއްގައެވެ.