ކިތަންމެ މޮޅަށް ކުޅުނަސް، ނޭޕާލްގެ މޫސުމަށް ނުހޭނޭނަމަ މެޗް ކާމިޔާބުކުރަން އުދަގޫވާނެކަމަށް ގައުމީ ބާސްކެޓް ޓީމްގެ ކެޕްޓަން މުހައްމަދު ޒިލާލް ބުނެފިއެވެ.
ޤައުމީ ބާސްކެޓް ޓީމް މިހާރު ތައްޔާރުވަމުންދަނީ މިއަންނަ މަހުގައި ނޭޕާލްގައި ފަށާ ސައުތް އޭޝިއަން ގޭމްސްއަށެވެ. މުބާރާތައް ތައްޔާރުވުމަށް މިހާރު ޤައުމީ ދަނީ ޗައިނާގައި ކޭންޕް ކުރަމުންނެވެ.
ޗައިނާގެ ކޭންޕްއާއި ބެހޭގޮތުން ވާހަކަދައްކަމުން ކެޕްޓަން މުހައްމަދު ޒިލާލް ބުނީ ރާއްޖޭގެ ޓީމްތަކަށް އަބަދުވެސް އެންމެ ބޮޑަށް ދިމާވާ މަސައްލައަކީ ފިނީގެ މައްސަލަކަމަށެވެ. ރާއްޖެއަކީ ހޫނު ގައުމްއަކަށްވެފަ، ހޫނުގައި ކުޅެން ކުޅުންތެރިން ހުންނަނީ އާދަވެފައިކަމަށް ޒިލާލް ބުންޏެވެ. އާންމުކޮށް މުބާރާތް ކުޅޭ ޤައުމްތަކަކީ ފިނި ޤައުމްތަކަށްވެފައި، ރާއްޖޭގެ ކުޅުންތެރިން ފިންޏަށް ހޭނެން އުދަގޫވާކަން ޒިލާލް ފާހަގަކުރިއެވެ.
ޤައުމީ އަންހެން އަދި ފިރިހެން ބާސްކެޓް ޓީމް މިހާރު ޗައިނާގައި ކޭންޕް ކުރަމުންދާއިރު، ޓީމު ކޭމްޕްކޮށްފައިވަނީ ޗައިނާގެ ފިނި ސަރަހައްދެއްގައެވެ. ނޭޕާލްއަށް ވުރެއް ފިނި ޤައުމްއެއްގައި ކޭންޕްކުރުމުގެ މުހިންމުކަމުގެ މައްޗަށް ވާހަކަދައްކަމުން ޤައުމީ ކެޕްޓަން ޒިލާލް ބުނީ ޗައިނާގެ މިކޭންޕްގެ ސަބަބުން ފިންޏަށް ކުޅުންތެރިން ހޭނެން ވަރަށް ފަސޭހަވާނެކަމަށާއި ފިނީގައި ކުޅެންވެސް ކުޅުންތެރިންނަށް ހޭނެން ފުރުސަތު ލިބިގެންދާނެކަމަށެވެ.
ސައުތް އޭޝިއަން ގޭމްސްގައި މެޑަލްއަކަށް އަމާޒް ހިފައިގެން މަސައްކަތްކުރާއިރު، ޗައިނާ ކޭންޕްވެގެންދާނީ އެންމެ ފަހުގެ ތައްޔާރީތަށްކަމަށާއި މި ދަތުރަކީ ޓީމުގައި ރަނގަޅު ކުރަން ހުރި ކުދިކުދި މިސްޓޭކްތަށް ރަނގަޅު ކުރަން ލިބޭ އެންމެ ފަހު ފުރުސަތުކަމަށްވެސް ޒިލާލް ބުންޏެވެ.
“ މިހާރު ކުރިއަށްދަނީ އެންމެ ފަހު ތައްޔާރީތަށް. ކޯޗް މަސައްކަތް ކުރަނީ މިހާރު ސައުތް އޭޝިއަން ގޭމްސްއަށް ދާންވާއިރަށް، ޓީމްގައި ހުރި ކަންތަށްތަށް ރަގަނޅު ކުރުމަށް. މިކޭންޕްގެ ސަބަބުންވެސް ވަރަށް ގިނަ ކަންތަށްތަކެއް ކުޅުންތެރިންނަށް ދަސްވެގެންދާނެ. މިހާރު ކޭންޕް ކުރަމުން މިދަނީ ނޭޕާލްއަށް ވުރެއް ފިނީގަ، ނޭޕާލްއަށް ވުރެއް އުހުގަ. މި 10 ދުވަހުގެ ތަމްރީންތަކުން އަޅުގަނޑު އެންމެ ބޮޑަށް ގަބޫލް ކުރަނީ ބާސްކެޓް ޓީމްއަށް ފިނީގެ މައްސަލައެއް ދިމާ ނުވާނެކަމަށާއި ފިންޏަށް ކުޅުންތެރިން ތިބީނީ ހޭނިފަކަމަށް. އަދި ފިނިވުމުން ރާއްޖޭގެ ކުޅުންތެރިންނަށްވާ އުދަގޫތަށްވެސް ވަރަށް ބޮޑަށް ކުޑަވާނެކަމަށް ގަބޫލް ކުރެވޭ. ދެން މިހާރު ހުރިހާ ކުޅުންތެރިންވެސް ފަރިތަކުރަމުންދަނީ ސައުތް އޭޝިއަން ގޭމްސްގައި މެޑަލްއެއް ހޯދުމުގެ އަޒުމްއާއެކު.” ކެޕްޓަން ޒިލާލް ބުންނެވެ.
ޒިލާލް ބުނީ ނިމިގެންދިޔަ އިންޑިއަން އޯޝަން ގޭމްސް އާއި ސިންޕަރޫޕް ތަމްރީން ދަތުރުގައި ހެދުނު ގޯސްތަތަށް ރަނގަޅުކޮށް އެންމެ ފުރިހަމަ ޓީމްއެއް ނޭޕާލްއަށް ދިއުމަކީ ވަރަށް މުހިންމުކަމެއްކަމަށެއެވެ. އަދި ފިޒިކަލީގެ އިތުރުން މެންޓަލީވެސް ކުޅުންތެރިން ވަރަށް ވަރުގަދަވާންޖެހޭނެކަމަށް ޤައުމީ ފިރިހެން ބާސްކެޓް ޓީމްގެ ކެޕްޓަން މުހައްމަދު ޒިލާލް ބުންޏެވެ.