ކުޅިވަރުގެ ކުރިއެރުމާއި ތަރައްޤީއަށް މިއަހަރުގެ މިހާތަނަށް 55 މިލިއަން ރުފިޔާ ޚަރަދުކޮށްފިން: މަހުލޫފް
ކުޅިވަރުގެ ކުރިއެރުމާއި ތަރައްޤީއަށް މިއަހަރު މިހާތަނަށް ގާތްގަނޑަކަށް 55 މިލިއަން ރުފިޔާ ޚަރަދުކުރެވިފައިވާކަމަށް ޔޫތް މިނިސްޓަރ އަޙުމަދު މަޙުލޫފު ވިދާޅުވެއްޖެއެވެ.
އެމްއޯސީގެ އަހަރީ އާންމު ޖަލްސާ ޝަރަފްވެރިކޮށްދެއްވާ މިނިސްޓަރ ވިދާޅުވީ 2018ވަނަ އަހަރަކީ ހުރިހާ ގޮތަކުންވެސް ކުޅިވަރަށް ވަރަށް ކާމިޔާބު އަހަރެއްކަމަށެވެ. އެގޮތުން މިއަހަރު އެކަނިވެސް އެކި ކުޅިވަރުތަކުން ހޯދި މެޑަލްތަކާއި ކުރިއެރުމަށް ބަލާއިރު، ކުޅިވަރު ކުރިއެރުވުމަށް ބޮޑު ހިތްވަރެއް ލިބިއްޖެކަމަށް މިނިސްޓަރ މަހުލޫފް ވިދާޅުވިއެވެ. ވިދާޅުވި. މިނިސްޓަރ ވިދާޅުވީ މިއަހަރު މިހާތަނަށް ކުޅިވަރުގެ އެކި އެކި ކަންކަމަށް އެސޯސިއޭޝަންތަކަށް 55 މިލިއަން ރުފިޔާ ޚަރަދުކުރެވިފައިވާކަމަށެވެ.
އަދި މިއަހަރު ދެ ފަހަރެއްގެ މަތިން ފިނޭންސް މިނިސްޓްރީއަށް އިތުރަށް ފައިސާ ހޯދަން ރިކުއެސްޓް ކުރެވުނުކަމަށާއި، ކުޅިވަރުގެ ކުރިއެރުމަށް ހޭދަ ކުރައްވަން މި ސަރުކާރުން ފަސް ނުޖެހޭނެކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ ކުޅިވަރުތަކުން ނެރޭ ނަތީޖާ ރަނގަޅުކުރުމަށް ކުރާ މަސައްކަތްތައް އުފަލާއިއެކު ބަލައިގަންނަކަމަށާއި، ސަރުކާރުންވެސް އަދި މިނިސްޓްރީންވެސް ފުރިހަމަ އެއްބާރުލުން ހުރިހާ އެސޯސިއޭޝަންތަކަކަށް ލިބޭނެކަމަށެވެ.