ހުރިހާ ގޮތަކުންވެސް މޮޅަށް ކުޅުނީ ދިވެހިރާއްޖޭގެ ކުޅުންތެރިންކަމަށާއި، މެލޭޝީޔާ އަތުން ދިވެހި ޓީމް މޮޅުވުން ހައްގުކަމަށް ޤައުމީ ފުޓްބޯޅަ ޓީމްގެ ކޯޗު ޕީޓަރ ސެގާޓް ބުނެފިއެވެ.
ވަރލްޑް ކަޕް ކޮލިފައިން އަދި އޭޝިއަން ކަޕްގެ ކޮލިފައިންގައި ފިލިޕީންސްއާއި ގުއާމްއާއި ދެކޮޅަށް ކުޅޭ މެޗަށް ދިވެހި ޓީމް ތައްޔާރުވަމުން އަންނަނީ މެލޭޝިޔާގައެވެ. މެލޭޝިޔާގައި ކުރަމުން އަންނަ ތަމްރިންތަކުގެ ތެރެއިން އެޤައުމުގެ ޤައުމީ ޓީމާއެކު ކުޅުނު މެޗުން ދިވެހި ޓީމް ބަލިވީ ދޭއް އެކަކުންނެވެ.
މި މެޗަށްފަހު ޤައުމީ ޓީމްގެ ކޯޗު ޕީޓަރ ސެގާޓް ބުނީ މެޗުގައި ގިނަ ހަމަލާ އުފައްދައި މުޅި މެޗު ކޮންޓްރޯލްކުރީވެސް ދިވެހި ޓީމުންކަމަށާއި، މޮޅުވުން ހައްގީވެސް ދިވެހި ޓީމްކަމަށެވެ. ހުސް ފުރުސަތުތަކެއް ދިވެހި ޓީމުން ތަނަވަސްކުރިއިރު، ރާއްޖެއަށް އިތުރު ގޯލްތަކެއް ނުޖެހުނީ މެލޭޝިޔާގެ ކީޕަރުވެސް މޮޅުވުމުންކަމަށްވެސް އޭނާ ބުންޏެވެ.
ކޯޗު ސެގާޓް ބުނީ މި މެޗުގެ ނަތީޖާއާއިމެދު ނުވިސްނާކަމަށާއި، ބޭނުންވީ މިވަރުގެ ޓީމަކާއި ދެކޮޅަށް ރާއްޖޭގެ ޒުވާން ކުޅުންތެރިން ނެރެ އެ ކުޅުންތެރިންނަށް ހިތްވަރުދޭންކަމަށެވެ. އޭނާ ބުނީ ބޭނުންވި ކަންތައް ވަރަށް ރަނގަޅަށް ހާސިލްކުރެވިއްޖެކަމަށާއި، މެޗުގައި ސީނިއަރ ކުޅުންތެރިންނަށްވުރެ ޒުވާން ކުޅުންތެރިން މޮޅަށް ކުޅުނުކަމަށެވެ.
ޤައުމީ ކޯޗު ސެގާޓްވަނީ މި މެޗުގައި ޓީމްގެ ސްކޮޑުގައި ހިމެނޭ 25 ކުޅުންތެެރިންނަށްވެސް ފުރުސަތުދީފައެވެ. އޭނާ ބުނީ މިކަހަލަ މެޗެއްގައި ހުރިހާ ކުޅުންތެރިންނަށް ފުރުސަތު ދެވުމުންވެސް އުފާވާކަމަށައި، ޓީމެއް ކުރިއަރާނީވެސް ހުރިހާ ކުޅުންތެރިންނަށް ހަމަހަމަ ފުރުސަތުދީ އެ ކުޅުންތެރިންގެ ހިތްވަރުވެސް އާކޮށްގެންކަމަށެވެ.
"އަހަރެން ވަރަށް އުފާވެފައި މިހިރީ. 25 ކުޅުންތެރިންވެސް މެޗުގައި ކުޅުނު. އަނެއްކޮޅުން އަހަރުމެން މެޗު ކޮންޓްރޯލްކުރީ، ގިނަ ހަމަލާ އުފެއްދީވެސް. މެލޭޝިޔާ އަތުން ދިވެހި ޓީމް މޮޅުވުން ހައްގު. ވަރަށް މޮޅަށް ކުޅެފި އެންމެންވެސް، ހާއްސަކޮށް ޒުވާން ކުދިން ދެއްކި ހިތްވަރަށް ހަމަ ސާބަސް"