އިސްލާމް ދީނާއި ކީރިތި ރަސޫލާއަށް ފުރައްސާރަކޮށް، މޯލްޑިވިއަން ޑިމޮކްރަސީ ނެޓްވަރކުން ނެރުނު ރިޕޯޓުގެ ތަހުޤީގަށް އެ ޖަމްޢިއްޔާގެ މުޞައްނިފުންގެ ތެރޭގައި ހިމެނޭ ޢަޛްރާ ނަސީމަށް ހާޒިރު ނުވެވޭނެކަން ފުލުހުންނަށް އަންގައިފިއެވެ.
ފުލުހުން ވިދާޅުވީ އެމްޑީއެންގެ ރިޕޯޓުގެ ތަޙްޤީޤަށް ފުލުސް އޮފީހަށް ހާޒިރުވާން އެންގުމުން، ސަލާމަތީ ސަބަބުތަކަށްޓަކައި ރައްކާތެރި މާހައުލެއް ލިބޭނެކަމުގެ ޔަޤީންކަން ނެތުމުން ރާއްޖެ އައުމަށް އުޒުރުވެރިވާކަމަށް އަޛްރާ ބުނެފައިވާކަމަށެވެ.
އިސްލާމް ދީނަށާއި ކީރިތި ރަސޫލާއަށް ފުރައްސާރަކޮށް ނެރުނު ރިޕޯޓާ ގުޅިގެން ފުލުހުން ކުރަމުންދާ ތަޙްޤީޤަށް ފުލުސް އޮފީހަށް ހާޒިރުވުމަށް ޝަހިންދާ އިސްމާޢީލްއަށްވެސް ވަނީ ޗިޓް ފޮނުވާފައެވެ. ނަމަވެސް އަދި އޭނާ ވަކި ޖަވާބެއް ދީފައި ނުވާކަމަށް ފުލުހުން ވިދާޅުވެއެވެ. އޭނާއަށް ފުލުސް އޮފީހަށް ހާޒިރު ވުމަށް ދީފައިވާ ޗިޓުގެ މުއްދަތު އަދި ހަމަ ނުވާކަމަށް ފުލުހުން ވިދާޅުވެއެވެ.
މޯލްޑިވިއަން ޑިމޮކްރަސީ ނެޓްވޯކް (އެމްޑީއެން)އިން ނެރުނު ރިޕޯޓުގައި އިސްލާމް ދީނަށް ތަހުހީނުކުރުމުގެ ގޮތުން ފާޑުކިޔާ ކީރިތި ރަސޫލާއަށް ފުރައްސާރަކޮށްފައިވާކަމަށް ފުލުހުންގެ ތަހުޤީގަށް ހާމަވެފައިވާކަން ފުލުހުންގެ އިދާރާއިން ވަނީ ވިދާޅުވެފައެވެ. ފުލުހުން ވިދާޅުވެފައިވަނީ އެ އިދާރާއިން ކުރި ތަހުޤީގަށް އެމްޑީއެން ރިޕޯޓްގައި އިސްލާމު ދީނާއި ކީރިތި ރަސޫލާއަށް ފުރައްސާރަކޮށްފައިވާކަން ފާހަގަވުމުން އެކަން ޖަމްޢިއްޔާތަކުގެ ބެލެނިވެރިފަރާތްކަމުގައިވާ ޔޫތް މިނިސްޓްރީއަށް އަންގާފައިވާކަމަށެވެ. ބެލެވޭ ގޮތުން ފުލުހުން މިގޮތަށް ހާމަކޮށްފައި މިވަނީ ދީނީ އިލްމުވެރިން މެދުވެރިކޮށް މި ރިޕޯޓް ދިރާސާކުރުމަށްފަހުއެވެ.
އެމްޑީއެންގެ ރިޕޯޓުގެ މައްސަލަ ފުލުހުން ބަލަން ފަށާފައިވަނީ 3 އޮކްޓޫބަރުގައެވެ. އަދި އެ މައްސަލަ ބަލާ ނިމެންދެން ޔޫތް މިނިސްޓްރީންވަނީ އެމްއެންޑީއެން ސަސްޕެންޑްކޮށްފައެވެ.