އިންޑިއާގެ ބަޖެޓް އެއަރލައިން އިންޑިގޯއިން 300 އެއަރބަސް ގަތުމަށް އޯޑަރުދީފިއެވެ. މިއީ 33 ބިލިއަން ޑޮލަރުގެ އަގުބޮޑު އިންވެސްޓްމަންޓެކެވެ. މިއީ މިހާތަނަށް އެ އެއަރލައިނުން ކުރި އެންމެ ބޮޑު އޯޑަރުވެސްމެއެވެ.
އިންޑިގޯއިން އޯޑަރުކޮށްފައިވަނީ އެއަރބަސްގެ އެންމެ ފަހުގެ ޖެޓްތަކާއި، އޭ321 އެކްސްއެލްއާރު މަރުކާގެ ބޯޓުތަކަށެވެ. މި ބޯޓުތަކާއިއެކު އެ އެއަރލައިންގެ ބޯޓުތަކުގެ އަދަދު 730 އަށްއަރާނެއެވެ.
އިންޑިގޯއިން ބުނީ މިއީ އެ ކުންފުންޏަށް ޙާސިލްވެގެންދާ ވަރަށް ބޮޑު ކާމިޔާބީއެއްކަމަށެވެ. އައު އެއަރކްރާފްޓްތައް ގަތުމުގެ ސަބަބުން އިންޑިއާގައި އެ ކުންފުނިން ވަރުގަދަކުރަން ބޭނުންވާ ވައިގެ އުދުހުންތަކަށް އިތުރު މަގެއް ފަހިވެގެންދާނެކަމަށް އެ ކުންފުނިން ބުނެއެވެ.
އިންޑިގޯ އިން މިދިޔަ އަހަރުގެ ނޮވެމްބަރ މަހުގެ ތެރޭގައި ވަނީ ރާއްޖެއަށްވެސް ދަތުރުތައް ފަށާފައެވެ. ދިވެހިރާއްޖެއަކީ އިންޑިގޯއިން ބައިނަލްއަޤްވާމީ ދަތުރުތައް ފެށި 13ވަނަ ޤައުމެވެ. އިންޑިގޯއިން އިންޑިއާގެ ތިން ސަރަހައްދަކުން ރާއްޖެއަށް ދަތުރުކުރެއެވެ. އޭގެ ތެރޭގައި ކޮޗިން މުމްބާއީ، އަދި ބެންގަލޫރު ހިމެނެއެވެ.