ފަސް ރަށެއްގެ ފުޓްބޯޅަ ދަނޑުގެ ސަބްބޭސްގެ މަސައްކަތް ކުރުމަށް ބަޔަކާއި ހަވާލުކޮށްފިއެވެ.
މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓްގައި މިއަދު ބޭއްވި ރަސްމީއްޔާތެއްގައި ހދ. ކުޅުދުއްފުށި، ނެއްލައިދޫ، ހަނިމާދޫ، ނޮޅިވަރަމުގެ އިތުރުން ނ. ކުޑަފަރީގެ ފުޓުބޯޅަ ދަނޑުގެ ސަބްބޭސްގެ މަސައްކަތް ކުރުމަށް ވަނީ ހަވާލުކޮށްފައެވެ.
މި މަސައްކަތް ދެކުންފުންޏަކާއި ހަވާލުކުރިއިރު، ހދ ކުޅުދުއްފުށި، ނޮޅިވަރަމް އަދި ހަނިމާދުގެ ސަބްބޭސް ހެދުމުގެ މަސައްކަތް 1.344 މިލިއަން ރުފިޔާއަށް އާރްކޭއެލްއާއި ހަވާލު ކުރިއިރު، ހދ. ނެއްލައިދޫ ފުޓުބޯޅަ ދަނޑުގެ ސަބްބޭސް ހެދުމުގެ މަސައްކަތް 1.190 މިލިއަން ރުފިޔާއަށް ފްލެކްސް އިންކް ޕްރައިވެޓް ލިމިޓެޑްއާއި ވަނީ ހަވާލުކޮށްފައެވެ. އަދި ނ. ކުޑަފަރީ ދަނޑުގެ ސަބްބޭސް ހެދުމުގެ މަސައްކަތް 1.152 މިލިއަން ރުފިއާއަށް ހަވާލުކޮފައިވަނީވެސް ހަމަ އެ ކުންފުންޏާއެވެ.
މި އެއްބަސްވުންތަކުގައި މިނިސްޓްރީގެ ފަރާތުން ސޮއި ކުރެއްވީ އަސްހަދު އަލީއެވެ. އާރްކޭއެލްގެ ފަރާތުން އެ ކުންފުނީގެ މެނޭޖިން ޑިރެކްޓަރު ހުޒައިމާ އާސިރު ސޮއި ކުރިއިރު، ފްލެކްސް އިންކް ކޮމްޕެނީގެ ފަރާތުން ސޮއިކުރީ އެ ކުންފުނީގެ މެނޭޖިން ޑިރެކްޓަރު ނަޖާހު ޝަރީފްއެވެ. މި ދެކުންފުންޏާއި ސަބްބޭސް ހެދުމުގެ މަސައްކަތް ހަވާލުކުރީ، ހަވާލު ކުރާތާ 14 ދުވަހުގެ ތެރޭގައި މަސައްކަތްފަށައި، 30 ދުވަހުގެ ތެރޭގައި މަސައްކަތް ނިންމުމަށެވެ.
މި ދަނޑުތަކާއެކު މިއަހަރުގެ މިހާތަނަށް ޖުމްލަ 19 ދަނޑުގެ ސަބްބޭސް ހެދުމުގެ މަސައްކަތް ކުންފުނިތަކާ ވަނީ ހަވާލު ކޮށްފައެވެ. ދަނޑުތަކުގެ ސަބް ބޭސްގެ މަސައްކަތް ނިމުނުހައި އަވަހަކަށް ދަނޑުތަކުގައި ޓާފް އެޅުމުގެ މަސައްކަތް ފެށޭނެ ކަމަށް މިނިސްޓްރީން މަޢުލޫމާތުދެއެވެ.