ވިލާތުގެ އިއްތިޙާދުން އިނގިރޭސިވިލާތް ވަކިވުމުގެ ކަންތައް މިއަންނަ ޖެނުއަރީ މަހުގެ 31އަށް ފަސްކުރަނ ނިންމިއަސް އެ ތާރީޚުގެ ކުރިންވެސް އިނގިރޭސިވިލާތަށް ވަކިވެވިދާނެކަމަށް ބްރަސަލްސްއިން ބުނެފިއެވެ. އެހެންނަމަވެސް އެކަން ކުރެވޭނީ ވިލާތުގެ އިއްތިޙާދުގައި ހިމެނޭ 27 ޤައުމު އެގޮތަށް އެއްބަސްވުމާއެކު އިނގިރޭސި ޕާލިމެންޓްގެ ރުހުން އެކަމަށްލިބޭ އެއްބަސްވުމެއް ޤާއިމުކުރެވިގެންކަމަށް އެފަރާތުންވަނީ ބުނެފައެވެ.
އިނގިރޭސި ބޮޑުވަޒީރު ބޮރިސް ޖޮންސަން މިހާރުވަނީ ވިލާތުގެ އިއްތިޙާދުން އިނގިރޭސިވިލާތް ވަކިވުން 2020ވަނަ އަހަރުގެ ޖެނުއަރީ މަހަށް ފަސްކޮށްދެއްވުމަށް ދަންނަވާފައެވެ. ބޮޑުވަޒީރު ޖޮންސަން އެގޮތަށް ދެންނެވީ އިނގިރޭސި ޕާލިމެންޓް ހައުސް އޮފް ކޮމަންސްއިން ބްރެކްސިޓްގެ އެއްބަސްވުން ފާސްކޮށްނުދިނުމުންނެވެ.
ވިލާތުގެ އިއްތިޙާދުން އިނގިރޭސިވިލާތް ވަކިވުމުގެ ކަންކަން ފަސްކުރުމަށް އެ ޖަމުޢިއްޔާގެ މެންބަރު ޤައުމުތަކުގެ އެމްބެސެޑަރުން ބާއްވަން ހަމަޖެހިފައިވާ ބައްދަލުވުން ބޭއްވުމުގެ ވަގުތު ކުޑަތަންވެފައިވަނިކޮށް ބައެއް ޑިޕްލޮމެޓުން ވިދާޅުވެފައިވަނީ 31 އޮކްޓޫބަރުން ފެށިގެން ތިންމަސްދުވަސް ހަމަނުވިއަސް އިނގިރޭސިވިލާތުން ބޭނުންނަމަ ވިލާތުގެ އިއްތިޙާދުން ވަކިވެވިދާނެކަމަށެވެ.
ނަމަވެސް އެގޮތަށް ވަކިވެވޭނީ އިނގިރޭސި ޕާލިމެންޓުން ބްރެކްސިޓްގެ އެއްބަސްވުން ފާސްކުރެވުމުންކަމަށް ޑިޕްލޮމެޓުންވަނީ ވިދާޅުވެފައެވެ.