އެމެރިކާއިން ހިންގި އަސްކަރީ ޙަމަލާއެއްގައި އައިއެސްގެ ލީޑަރު އަބޫބަކުރު އަލްބަޣްދާދީ މަރާލެވުނުކަމުގައި ވިޔަސް އައިއެސް ހަނގުރާމަވެރިންގެ ނުރައްކާ އެބައޮތްކަމަށް މުޙައްލިލުން ބުނެފިއެވެ. ބަޣްދާދީ ހިންގަމުންދިޔަ އައިއެސް ޖަމާޢަތަކީ އެއްދުވަސްވަރެއްގައި ޢިރާޤާއި ސޫރިޔާގެ ބޮޑު ސަރަޙައްދެއް ކޮންޓްރޯލުކުރަމުންދިޔަ ބަޔަކަށް ވުމާއެކު އެމީހުންގެ ހަރުކަށި ފިކުރު އަދިވެސް ދެމިއޮތުމުން އެކަމުގެ ނުރައްކާ ފިލައިގެން ނުދާކަމަށް ދިރާސާކުރާ ފަރާތްތަކުން ބުނެއެވެ.
އައިއެސްއަކީ އެކި ޤައުމުތަކުގެ ސިފައިންނާ ކުރިމަތިލަމުންދިޔަ ބަޔަކަށް ވުމާއެކު މިފަހަކަށް އައިސް އެމީހުންވަނީ ގެރިއްލާ ޙަމަލާތައް ދޭން ފަށާފައެވެ. ކިތަންމެ ޙާލަތެއްގައި ޖާނުގޮއްވާލައި އަމިއްލައަށް މަރުވެގެންވެސް އައިއެސްއިންވަނީ ޙަމަލާތައް ދީފައެވެ. މިގޮތުން ދެވިފައި ބައެއް ޙަމަލާތަކުގެ ޒިންމާ އެމީހުންވަނީ އުފުލާފައެވެ.
އެގޮތުން މިއަހަރުގެ އޭޕްރީލްމަހު ސްރީލަންކާގައި ދެވުނު ހަމަލާތަކުގައި 250އަށްވުރެ ގިނަ މީހުން މަރުވެ އެތައްސަތޭކަ ބަޔަކު ޒަޚަމްވެގެންދިޔަ ހާދިސާގެ ޒިންމާވެސް އައިއެސްގެ ފަރާތުންވަނީ އުފުލާފައެވެ. އަދި އަފްޣާނިސްތާނުގައާއި މެދުއިރުމަތީގެ ޤައުމުތަކުގައި އެތިތަންތަނަށް ޢަމާޒުކޮށް ދެވޭ ޙަމަލާތަކުގައި އެކަންކުރީ ކޮންބައެއްކަން ސާބިތުކޮށްނުދެވޭ ކިތަންމެ ޙަމަލާތަކެއްވެސް ހިންގަނީ އައިއެސްގެ ފަރާތުންކަމަށްވަނީ ބެލެވިފައެވެ.
މީގެ އިތުރުން، ޢިރާޤާއި ސޫރިޔާގައި އައިއެސްގެ ފަރާތުން ޤާއިމުކޮށްގެން އުޅުނު ވެރިކަން ރޫޅި، އެމީހުން ވިއްސިވިހާލިވެގެން ދިއުމަށްފަހުވެސް ތަފާތު ޙަމަލާތަށް ދީފައިވާތީ އެ ޖަމާޢަތުގެ ނުރައްކާ ކުޑަވެގެން ގޮސްފައިނުވާކަމަށް ކިތަންމެ ފަރާތަކުންވަނީ ބުނެފައެވެ. މިފަހަކަށް އައިސް ޢިރާޤުގެ ސަލާމަތީ ބާރުތަކާއި ފިލައިގެން ތިބެ ޙަމަލާތައްދޭ އައިއެސްގެ ގުރޫޕްތަކާ ދެމެދުވަނީ ކުރިމަތިލުންތަކެއް ހިނގާފައެވެ.