ސީރިޔަން ޑިމޮކްރަޓިކް ފޯސަސް (އެސްޑީއެފް)އަށް ނިސްބަތްވާ ކުރުދީ ހަނގުރާމަވެރިން ތުރުކީވިލާތުގެ ބޯޑަރާ 30 ކިލޯމީޓަރު ފަހަތަށް ޖެހެން ނިންމައި އެގޮތަށް ޢަމަލުކުރަމުންދާކަމަށް އެފަރާތުން ބުނެފިއެވެ.
ކުރުދީ ހަނގުރާމަވެރިން އެގޮތަށް ނިންމައި ޢަމަލުކުރަމުންދާތީ ސޫރިޔާގެ ސަރުކާރުންވަނީ އެކަމަށް މަރުޙަބާ ކިޔާފައެވެ. ސޫރިޔާ ސަރުކާރުން ބުނެފައިވަނީ ކުރުދީން އެގޮތަށް ޢަމަލުކުރަމުންދާތީ ތުރުކީވިލާތުން ފަށައިގެންއުޅޭ އަސްކަރީ ޙަރަކާތް ދެން ކުރިޔަށް ގެންގޮސްގެންނުވާނެކަމަށެވެ.
ތުރުކީވިލާތުންވަނީ އެސްޑީއެފްގައި ހިމެނޭ ކުރުދީންގެ ވައިޕީޖީ ހަނގުރާމަވެރިން އެ ޤައުމުގެ ސަރަޙައްދީ އިމުން ދުރަށް ޖެއްސުމަށް އޮކްޓޫބަރު މަހުގެ 9ވަނަ ދުވަހު އަސްކަރީ ޙަމަލާތަކެއް ސޫރިޔާގެ އުތުރުގައި ފަށާފައެވެ.
ތުރުކީވިލާތުގެ ރައީސް ރަޖަބް ޠައްޔިބު އުރުދުޣާންއާއި ރަޝިޔާގެ ރައީސް ވްލަޑިމިރު ޕުޓިން އޮކްޓޫބަރު މަހުގެ 22ވަނަ ދުވަހު ބައްދަލުކުރެއްވުމަށްފަހު އެއްބަސްވެވަޑައިގެންފައިވަނީ ސޫރިޔާގެ އުތުރުގައި ތިބި ކުރުދީ ހަނގުރާމަވެރިން ތުރުކީވިލާތުގެ ބޯޑަރުން ފެށިގެން 30 ކިލޯމީޓަރު ދުރަށްޖެއްސުމަށެވެ. މި އެއްބަސްވުމުގެ ދަށުން ސޫރިޔާގައި ތިބި ރަޝިޔާގެ ސިފައިން މިހާރު ގެންދަނީ އެ މަސައްކަތް ކުރަމުންނެވެ.
ތުރުކީވިލާތުން ބުނަމުންދަނީ އެމެރިކާގެ މަދަދު ލިބެމުންދިޔަ ކުރުދީންގެ އެސްޑީއެފްގައި ހިމެނޭ ވައިޕީޖީ ހަނގުރާމަވެރިންނަކީ ޓެރަރިސްޓުންކަމަށެވެ. އެމީހުން މަސައްކަތްކުރަމުންދަނީ ތުރުކީވިލާތުގެ އިރުދެކުނުގައި ވަކިވެގަތުމަށް މަސައްކަތްކުރާ ޕީކޭކޭ ޖަމަޢަތާ ގުޅިގެން ތުރުކީވިލާތް ބައިބައިކޮށްލުމަށްކަމަށްވެސް އެ ޤައުމުންވަނީ ތުޙުމަތުކޮށްފައެވެ.