އައިއެސްގެ ލީޑަރު އަބޫބަކުރު އަލްބަޣްދާދީ މަރާލެވިފައިވާކަމަށް އެމެރިކާގެ އޮފިޝަލުން ވިދާޅުވެއްޖެއެވެ. ރިޕޯޓުތައް ބުނާގޮތުގައި އައިއެސްގެ ލީޑަރު މަރާލާފައިވަނީ އެމެރިކާއިން އޭނާއަށް އަމާޒުކޮށް ސޫރިޔާގައި ހިންގި ޚާއްސަ އަސްކަރީ ޙަރަކާތެއްގައެވެ.
އެމެރިކާގެ އޮފިޝަލެއް އޭޕީއަށް މަޢުލޫމާތުދެއްވަމުން ވިދާޅުވީ އޭނާއަށް އަމާޒުކޮށް އޮޕަރޭޝަން ހިންގާފައިވަނީ ސޫރިޔާގެ އިދްލީބްގައިކަމަށެވެ. އަދި އެމެރިކާގެ އިތުރު އޮފިޝަލެއް ރޮއިޓަރސްއާ ވާހަކަދައްކަވަމުން ވިދާޅުވީ އަލްބަޣްދާދީއަށް އަމާޒުކޮށް ޙަމަލާތަކެއް ދީފައިވާކަމަށެވެ. އެހެންނަމަވެސް އެ ޙަމަލާތައް ކާމިޔާބުވިކަމެއް އޭނާ ހާމައެއް ނުކުރައްވައެވެ. މީގެ އިތުރުން، އެމެރިކާގެ ދިފާޢީ ވުޒާރާގެ އޮފިޝަލެއް ވިދާޅުވީ އަލްބަޣްދާދީ މަރާލެވިފައިވާކަން ޑީއެންއޭ ޓެސްޓްތަކަށްފަހު ކަށަވަރުކުރުމަށްފަހު އިޢުލާނު ކުރައްވާނެކަމަށެވެ.
މިކަމާ ގުޅޭ ގޮތުން އެމެރިކާގެ ރައީސް ޑޮނަލްޑް ޓްރަމްޕް ވައިޓްހައުސްގައި ބަޔާނެއްދެއްވާނެކަމަށް ވައިޓް ހައުސްގެ ތަރުޖަމާނު ހޯގަން ގިޑްލީ ވިދާޅުވިއެވެ.
އަލްބަޣްދާދީ މަރާލެވިއްޖެނަމަ، އައިއެސްގެ ޙަރަކާތްތަކަށް ބޮޑެތި ގޮންޖެހުންތަކެއް ކުރިމަތިވެ، އެ ޖަމާޢަތް ވަރަށް ބޮޑަށް ބަލިކަށިވެގެންދާނެކަމަށް ތަޖުރިބާކާރުން ވިދާޅުވެއެވެ.