ސޫރިޔާގެ އުތުރުން ތުރުކީވިލާތުގެ ބޯޑަރުކައިރީ އޮންނަ ރަށެއްކަމަށްވާ ތަލްއަބްޔަޟްގައި ތުރުކީ ސިފައިން ސަލާމަތީ ކަންކަން ބަލަހައްޓަން ފަށައިފިއެވެ.
ތުރުކީވިލާތުގެ ސިފައިން ސޫރިޔާގެ އުތުރުގައި ޙަރަކާތްރެރިވާން މިފެށީ ރަޝިޔާއާއެކު އެ ޤައުމުން ވެފައިވާ އެއްބަސްވުމަކަށްފަހުއެވެ. ރަޝިޔާއާއި ތުރުކީވިލާތުން އެއްބަސްވެފައިވަނީ ކުރުދީންގެ ވައިޕީޖީ ހަނގުރާމަވެރިން ތުރުކީ ބޯޑަރުން ފެށިގެން 30 ކިލޯމީޓަރު ފަހަތަށްޖެއްސުމަށެވެ. މިހެންކަމުން ރަޝިޔާއިން މިހާރުވަނީ ކުރުދީންނަށް ފަހަތަށްޖެހުމަށް އިންޒާރުދީފައެވެ.
ކުރުދީ ހަނގުރާމަވެރިން ތުރުކީވިލާތުން ބޭނުންވާ ހިސާބަށް ފަހަތަށްޖައްސައިގެން އެ ޤައުމުން ބޭނުންވަނީ ސޫރިޔާގެ ތިން މިލިޔަނެއްހާ ރެފިއުޖީން އެ ސަރަޙައްދުގައި ވަޒަންވެރިކުރުވާށެވެ. ތުރުކީވިލާތުން ބޭނުންވާގޮތަށް ކުރުދީން ޢަމަލުކޮށްފިނަމަ އެކަން ވެގެންދާނީ ރައީސް ރަޖަބް ޠައްޔިބު އުރުދުޣާންއަށް ލިބިވަޑައިގަންނަވާ ބޮޑު ކާމިޔާބަކަށެވެ.
ރަޝިޔާއިން ކުރުދީންނަށް އިންޒާރުދެމުން ބުނެފައިވަނީ ކުރުދީން އެގޮތަށް ޢަމަލުނުކޮށްފިނަމަ އިތުރު އަސްކަރީ ޙަރަކާތްތައް ސޫރިޔާގެ އުތުރުގައި ފަށާނެކަމަށެވެ.
އޮކްޓޫބަރު މަހުގެ 9ވަނަ ދުވަހު ތުރުކީވިލާތުން ފެށި އޮޕަރޭޝަން ޕީސް ސްޕްރިންގް ކިޔުނު އަސްކަރީ ޙަރަކާތަކީ ކުރުދީ ހަނގުރާމަވެރިންގެ ފަރާތުން އެ ޤައުމަށް އަތުވެދާނެ ނުރައްކާ ނައްތާލުމަށްކަމަށް ބުނެ، ފެށި ޙަމަލާތަކެކެވެ.