ވިލާތުގެ އިއްތިޙާދުން އިނގިރޭސިވިލާތް ވަކިކުރުމަށް އެކަށައަޅާފައިވާ ތާވަލް މަޖިލީހުން ފާސްނުވެއްޖެނަމަ އައު އިންތިޚާބެއް ބާއްވަން މަސައްކަތްކަތްކުރައްވާނެކަމަށް ބޮޑުވަޒީރު ބޮރިސް ޖޮންސަން ވިދާޅުވެއްޖެއެވެ.
ވިލާތުގެ އިއްތިޙާދުން އިނގިރޭސިވިލާތް ވަކިވުމަށް ކަނޑައެޅުނު ތާރީޚަކީ އޮކްޓޯބަރު 31ވަނަ ދުވަހެވެ. ދުވަސް ގާތްވަމުން އަންނައިރު އަދިވެސް އެކަމަށްވަނީ ގޮތެއް ނުނިންމިފައެވެ. އެކަމުގައި އިނގިރޭސި ޤާނޫނުހަދާ މަޖިލީހުގެ މެންބަރުވަނީ ވަރަށް ބޮޑަށް ޚިޔާލުތަފާތުވެ، ބައިބައިވެފައެވެ.
ބޮޑުވަޒީރު ޖޮންސަން ވިދާޅުވެފައިވަނީ އެއްބަސްވުމެއްނެތި ވިލާތުގެ އިއްތިޙާދުން އިނގިރޭސިވިލާތް ވަކިވާން ނޭދޭނަމަ އެންމެ ރަނގަޅުގޮތަކީ އޭނާ ހުށަހެޅުއްވި ޤާނޫނީ ހަމަތައް ފާސްކުރުންކަމަށެވެ. އެކަންކަން ފާސްވޭތޯ މަޝްވަރާއާއި ބަހުސްތައްކޮށް އޭނާ ހުންނެވީ މުޅިން ވަރުބަލިވެފައިކަމަށްވެސް ޖޮންސަން ވިދާޅުވިއެވެ. ވިލާތުގެ އިއްތިޙާދުން އިނގިރޭސިވިލާތް ވަކިވުމަށް ހުށަހެޅުއްވި ތާވަލް އިތުރަށް ފަސްކޮށްފިނަމަ އެ އަނބުރާގެންދަވާނެކަން އޭނާ ހާމަކުރެއްވިއެވެ. އެއަށްފަހު ދެން ޖޮންސަން މަސައްކަތްކުރައްވާނީ އަވަސް އިންތިޚާބެއް ބާއްވައިގެން ބްރެކްސިޓްގެ ކަންކަން ނިންމުމަށްކަމަށް އޭނާވަނީ ވިދާޅުވެފައެވެ. ޖޮންސަން މިހެން ވިދާޅުވިނަމަވެސް އަވަސް އިންތިޚާބެއް ބޭއްވުމަށް މަޖިލީހުގެ ރުހުން ބޭނުންވާނެއެވެ.
ވިލާތުގެ އިއްތިޙާދާއެކު އިނގިރޭސިވިލާތުން މިމަހު ސޮއިކުރަން ހަމަޖެހުނު އެއްބަސްވުން ފާސްކޮށްދޭން އިނގިރޭސި ޤާނޫނުހަދާ މަޖިލީހުން ދެކޮޅުހެދުމުން ބޮޑުވަޒީރު ޖޮންސަން ހުންނެވީ ވަރަށް ހިތްހަމަޖެހިވަޑައިނުގެންނެވެ. އެއަށްފަހު ޖޮންސަން ވިދާޅުވެފައިވަނީ ބޮރެކްސިޓްގެ ކަންކަން ފަސްކޮށްދޭން ދެން ވިލާތުގެ އިއްތިޙާދަށް ހުށަނާޅުއްވާނެކަމަށެވެ. ނަމަވެސް ފަހުން ޖޮންސަންވަނީ އެ ޚިޔާލު ބަދަލުކުރައްވާފައެވެ.