ޤައުމީ ފުޓްބޯޅަ ޓީމަށް ދޭ އެލަވަންސް އިތުރުކޮށްފިއެވެ.
ޤައުމީ ފުޓްބޯޅަ ޓީމްތަކަށް މިހާރު ދެމުން އައިސްފައިވަނީ 100 ޑޮލަރެއެވެ ޤައުމީ ފުޓްބޯޅަ ޓީމްތަކަށް ލަފާދިނުމާއި ގައުމީ ޓީމްތަކުގެ ޕްލޭންތައް އެކުލަވާލުމަށް އެފްއޭއެމަށް އުފައްދާފައިވާ ޤައުމީ ފުޓްބޯޅަ ޓީމު ކޮމިޓީގެ ޗެއާމަން ޢަލީ ވަހީދު ވިދާޅުވީ ގައުމީ ޓީމަށް ކުޅުމަކީ ކޮންމެ ކުޅުންތެރިއަކަށްވެސް ލިބޭ ވަރަށް ބޮޑު ފަޙުރެއްކަމަށެވެ. އަދި ޤައުމީ ޓީމަށް ކުޅެން ކުޅުންތެރިން ޖެހޭނީ އަމިއްލައަށް ބޭނުންވެގެންކަމަށާއި ޤައުމީ ޓީމަށް ކުޅެން އެއްވެސް މަޖުބޫރުކަމެއް އޮވެގެން ނުވާނެކަމަށް ޢަލީ ވަހީދު ވިދާޅުވިއެވެ.
ޤައުމީ އަންހެން ފުޓްބޯޅަ ޓީމާއި ބައްދަލުކުރެއްވުމަށް ރޭ ހޮޓެލް ޖެންގައި ބޭއްވި ޙަފްލާގައި ވާހަކަ ދައްކަވަމުން ޢަލީ ވަހީދު ވިދާޅުވީ، ޤައުމީ ޓީމްތަކަށް ކުޅުމަކީ ގައުމަށް ކޮށްދެވޭ ވަރަށް ބޮޑު މަސައްކަތެއްކަމަށާއި ކުޅުންތެރިން ކުރާ މަސައްކަތުގެ އަގުވަޒަން ކުރުމަކީ ވަރަށް މުހިންމުކަމެއްކަމަށެވެ. ޤައުމީ ޓީމްތައް ރާއްޖޭއިން ބޭރުގައި ކޭމްޕް ކުރުމާއި، ރާއްޖެއިން ބޭރުގައި ކުޅޭ މުބާރާތްތަކަށް، މީގެ ކުރިން ކޮންމެ ކުޅުންތެރިއަކަށް ދީފައިވަނީ 100 ޑޮލަރެއެވެ.
"ކުރިން ލިބެނީ 100 ޑޮލަރު. ނަމަވެސް މިހާރު ޔޫތް މިނިސްޓަރއާއި މަޝްވަރާ ކުރުމަށްފަހު އަޅުގަނޑުމެންވާނީ 200 ޑޮލަރަށް ބަދަލްކޮށްފަ. އެހެންވީމަ މީގެފަހުން ޓީމްތަށް ފުރާއިރުވެސް ކޮންމެ ކުޅުންތެރިއަކަށް 200 ޑޮލަރު ލިބޭނެ. މިއީވެސް ކުޅުންތެރިންގެ މޯޓިވޭޝަންއަށް ކޮށްދެވޭ ވަރަށް ބޮޑުކަމެއް. ކުޑަކަމަކުންވެސް ވަރަށް ބޮޑު ބަދަލްތަކެއް ގެނެވިދާނެކަމަށް އަޅުގަނޑު މިބަލަނީ. ޒަމާނަށް އައިސްފައިވާ ބަދަލްތަކާއި އިންފުލޭޝަންއަށް އައިސްފައިވާ ބަދަލްތަކާއެކު ކުޅުންތެރިންނަށް ދޭ ދަތުރު ބޯނަސްވެސް އެބަޖެހޭ ރަގަނޅުވާން. މިއީ ސޯޓް ޓާމް ޕްލޭންގެ ދަށުން އަޅުގަނޑުމެން ކުރާ މަސައްކަތް އަދި ލޯންގް ޓާމް ޕްލޭންގެ ދަށުންވެސް ގިނަ ކަންތަށްތަށް ކުރުމަށްވަނީ ރޭވިގެން ގޮސްފަ." ޢަލީ ވަހީދު ވިދާޅުވިއެވެ.
ޤައުމީ ފުޓްބޯޅަ ޓީމު ކޮމިޓީގެ ޗެއާމަން ޢަލީ ވަހީދު ވިދާޅުވީ މީގެފަހުން ކޮންމެ ކުޅުންތެރިއަކަށް 200 ޑޮލަރު ދިނުމަށް ހަމަޖެހިފައިވާކަމަށާއި މިއީވެސް ކުޅުންތެރިންގެ މޯޓީވޭޝަނަށް ވަރަށް ބޮޑު ބަދަލްތަކެއް އަންނާނެކަމެއްކަމަށެވެ.