ފިލިޕީންސް މެޗަށް ޤައުމީ ޓީމު ތައްޔާރުވާއިރު މެޗުގެ ފޯރި ގެނައުމަށް ދަނޑު ހިމެނޭ މަޖީދީ މަގު ސަރަހައްދު ބަންދު ކުރަން ވިސްނަވާކަމަށް ޤައުމީ ޓީމު ކޮމިޓީގެ ޗެއާމަން ޢަލި ވަހީދު ވިދާޅުވެއްޖެއެވެ.
ޓުއަރިޒަމް މިނިސްޓަރ މިހެން ވިދާޅުވީ މި މެޗަކީ ރާއްޖެ ކޮންމެހެން މޮޅުވާންޖެހޭ މެޗެއް ކަމަށް ސިފަކޮށް އަދި މެޗުން މޮޅުވުމަށް ގައުމީ ޓީމު ކޮމިޓީއަށް ކޮށްދެވެންހުރި ހުރިހާ ކަމެއް ކުރައްވާނެ ކަމަށް ވިދާޅުވަމުންނެވެ. ޤައުމީ އަންހެން ޓީމާއި ބައްދަލުކުރެއްވުމަށް ރޭ ހޮޓެލް ޖެންގައި ބޭއްވި ޙަފްލާގައި ވާހަކަ ދައްކަވަމުން މިނިސްޓަރ ވިދާޅުވީ މީގެ ކުރިން ކޮށްފައިނުވާ މިފަދަ ކަންކަން ކުރަން ރާވަނީ މަގު ބަންދުކޮށް ދިވެހި ރައްޔިތުންނަށް ޒަމާނާއި ހާލަތާ ގުޅޭގޮތުން ގިނަ ބަޔަކު އެކުގައި ބައިވެރިވެވޭ ފަދަ އިވެންޓްތައް ބާއްވަން ގަސްތުކުރާ ކަމަށެވެ. މީގެ ބޭނުމަކީ މެޗުގެ ކުރިން ފުޓްބޯޅަ އާއިލާ އެއްތަނަކުން ބައްދަލުވެ، ހިޔާލު ބަދަލުކުރެވި އެންމެން އެކީގައި ގައުމީ ޓީމުގެ ފަހަތުގައިތިބިކަން ދައްކުވައިދިނުން ކަމަށް ޢަލީ ވަހީދު ވިދާޅުވިއެވެ.
މިނިސްޓަރ އަލީ ވަހީދު ވިދާޅުވީ މީޑިޔާއިން ވެސް ގައުމީ ޓީމުގެ ކަންކަން ޕޮޒިޓިވްކޮށް ގެނެސްދިނުން މުހިންމު ކަމަށާއި ބިނާކުރުވަނިވި ފާޑުކިއުންތަކަށް ފުރުސަތު އޮންނާނެ ކަމަށެވެ. އަދި ޤައުމީ ޓީމުގެ 23 ކުޅުންތެރިންގެ ސްކޮޑް ނަގާނީ އެވަގުތެއްގައި ހުންނަ ކޯޗު ކަމަށާއި ނަމަވެސް ޓީމުގެ ސްކޮޑުގައި ހިމެނޭ ކުޅުންތެރިންގެ ޕޫލް އެކުލަވާލުމުގައި ކޮމިޓީގެ މަޝްވަރާ ހިމަނަން ގަސްތުކުރައްވާ ކަމަށެވެ. ވަރލްޑް ކަޕް އަދި އޭޝިއަން ކަޕް ކޮލިފައިންގައި ރާއްޖެ މިހާތަނަށް ވަނީ ތިން މެޗު ކުޅެފައެވެ. ރަށުން ބޭރުގައި ގުއާމް އަތުން މޮޅުވިއިރު ސީރިއާ އާއި ޗައިނާ އަތުން ރާއްޖެ ވަނީ ބަލިވެފައެވެ.