އިންޑޮނޭޝިއާގެ ރައީސް ޖޯކޯ ވިޑޯޑޯ 5 އަހަރުގެ އިތުރު ދައުރަކަށް ހުވާކުރައްވައިފިއެވެ.
އިންޑޮނޭޝިއާގެ މިފަހަރުގެ އިންތިޚާބުގައި މައިގަނޑު މައްސަލައެއްގެ ގޮތުގައި ފާހަގަކޮށްފައިވަނީ އެ ޤައުމުގެ އިޤްތިޞާދީ މައްސަލައެވެ. މީގެ އިތުރުން ދީނީގޮތުން ހަރުކަށި ވިސްނުން ގެންގުޅޭ ފަރާތްތަކުގެ ނުފޫޒު ގަދަވުންވެސްވަނީ މައްސަލައެއްގެ ގޮތުގައި ފާހަގަކުރެވިފައެވެ.
ޢުމުރުން 58 އަހަރުގެ ވިޑޯޑޯވަނީ ސަރުކާރުން ކަންކަމަށް ހުއްދަދިނުމަށް ހަދާފައިހުރި ހަރުކަށި ޤަޥާޢިދުތައް އުވާލައްވާނެކަމަށް ވިދާޅުވެފައެވެ. އަދި ޤައުމުގެ ޢުމްރާނީ އޮނިގަނޑު ބިނާކުރުމަށް އިތުރު އަހަންމިއްޔަތުކަމެއް ދެއްވާނެކަމަށާއި ތަޢުލީމީ ފެންވަރު ރަނގަޅުކުރުމަށް އިސްކަންދެއްވާނެކަމަށް ވިޑޯޑޯވަނީ ވިދާޅުވެފައެވެ. އިންޑޮނޭޝިއާއަކީ ދެކުނު އިރުމަތީ އޭޝިއާގެ އެންމެ ބޮޑު އިޤްތިޞާދުކަމަށްވުމުން އިންވެސްޓްމެންޓް އިތުރުކޮށް ޤައުމުގެ 260 މިލިއަން މީހުންގެ މެދުގައި ވަޒީފާތައް އިތުރުކުރައްވާނެކަމަށްވެސް ވިޑޯޑޯވަނީ ވިދާޅުވެފައެވެ.
ހުވާކުރެއްވުމުގެ ރަސްމިއްޔާތުގައި ވާހަކަދައްކަވަމުން ޤާނޫނުހަދާ މަޖިލީހާއި މުޚާތަބުކުރައްވައި ވިޑޯޑޯ ވިދާޅުވީ ވަޒީފާތައް އިތުރުނުކުރެވިއްޖެނަމަ ޤައުމުގައި މައްސަލަތައް ނުކުންނާނެކަމަށެވެ. އަދި އޭނާގެ ހުވަފެންފުޅަކީ ޤައުމުގެ ޖީޑީޕީ 7 ޓްރިލިއަން ޑޮލަރަށް އިތުރުކުރުމާއެކު 2045ވަނަ އަހަރު އަންނަންވާއިރު އިންޑޮނޭޝިއާއަކީ ދުނިޔޭގައި ފަސްވަނައަށް އެންމެ ބޮޑު އިޤްތިޞާދު އޮތް ޤައުމަށްހެދުންކަމަށް ވިދާޅުވިއެވެ. ރައީސް ވިޑޯޑޯ ވިދާޅުވީ ވަޒީފާތައް އުފެއްދުމަށް ހުރަސްއެޅޭގޮތަށް ހުރި ޤާނޫނުތައް އުވާލަން ދެ ބިލު ޤާނޫނުހަދާ މަޖިލީހަށް ފޮނުއްވާނެކަމަށެވެ. ވަޒީފާގައި ތިބެގެން އެދެވޭ ފެންވަރަށް މަސައްކަތްނުކުރާ މުވައްޒަފުން ސިވިލް ސާވިސްއިން ވަކިކުރައްވާނެކަމަށްވެސް ވިދާޅުވިއެވެ.
އިންޑޮނޭޝިއާއަކީ ދުނިޔޭގެ ތިންވަނައަށް އެންމެ ބޮޑު ޑިމޮކްރަސީގެ ނިޒާމް އޮތް ޤައުމެވެ.