މާލޭގައި ހަދަމުން ދިޔަ އިމާރާތެއްގެ މަތިން އަނެއްކާވެސް މީހަކު ވެއްޓީ އަނިޔާވެ ފަރުވާދޭން ފަށައިފިއެވެ.
ފުލުހުން ވިދާޅުވީ ފަރީދިމަގުގައި ހަދަމުންދާ އިމާރާތެއްގެ ފަސްވަނަ ފަންގިފިލާ އިން ވެއްޓުނީ އުމުރުން 32 އަހަރުގެ ބިދޭސީ ފިރިހެނެއް ކަމަށެވެ. އަދި އެކަމުގެ ރިޕޯޓު ލިބިފައިވަނީ ހެނދުނު 9:52 އެހާކަންހާއިރު ކަމަށްވެސް ފުލުހުން ވިދާޅުވެއެވެ.
އެމީހާއަށް އައިޖީއެމްއެޗްގައި ފަރުވާދެމުންދާކަމަށާއި ފުލުހުންގެ ޓީމަކުން ދަނީ އެސަރަހައްދުގައި ހަރަކާތްތެރިވެ އެ މައްސަލަ ތަހުޤީގުކުރަމުންދާކަމަށް ފުލުހުން ވިދާޅުވެއެވެ.
ނިމިދިޔަ ހަފްތާގެ ތެރޭގައިވެސް ވަނީ މި ފަދަ ހާދިސާއެއް ހިނގާ ބިދޭސީއަކަށް އަނިޔާވެފައެވެ. މިމީހާ ވެއްޓުނީ އެއަރޕޯޓްގައި ހަދަމުންދިޔަ ކާގޯ ޓާމިނަލް މަތިންނެވެ. މީގެއިތުރުން ހުޅުމާލޭގައި ހަދަމުންދިޔަ އިމާރާތެއްގެ މަތިން ވެއްޓި ބިދޭސީއަކު ވަނީ މިދިޔަ މަހުގެތެރޭގައި މަރުވެފައެވެ.