އުނގޫފާރު ކައުންސިލުން ބުޅަލާއިމެދު އަމަލުކުރަން އުޅުނުގޮތް ހުއްޓާލުމަށް އީޕީއޭއިން އަންގަވައިފި
ރ.އުނގޫފާރު ކައުންސިލުން ބުޅާ މަދުކުރުމަށް ހިންގަން ހަމަޖައްސާފައިވާ ޙަރަކާތް ހުއްޓާލަން އީޕީއޭއިން އަންގަވައިފިއެވެ.
އީޕީއޭއިން އަންގަވާފައިވަނީ އެއޭޖެންސީއާއި ކަމާގުޅުންހުރި ސަރުކާރުގެ ވުޒާރާތަކާ މަޝްވަރާކޮށް ބުޅާ މަދުކުރުމަށް ކުރެވިދާނެ ކަންތައްތަކާއި ގުޅޭގޮތުން ގޮތްތަކެއް ނިންމެވުމަށެވެ.
އީޕީއޭއިން ވިދާޅުވެފައިވަނީ އެކަން ކުރަން ހަމަޖައްސާފައިވާ ގޮތަކީ ބުޅަލަށް އަނިޔާކޮށް އެތަކެތީގެ ނަސްލު އެކީގައި ނެތި ހިނގައިދާނެފަދަ ގޮތަކަށް ރޭވިފައިވާ ޙަރަކާތެއްކަމަށް އެއޭޖެންސީއަށް ފާހަގަ ވެފައިވާކަމަށެވެ. އަދި އެކަމަކީ ގާނޫނު ނަމްބަރ 2014/9 ގެ 625 ވަނަ މާއްދާގައި އަނިޔާވެރިކަމާއިއެކު ޖަނަވާރަކާމެދު އަމަލުކުރުމަކީ ޖުނަހްގެ 3ވަނަ ދަރަޖައިގެ ކުށެއްކަމުގައި ބަޔާން ކޮށްފައިވާކަމަަށެވެ.
ބައެއް މީޑިއާތަކުން އުނގޫފާރު ކައުންސިލާއި ހަވާލާދީ ބުނެފައިވަނީ މަރާލާ ކޮންމެ ބުޅަލަކަށް އެކައުންސިލުން 100 ރުފިޔާ ދޭގޮތައް ހަމަޖެހިފައިވާކަމަށެވެ.