ދިރާގު ދިވެހި ޕްރިމިއަރ ލީގުގައި މިރޭ ށ.ފޯކައިދުއާއި ފ.ނިލަންދޫ ބައްދަލުކުރި ފޯރިގަަދަ މެޗު ފޯކައިދޫއިން ކާމިޔާބުކޮށްފިއެވެ. މި މެޗު ފޯކައިދޫއިން ކާމިޔާބުކުރީ 1-2 އިންނެވެ.
މިދިޔަ ސީޒަނުގައި ނިލަންދޫން 5-0 އިން ފޯކައިދޫ ބަލިކުރިއިރު، މިފަހަރުގެ ސީޒަނުގެ ފުރަތަމަ ބުރުގައި ކުޅުނު މެޗުގައިވެސް ނިލަންދޫއިން ވަނީ ފޯކައިދޫ ބަލިކޮށްފައެވެ.
މެޗު ފަށައިގެން ދެޓީމުގެ ފަރާތުންވެސް ވާދަވެރި ކުޅުމެއް ފެނިގެންދިޔަ މި މެޗުގައި ފުރަތަމަ ލަނޑު ޖަހާ ލީޑު ނެގީ ށ.ފޯކައިދޫއިންނެވެ. މި ލަނޑު މެޗުގެ 32 ވަނަ މިނެޓުގައި އެޓީމަށް ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި މިޑްފީލްޑަރު ޚަލީލް ގަމާލް އެވެ. ފޯކައިދޫއިން ލަނޑު ޖެހި ފަހުން ނިލަންދޫއިން ވަނީ އެޓީމުގެ ކުޅުން އިތުރަށް ރަނގަޅުކޮށް ފޯކައިދޫގެ ގޯލަށް ބާރުބޮޑުކޮށްފައެވެ. އެގޮތުން ފުރަތަމަ ހާފުގެ ފުރިހަމަ ވަގުތު ހަމަވެގެން ދެއްކި އިތުރު ވަގުތުގެ ތެރޭގައި މެޗުގެ ނަތީޖާ ނިލަންދުއަށް ހަމަހަމަކޮށްދިން ލަނޑު އެޓީމަށް ކާމިޔާބުކޮށްދިނީ ޑިފެންޑަރު ކިންގްސްލީ އެވެ.
މެޗުގެ ދެވަނަ ހާފު ފަށައިިގެން ދެޓީމުންވެސް ވަނީ އިތުރު ލަނޑެއް ޖެހުމަށް ވަރަށް މަސައްކަތްކޮށްފައެވެ. މި މެޗުން ފޯކައިދޫ މޮޅުވީ މެޗުގެ އަށްޑިހަ ހަތްވަނަ މިނެޓުގައި ލިބުނު ޕެނަލްޓީ ކާމިޔާބުކޮށްގެންނެވެ. އޭރިއާ ތެރެއިން ފޯވާޑް ސެޑިކަށް ކުރި ފައުލަކާއި ގުޅިގެން ރެފްރީ ފޯކައިދުއަށް ޕެނަލްޓީއެއް ދިންއިރު، ސެޑިކް ވަނީ ފަސޭހަކަމާއެކު އެ ޕެނަލްޓީ ކާމިޔާބުކޮށްފައެވެ.
އޭގެ ފަހުން މެޗުގެ އިތުރުވަގުތުގައި ފޯކައިދޫގެ ފޯވާޑް މުހައްމަދު ޖައިލަމް އާއި ނިލަންދޫގެ އަހުމަދު ސާޖިދަށް ރެފްރީ ސީދާ ރަތްކާޑެއް ދެއްކި ހިސާބުން މެޗުވަނީ ވަރަށް ބޮޑަށް ހޫނުވެފައެވެ. މެޗު ނިމިގެން ދެޓީމުގެ ކޯޗުންނާއި، ކުޅުންތެރިންގެ ދެމެދު ހަމަނުޖެހުންވެސް ވަނީ ހިންގާފައެވެ.
މިރޭގެ މެޗުން ލިބުނު ތިން ޕޮއިންޓާއެކު ފޯކައިދޫ ތާވަލުގެ ހަވަނައިގައި 12 ޕޮއިންޓާއެކުއެވެ. އަދި ނިލަންދޫ އޮތީ ފުލުން ދެވަނައިގައި 6 ޕޮއިންޓާއެކު އެވެ.
މި މެޗަށްފަހު ވަރލްޑް ކަޕް އަދި އޭޝިއަން ކަޕް ޖޮއިންޓް ކޮލިފައިންގައި ދިވެހިރާއްޖެއާއި ސީރިޔާ ބައްދަލުކުރާ މެޗަށް ޤައުމީ ޓީމަށް ވަގުތު ދިނުމުގެ ގޮތުން މާދަމާއިން ފެށިގެން އަންނަ މަހުގެ ސާދައިގެ ނިޔަލަށް ލީގުގެ ކުޅުން މެދުކަނޑާލާފައެވެ.