ބ.އަތޮޅުގެ ޗެމްޕިއަންކަން އޭދަފުއްޓަށް ލިބުނު އިރު ހދ.އަތޮޅުގެ ޗެމްޕިއަންކަން ނާވައިދޫ ހޯދައިިފި

މިހާރު ކުރިޔަށްދާ ގޯލްޑެން ފުޓްސަލް ޗެލެންޖްގެ ބ.އަތޮޅުގެ ޗެމްޕިއަންކަން ބ.އޭދަފުށި ހޯދިއިރު ހދ.އަތޮޅުގެ ޗެމްޕިއަންކަން ނާވައިދޫ ހޯދައިިފިއެވެ. އަދި މީގެ އިތުރުން ރޭ މ.ނާލާފުށި ބަލިކޮށް ދިއްގަރު ވަނީ މ.އަތޮޅުގެ ޗެމްޕިއަންކަން ހޯދި އިރު އއ.އަތޮޅުގެ ޗެމްޕިއަންކަން ބޮޑުފުޅަދޫ ވަނީ ހޯދާފައެވެ. މި ނަތީޖާއާއެކު މި ޓީމުތައް ވަނީ މުބާރާތުގެ ޒޯން ބުރަށް ކޮލިފައިވެފައެވެ.

މުބާރާތުގައި ރޭ ފުރަތަމަ ކުޅުނީ ހދ.އަތޮޅުގެ ފައިނަލް މެޗެއެވެ. މި މެޗުގައި ބައްދަލުކުރީ ހދ.އަތޮޅު ބުރުގެ ގްރޫޕް އެކެއްގެ އެއްވަނަ ޓީމު ނާވައިދޫއާއި ގްރޫޕް ދޭއްގެ އެއްވަނަ ޓީމު މަކުނުދޫއެވެ. މި މެޗު 1-5 ގެ ނަތީޖާއަކުން ކާމިޔާބުކުރީ ނާވައިދޫއެވެ. މި މެޗުގައި ނާވައިދޫ ޓީމުން ޖެހި ލަނޑުތައް އެޓީމަށް ކާމިޔާބުކޮށްދިނީ، އަޙުމަދު ހަމީދު، މުހައްމަދު ނާޝިދު އަދި މުހައްމަދު އަސްލަމްއެވެ. މަކުނުދޫ ޓީމުން ޖެހި ހަމައެކަނި ލަނޑު އެޓީމަށް ކާމިޔާބުކޮށްދިނީ ސަމްޢޫން ޢަބްދުﷲއެވެ. މި މެޗުގެ މޮޅު ކުޅުންތެރިޔާގެ މަޤާމް ހޯދީ ނާވައިދޫ ޓީމުގެ އަޙުމަދު ހަމީދުއެވެ.

ހދ.އަތޮޅު ބުރުގައި އެންމެ ގިނަ ލަނޑު ޖަހައި ޓޮޕް ސްކޯރަގެ މަޤާމް ހޯދީ ނާވައިދޫ ޓީމުގެ މުހައްމަދު އަސްލަމްއެވެ. އަދި އެ އަތޮޅުގެ އެންމެ މޮޅު ކުޅުންތެރިޔާގެ މަޤާމްހޯދީ ނާވައިދޫ ޓީމުގެ އަޙުމަދު ހަމީދުއެވެ.

މުބާރާތުގައި ރޭ ކުޅުނު ދެވަނަ މެޗުގަައި ބައްދަލުކުރީ ބ.އޭދަފުއްޓާއި ތުޅާދޫއެވެ. މި މެޗު 1-8 އިން ކާމިޔާބުކޮށް އޭދަފުށި ވަނީ ބ.އަތޮޅުގެ ޗެމްޕިއަންކަން ހޯދާފައެވެ. އޭދަފުއްޓަށް ބ.އަތޮޅުގެ ޗެމްޕިއަންކަން ލިބުނީ އަތޮޅު ބުރުގައި ކުޅުނު ދެ މެޗުގެ ތެރެއިން ކިހާދޫއާއި ބައްދަލުކުރި މެޗު އެއްވަރުކޮށް ތުޅާދޫއަތުން ހޯދި ތިން ޕޮއިންޓާއެކު ޖުމްލަ ހަތަރު ޕޮއިންޓް ހޯދައިގެންނެވެ. ހިތާދޫއަށްވެސް ހަތަރު ޕޮއިންޓް ލިބިފައިވާއިރު އޭދަފުއްޓަށް ކުރި ލިބުނީ ފައިދާ ގޯލުގެ ތަފާތުންނެވެ. އޭދަފުއްޓާއި ތުޅާދޫ ބައްދަލުކުރި މި މެޗުގައި އޭދަފުށި ޓީމުން ޖެހި އަށް ލަނޑުގެ ތެރެއިން ހަތަރު ލަނޑު އެޓީމަށް ކާމިޔާބުކޮށްދިނީ މެޗުގެ މޮޅު ކުޅުންތެރިޔާގެ މަޤާމް ހޯދި އިޝާން އިބްރާހިމް (ސައްޓު)އެވެ. އަނެއް ހަތަރު ލަނޑުގެ ތެރެއިން ތިން ލަނޑު އަޙުމަދު އަޝްރަފް (ސޮބީ) ކާމިޔާބުކޮށްދިންއިރު އަނެއް ލަނޑު ކާމިޔާބުކޮށްދިނީ ޙާފިޒް އަޙުމަދެއެވެ.

ބ.އަތޮޅު ބުރުގައި އެންމެ ގިނަ ލަނޑު ޖެހި ކުޅުންތެރިޔާގެ މަޤާމާއި އެންމެ މޮޅު ކުޅުންތެރިޔާގެ މަޤާމް ހޯދީ އޭދަފުށީގެ އިޝާން އިބްރާހިމް (ސައްޓު)އެވެ.

މުބާރާތުގައި ރޭ ކުޅުނު ތިންވަނަ މެޗަކީ މ.އަތޮޅު ބުރުގެ ފައިނަލް މެޗެއެވެ. މި މެޗުގައި ބައްދަލުކުރީ މ.އަތޮޅު ބުރުގެ ގްރޫޕް އެކަކުން އެއްވަނައަށް ދިޔަ ދިއްގަރު އަދި ގްރޫޕް ދޭއްގެ އެއްވަނަ ޓީމު ނާލާފުއްޓެއެވެ. މި މެޗު 0-4 އިން ކާމިޔާބުކޮށް މ.އަތޮޅުގެ ޗެމްޕިއަންކަން ހޯދީ ދިއްގަރެއެވެ. މި މެޗުގައި ދިއްގަރު ޓީމުން ޖެހި ލަނޑުތައް އެޓީމަށް ކާމިޔާބުކޮށްދިނީ އާދަމް ޙަލީލް، އަލީ މާޖިދު އަދި މުހައްމަދު އަލީއެވެ.

މ.އަތޮޅުގެ ބުރުގައި އެންމެ ގިނަ ލަނޑު ޖެހި ކުޅުންތެރިޔާގެ މަޤާމް ހޯދީ މ.މަޑުއްވަރި ޓީމުގެ އަޙުމަދު އަޔާޒް (އަޔާ) އެވެ. އަދި އެ އަތޮޅުގެ އެންމެ މޮޅު ކުޅުންތެރިޔާގެ މަޤާމް ހޯދީ ދިއްގަރު ޓީމުގެ އަލީ މާޖިދުއެވެ.

މުބާރާތުގައި ރޭ ކުޅުނު ފަހު މެޗުގައި ބައްދަލުކުރީ އއ.ބޮޑުފުޅަދޫއާއި މަތިވެރިއެވެ. މި މެޗު 1-4 އިން ކާމިޔާބުކޮށް ބޮޑުފުޅަދޫ ވަނީ އއ.އަތޮޅުގެ ޗެމްޕިއަންކަން ހޯދާފައެވެ. މި މެޗުގައި ބޮޑުފުޅަދޫ ޓީމުން ޖެހި ލަނޑުތައް އެޓީމަށް ކާމިޔާބުކޮށްދިނީ، މުހައްމަދު ޝިރުޙާން، އަލީ ޝަނީޒް އަދި އިބްރާހިމް ރަފްހާންއެވެ. މަތިވެރި ޓީމުން ޖެހި ހަމައެކަނި ލަނޑު އެޓީމަށް ކާމިޔާބުކޮށްދިނީ، އާދަމް އިމްރާންއެވެ.

މިމަހު އިން އަންނަ މަހުގެ އަށާރައިގެ ނިޔަލަށް ހުޅުމާލޭގައި ކުރިޔަށްދާ މި މުބާރާތުގައި މިރޭވެސް ހަތަރު މެޗެއް ކުޅުމަށްވަނީ ހަމަޖެހިފައެވެ.