ޤަވާއިދާ ހިލާފަށް ޕާކުކުރުމުން މިދިޔަ ހަފްތާގައި ސްޓިކާ ޖެހި އުޅަނދުތަކުގެ އަދަދު ދަށަށް ހިގައްޖެއެވެ.
މާލޭ ސިޓީގެ ޓްރިފިކް މައްސަލަތަކުގެ ހިސާބުތައް ފުލުހުން އަންނަނީ ހަފްތާއަކު އެއްފަހަރު އާއްމުކުރަމުންނެވެ. ފުލުހުން އާއްމުކުރި ޓްރިފިކް މައްސަލަތަކުގެ ހިސާބުތައް ދައްކާގޮތުން މިދިޔަ ހަފްތާގައި ޤަވާއިދާ ހިލާފަށް ޕާކުކޮށްފައި ހުރި 481 އުޅަނދުގައި ވަނީ ސްޓިކާ ޖަހާފައެވެ. އޭގެ ކުރީ ހަފްތާގައި ޤަވާއިދާ ހިލާފަށް ޕާކުކޮށްގެން 519 އުޅަނދެއްގައި ވަނީ ސްޓިކާ ޖަހާފައެވެ.
މިމަހުގެ 21 އިން ފެށިގެން މިދިޔަ ހުކުރު ދުވަހުގެ ނިޔަލަށް މާލޭ ސަރަހައްދުގައި 43 އެކްސިޑެންޓެއް ހިނގައި 15 މީހަކަށް އެކިވަރުގެ އަނިޔާލިބިފައިވާކަމަށް ފުލުުންގެ ތަފާސް ހިސާބުތަކުން ދައްކައެވެ.
ޓްރެފިކް ފުލުހުން ބެލި މައްސަލަތަކުގެ ތެރެއިން މިދިޔަ ހަފްތާގައި އެންމެ ގިނައީ ލައިސަންސް ނެތި ދުއްވި މައްސަލަތަކެވެ. މިގޮތުން މިދިޔަ ހަފްތާގައި ލައިސަންސް ނެތް 40 މީހަކު ހިފަހައްޓާފައިވާކަމަށް ފުލުހުން ވިދާޅުވެއެވެ. މީގެއިތުރުން ލައިސަންސް އަތުގައި ނެތި ދުއްވި 31 މީހެއްގެ މައްސަލަވެސް ފުލުހުން ވަނީ ބަލާފައެވެ.
އިންޝުރަންސާއި ރޯޑް ވާދިނަސް ނެތް 22 މައްސަލަަކާއި ޓްރެފިކް ސައިންތަކާއި ހިލާފުވި 11 މައްސަލައަކާއި ހެޑް ފޯނު އަޅައިގެން ދުއްވި 17 މައްސަލައެއްވެސް މިދިޔަ ހަފްތާގައި ފުލުހުން ބަލާފައިވާކަމަށް އެ އިދާރާގެ ތަފާސް ހިސާބުތަކުން ދައްކައެވެ.
ފުލުހުންގެ ތަފާސް ހިސާބުތަކުން ދައްކާގޮތުން ޤަވައިދާ ހިލާފަށް ދުއްވައިގެން 2 މީހެއްގެ ލައިސަންސް މިދިޔަ ހަފްތާގައިވަނީ ހިފައްހައްޓާފައެވެ. އަދި ޤަވައިދާ ހިލާފަށް ޓެކްސީ ކުރި 2 މައްސަލައަކާއި ހެލްމެޓް ނާޅާ ދުއްވި 5 މައްސަލައެއްވެސް މިދިޔަ ހަފްތާގައި ވަނީ ފުލުހުންނަށް ބަލާފައެވެ.
މާލޭގައި ޕާކުރުމަށް ދިމާވެފައިވާ މައްސަލަތައް ހައްލުކުރުމަށް އެކި ސަރަހައްދުތަކުގައި އަންނަނީ ޕާކިން އޭރިއާތައް ހަދަމުންނެވެ. މި ގޮތުން ސޯސަންމަގުގައި ކުރިން ނާސަރީ ހުރި ބިން ހުސްކޮށް އެތަނުގައ ޕާކިން އޭރިއާއެއް ހެދުމުގެ މަސައްކަތް މާލޭ ސިޓީ ކައުންސިލުން އަންނަނީ ކުރަމުންވެެ. މީގެ އިތުރުން ކުލި ދައްކައިގެން ޕާކުކުރެވޭނެ އިންތިޒާމުތައްވެސް ސިޓީ ކައުންސިލުން ވަނީ ހަމަޖައްސާފައެވެ.