އީރާނާއެކު ތެލުގެ މުޢާމަލާތްކުރާކަމަށް ތުޙުމަތުކޮށް، އެމެރިކާއިން ޗައިނާގެ ބައެއް ފަރާތްތަކާ ދެކޮޅަށް އެޅި ދަތިކުރުމުގެ ފިޔަވަޅުތަކަށް ރުޅިވެރިކަމާއެކު ޗައިނާ ފާޑުކިޔައިފިއެވެ.
ޗައިނާގެ ޚާރިޖީ ވުޒާރާގެ ތަރުޖަމާން ގެންގް ޝުއާންގް ވިދާޅުވީ އީރާނާއެކު ތެލުގެ ވިޔަފާރި ކުރުމާއި ތެލުގެ މުޢާމަލާތް ހިންގުމަކީ ބައިނަލްއަޤްވާމީ ގޮތުން ހުއްދަކަމަށްވާއިރު، އެކަމާ ގުޅިގެން އެމެރިކާއިން ދަތިކުރުމުގެ ފިޔަވަޅު އެޅުމަކީ ބިރު ދެއްކުމުގެ ޢަމަލެއްކަމަށެވެ. އެމެރިކާގެ މާލީ ވުޒާރާއިންވަނީ އީރާނުގެ ތެލުގެ ވިޔަފާރިއާ ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކަށް ބެލުމެއްނެތި އީރާނާ ތެލުގެ މުޢާމަލާތްކުރަމުންދާކަމަށް ތުޙުމަތުކޮށް ޗައިނާގެ ފަސް މީހަކަށާއި ޗައިނާގެ ހަ ކުންފުންޏަކާ ދެކޮޅަށް ދަތިކުރުމުގެ ފިޔަވަޅުތަކެއް އެޅިކަން އިޢުލާނުކޮށްފައެވެ.
މި ހަފުތާގައި ނިއުޔޯކްގައި ދެއްވި ބަޔާނެއްގައި އެމެރިކާގެ ޚާރިޖީވަޒީރު މައިކް ޕޮމްޕެއޯވަނީ އީރާނާ ދެކޮޅަށް އަޅާފައިވާ ފިޔަވަޅުތަކަށް ތަބާނުވާ ކޮންމެ ފަރާތަކާ ދެކޮޅަށް ދަތިކުރުމުގެ ފިޔަވަޅުތައް އަޅާނެކަމުގެ އިންޒާރު ޗައިނާއަށާ އަދި ދުނިޔޭގެ އެހެން ޤައުމުތަކަށްވެސް އެމެރިކާއިން ދީފައިވާނެކަމަށް ވިދާޅުވެ، ވާހަކަ ދައްކަވާފައެވެ. އެމެރިކާގެ ދަތިކުރުމުގެ ފިޔަވަޅުތަކަށް ބެލުމެއްނެތި ޗައިނާއިން އީރާނުގެ ތެޔޮގަނެ ޗައިނާގެ ކުންފުނިތަކުން އީރާނުގެ ތެލުގެ ސިނާޢަތުގައި މަސައްކަތްކުރަމުން ގެންދިޔަނަމަވެސް މި މައްސަލައިގައި ޗައިނާއާ ދެކޮޅަށް މާ ހަރުކަށި ފިޔަވަޅުތަކެއް އަޅަން އެމެރިކާއަށް ކެރިފައިނުވާކަމަށް ރިޕޯޓްތައް ބުނެއެވެ.
އެމެރިކާއިން ޗައިނާގެ ބައެއް ފަރާތްތަކާ ދެކޮޅަށް އެޅި ދަތިކުރުމުގެ ފިޔަވަޅުތަކަށް އިޝާރާތްކުރައްވައި ޗައިނާގެ ޚާރިޖީ ވުޒާރާގެ ތަރުޖަމާނުވަނީ އެމެރިކާއިން ހިންގަމުން ގެންދަނީ ބިރު ދެއްކުމުގެ ޢަމަލެއްކަމަށް ވިދާޅުވެ، އެކަން އިސްލާޙުކުރުމަށް އެމެރިކާއަށް ގޮވާލައްވާފައެވެ.