އިންޑިއާގެ ހުޅަނގުގެ ސްޓޭޓެއްކަމަށްވާ މަހާރާޝްތްރާއަށް ބޯކޮށް ވާރޭވެހުމުގެ ސަބަބުން އެ ސްޓޭޓްގެ ދެވަނައަށް އެންމެ ބޮޑު ސިޓީކަމަށްވާ ޕޫނޭގައި ފެންބޮޑުވެއްޖެއެވެ.
މަހާރާޝްތްރާގެ މަސްޢޫލުވެރިއެއް ވިދާޅުވީ ޕޫނޭގެ އިތުރުން އެ ރަށުގެ ވަށައިގެންވާ ސަރަޙައްދުތަކުގައިވެސް ފެންބޮޑުވެފައިވާކަމަށާ ފެންބޮޑުވުމުގެ ސަބަބުން 28،000 މީހުން ރައްކާތެރި ތަންތަނަށް ގެންގޮސްފައިވާކަމަށެވެ. އަދި ވާރޭވެހި ފެންބޮޑުވުމުގެ އިތުރު ހާދިސާތައް ހިނގާފާނެކަމުގެ ބިރު އޮތުމުން އެ ސްޓޭޓްގެ ލޯކަލް ސަރުކާރު އޮތީ އެކަމަށް ތައްޔާރުވެގެންކަމަށްވެސް އޭނާ ވިދާޅުވިއެވެ.
6.4 މިލިޔަން މީހުންގެ އާބާދީއެއް އޮންނަ ޕޫނޭއަކީ މަހާރާޝްތްރާގެ ވެރިރަށް އަދި އިންޑިއާގެ މާލީ މަރުކަޒުގެ ގޮތުގައި ސިފަކުރެވޭ މުންބާއިގެ އިރުން 200 ކިލޯމީޓަރު ދުރުގައިވާ ސިޓީއެކެވެ. މިދިޔަ ޖޫންމަހު އިންޑިއާއަށް ވިއްސާރަ މޫސުން ފެށުނުފަހުން ކުރަމުންދާ ވިއްސާރައިގައި މުމްބާއީއަށްވެސް ވަރަށް ބޮޑަށް ވިއްސާރަކޮށްފައިވެއެވެ. މަހާރާޝްތްރާއަށް މިހާރު ކުރަމުންދާ ވިއްސާރައިގައި 11 މީހުން މަރުވިކަމަށް ރިޕޯޓުކޮށްފައިވާއިރު އޭގެތެރެއިން 5 މީހުން މަރުވެފައިވަނީ ޕޫނޭގައިކަމަށް އެ ސްޓޭޓުން ވިދާޅުވިއެވެ.
ވިއްސާރަ މޫސުމުގައި އެކި ސްޓޭޓްތަކުގައި ފެންބޮޑުވެ މީހުން މަރުވެ އަދި މާއްދީ ބޮޑެތި ގެއްލުންތައް ކޮންމެ އަހަރަކު ލިބެމުން ދިޔަނަމަވެސް ވިއްސާރައިގެ ސަބަބުން ބިންގަނޑު ތާޒާވެ ދަނޑުވެރިކަން ކުރިއެރުމުގެ ސަބަބުން އިޤްތިޞާދީ ގޮތުން ބޮޑެތި ފައިދާތަކެއްކުރާކަމަށް މަޢުލޫމާތު ލިބެއެވެ.