ޗައިނާއިން ކުރިއަށް ގެންދާ ސިލްކް ރޫޓުގައި އެންމެ ފުރަތަމ ބައިވެރިވި ޤައުމުތަކުގެ ތެރޭގައި ދިވެހި ރާއްޖެ ހިމެނުމަކީ ދިވެހިން ފަޚުރުވެރިވާކަމެއްކަމަށް ޕްލޭނިންގ މިނިސްޓަރ މުޙައްމަދު އަސްލަމް ވިދާޅުވެއްޖެއެވެ.
މިނިސްޓަރ އަސްލަމް މިހެން ވިދާޅުވީ، ޗައިނާގެ 70ވަނަ ޤައުމީ ދުވަސް ފާހަގަކުރުމަށް ރޭ ކުރުނބާ މޯލްޑިވްސްގައި ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
މިނިސްޓަރ އަސްލަމްގެ ވާހަކަފުޅުގައި ވަނީ ދެޤައުމުގެ ދެމެދު ބަދަހިވަމުންދާ ގުޅުމުގެ މައްޗަށް އަލިއަޅުއްވާލައްވައި ވާހަކަފުޅުދައްކަވާފައެވެ. މިނިސްޓަރ ވިދާޅުވީ، ޗައިނާއަކީ އަބަދުވެސް ރާއްޖެއަށް ބޮޑެތި އެހީތެރިކަމެއް ފޯރުކޮށްދޭ ޤައުމެއްކަމަށާއި، ފާއިތުވި ފަސް އަހަރުދުވަހުގެ ތެރޭގައި ރާއްޖޭގެ އިޤްތިޞާދުގެ މުހިންމު ބައިވެރިއަކީ ޗައިނާކަމަށް މިނިސްޓަރ ވިދާޅުވިއެވެ.
އެގޮތުން ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމާއި، ހައުސިންގ މަޝްރޫޢުތަކަށާއި، ބްރިޖާއި އެނޫންވެސް ބޯޑެތި ޢުމްރާނީ ތަރައްޤީގެ މަޝްރޫޢުތަކުގައި ޗައިނާއިން ބޮޑެތި އެހީތަކެއް ލިބިފައިވާކަން ފާހަގަކުރައްވައި މިނިސްޓަރ ވަނީ ޗައިނާއަށް ތަޢުރީފް ކުރައްވާ ވާހަކަފުޅު ދައްކަވާފައެވެ. މިނިސްޓަރ ވަނީ ރާއްޖެއަށް އެންމެ ގިނަ ޢަދަދަކަށް ފަތުރުވެރިން އަންނަ އެއް ޤައުމަކީވެސް ޗައިނާކަން ފާހަގަކުރައްވާފައެވެ.
ރާއްޖޭގެ އިޤްތިޞާދާއި ތަރައްޤީގައި ޗައިނާއިން އަދާކުރާ ދައުރު ބަލައިގަންނަކަން ފާހަގަކުރައްވާ މިނިސްޓަރ ވަނީ މި ސަރުކާރުގެ އަމާޒަކީވެސް ދެ ޤައުމުގެ ގުޅުން އިތުރަށް ބަދަހިވެގެން ދިއުންކަމަށް ވިދާޅުވެފައެވެ.
" ޗައިނާއިން އިސްވެ ފެށި ޗައިނާ ސިލްކު ރޫޓްގައި އެންމެ ފުރަތަމަ ބައިވެރި ޤައުމުތަކުގެ ތެރޭގައި ދިވެިރާއްޖެ ހިމެނޭކަމީ ދިވެހިން ފަޚްރުވެރިވާކަމެއް. ހަމައެހެންމެ ރާއްޖެއާއި ޗައިނާގެ ގުޅުން ބަދަހިވެގެންދާއިރު، ރައީސް އިބްރާހީމް މުޙައްމަދު ޞަލިޙްގެ ވެރިކަމުގެ މި ދައުރުގެ ތެރޭގައި އިތުރަށް ބަދަހިކުރުމަށް ވަރަށް އިސްކަމެއްދެއްވާ." މިނިސްޓަރ އަސްލަމް ވިދާޅުވިއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖަންގް ލީ ޖޮންގް ވިދާޅުވީ، ޗައިނާއާއި ރާއްޖޭގެ ގުޅުން އައު ހަރުފަރަތަކަށް އައިސްފައިވާކަމށާއި، ޗައިނާއިން އަބަދުވެސް ރާއްޖެއަށް އެބާރުލުންދީ އެހީތެރިކަން ފޯރުކޮށްދޭނެކަމަށެވެ.
ދެޤައުމުގެ ސިޔާސީ ގުޅުމަށް 47 އަހަރު ވެފައިވާކަން ފާހަގަކުރައްވާ ސަފީރު ވިދާޅުވީ، ރާއްޖެއާއި ޗައިނާގެ ގުޅުމަކީ ނަމޫނާ ގުޅުމެއްކަމަށެވެ. އެކަން ފޮރިންގ މިނިސްޓަރ ޢަބްދުﷲ ޝާހިދު ދާދި ފަހުން ޗައިނާއަށް ކުރެއްވި ދަތުރުފުޅުންވެސް ހާމަވިކަން ސަފީރު ފާހަގަކުރެއްވިއެވެ.
"ޗައިނާއާއި ރާއްޖެއާއި ދެމެދު އޮންނަ ގުޅުމަކީ ބޮޑުޤައުމަކާއި ކުޑަ ޤައުމަކާ ދެމެދު އޮންނަ ނަމޫނާ ގުޅުމެއް. ދެޤައުމުގެ ގުޅުން އަދިވެސް ދަނީ ބަދަހިވަމުން. މިނިސްޓަރ ޝަހިދު ޗައިނާއަށް ކުރެއްވި ދަތުރުފުޅުގައި އެއްބަސްވުންތަކެއްގައި ސޮއިކޮށްފަިއވާކަމީވެސް މިގުޅުން ރަމްޒުކޮށްދޭކަމެއް." ޗައިނާ ސަފީރު ވިދާޅުވިއެވެ.
ޗައިނާގެ 70ވަނަ ޤައުމީ ދުވަސް ފާހަގަކުރުމަށް ކުރުނބާ މޯލްޑިވްސްގައި ބޭއްވި ރަސްމިއްޔާތުގައި ރާއްޖޭގައި ހުންނަ ޗައިނާ އެމްބަސީގެ ފަރާތުން ރައީސުލްޖުމްހޫރިއްޔާގެ ނައިބަށް ވަނީ ހަނދާނީ ފިލައެއް އަރުވާފައެވެ. ޗައިނާ އެމްބަސީގެ ފަރާތުން މިފިލާ ރައީސުލްޖުމްހޫރިއްޔާގެ ނައިބާ ހަވާލުކޮށްދެއްވީ ޗައިނާއިން ރާއްޖެއަށް ކަނޑައަޅާފައި ހުންނަވާ ސަފީރު މިސްޓަރ ޖަންގް ލީ ޖޮންގްއެވެ.
ދިވެހިރާއްޖެއާ ޗައިނާއާ ދެމެދު ސިޔާސީ ގުޅުން ޤާއިމުކޮށްފައި ވަނީ 14 އޮކްޓޫބަރު 1972 ގައެވެ.