ޖޮންސަން މަޖިލީސް ސަސްޕެންޑުކުރެއްވީ ގާނޫނާ ޚިލާފަށްކަމަށް އެ ޤައުމުގެ ސުޕްރީމް ކޯޓުން ނިންމައިފި
އިނގިރޭސިވިލާތުގެ ބޮޑުވަޒީރު ބޮރިސް ޖޮންސަން މިމަހުގެ 10ވަނަ ދުވަހު އިނގިރޭސިވިލާތުގެ މަޖިލީހުގެ ދަށުގެކަމަށްވާ ހައުސް އޮފް ކޮމަންސް ސަސްޕެންޑުކުރެއްވީ ޤާނޫނާ ޚިލާފަށްކަމަށް އެ ޤައުމުގެ ސުޕްރީމް ކޯޓުން ނިންމައިފިއެވެ.
އިނގިރޭސި ސްޕްރީމް ކޯޓުގެ ރައީސް ބްރެންޑާ މާޖޯރީ ހޭލް ވިދާޅުވީ މަޖިލިސް ސަސްޕެންޑުކުރަންޖެހޭކަމަށް ސާބިތުވާ އެއްވެސް ހެއްކެއް އިނގިރޭސި ސަރުކާރަށް ދެއްކިފައިނުވާތީ މޖިލިސް ސަސްޕެންޑުކުރަން ޖޮންސަން ނިންމެވި ނިންމެވުމަކީ ޣައިރު ޤާނޫނީ ޢަމަލެއްކަމަށް ސުޕްރީމް ކޯޓުގެ ބެންޗްގައި ހިމެނޭ 11 ފަނޑިޔާރުން އެއްބަސްވެވަޑައިގެންފައިވާކަމަށެވެ.
އިނގިރޭސިވިލާތުގެ ސުޕްރީމް ކޯޓުގެ މި ނިންމުމާއެކު ހައުސް އޮފް ކޮމަންސްގެ ރައީސް ޖޯން ބޭކޮވްވަނީ އެ ނިންމުމަށް މަރުޙަބާވިދާޅުވެ، މި އަންނަ ބުދަ ދުވަހު ހައުސްގެ ޖަލްސާތައް އަލުން ފަށާނެކަން އިޢުލާނުކުރައްވާފައެވެ. ބޭކޮވް ވިދާޅުވީ ސުޕްރީމް ކޯޓުގެ ނިންމުން ވަރަށް ސާފުކަމަށާ އެއާއެކު ލަސްނުކޮށް މަޖިލީހުގެ ޖަލްސާތައް އަލުން ފަށަންޖެހޭނެކަމަށެވެ. މިގޮތުން ބުދަދުވަހުގެ ހެނދުނު އެގާރަގަނޑި ތިރީހުގައި ހައުސްގެ ޖަލްސާތައް އަލުންފަށާނެކަން މެންބަރުންނަށް އަންގަވާފައިވާނެކަމަށް އޭނާ ވިދާޅުވިއެވެ.
އިނގިރޭސިވިލާތުގެ އިދިކޮޅު ބައެއް މެމްބަރުންވަނީ ބޮޑުވަޒީރު ބޮރިސް ޖޮންސަން މިމަހުގެ 10ވަނަ ދުވަހު މަޖިލިސް ސަސްޕެންޑްކުރެއްވީ ބްރެކްސިޓްގެ މައްސަލައިގައި ޖޮންސަން ގެންގުޅުއްވާ ސިޔާސަތާ ދެކޮޅަށް އަޑުއުފުއްލަވާ އިދިކޮޅު މެންބަރުންގެ އަޑު ކަނޑުވާލުމުގެ ބޭނުމުގައިކަމަށް ތުޙުމަތުކުރައްވާފައެވެ. މި މައްސަލަ ސުޕްރީމް ކޯޓަށް ވެއްދި މެންބަރުންގެ ތެރޭގައި ހައުސްގެ މެންބަރުން ހިމެނެއެވެ. ނަމަވެސް ޖޮންސަންވަނީ އޭނާގެ ޒަޢާމަތުގައި އައު ސަރުކާރެއް ވުޖޫދަށް އައިސްފައިވާތީ އެފަދަ ޙާލަތެއްގައި މަޖިލީސް ސަސްޕެންޑުކުރުމަކީ އައުކަމެއްނޫންކަމާއި އެއީ އިނގިރޭސިވިލާތުގައި މީގެ ކުރިންވެސް ކޮށްފައިވާކަމެއްކަމަށް ވިދާޅުވެ، އޭނާގެ ނިންމުން ދިފާޢުކުރައްވާފައެވެ.