އެމެރިކާއިން އެއްވެސް ޙާލެއްގައި އީރާނާއެކު ހަނގުރާމައެއްކުރަން ބޭނުންނުވާކަމަށް އެމެރިކާގެ ޚާރިޖީވަޒީރު މައިކް ޕޮމްޕެއޯ ވިދާޅުވެއްޖެއެވެ.
އެމެރިކާގެ ފޮކްސް ނިއުސްއަށް ދެއްވި ބަސްދީގަތުމެއްގައި ވާހަކަދައްކަވަމުން އެމެރިކާގެ ޚާރިޖީވަޒީރު ޕޮމްޕެއޯ ވިދާޅުވީ އެމެރިކާއިން ގަލްފް ސަރަޙައްދަށް އިތުރު ސިފައިން ފޮނުވުމަށް ނިންމާފައިވަނީ ދިފާޢީ ކަންކަން ވަރުގަދަކުރަންކަމަށާ އެމެރިކާއިން އީރާނާއެކު ހަނގުރާމައެއްކުރަން ބޭނުން ނުވާކަމަށެވެ. އަދި އެމެރިކާގެ ފިޔަވަޅުތަކުން އީރާނުގެ ޙަރަކާތްތަކަށް އެއްވެސް ބަދަލެއްނާންނަނަމަ މިކަމުގައި ދެން އަޅާނެ ފިޔަވަޅުތައްވެސް އެމެރިކާގެ ރައީސް ޑޮނާލްޑް ޓްރަމްޕް މިހާރު ނިންމަވާފައިވާކަމަށް އެމެރިކާގެ ޚާރިޖީވަޒީރު ވިދާޅުވިއެވެ.
ޕޮމްޕެއޯ މިހެން ވިދާޅުވެފައި މިވަނީ މެދު އިރުމަތީގައި އީރާނުން ހިންގަމުންދާ ގެއްލުން ދެނިވި ޙަރަކާތްތަކާ ދެކޮޅަށް މަސައްކަތްކުރާނެ ބައިނަލްއަޤްވާމީ އިއްތިޙާދެއް އުފެއްދުމަށް އެމެރިކާއިން މަސައްކަތްކުރަމުންދާކަމަށް އެ ޤައުމުން އިއުލާނުކޮށްފައިވާ ދަނޑިވަޅެއްގައެވެ. އަނެއްކޮޅުން، ސަޢުދީ ޢަރަބިއްޔާއަށް ދިން ޙަމަލާއަށްފަހު އެ ޤައުމުގެ ސަލާމަތީ ކަންކަން ވަރުގަދަކުރުމަށް އެމެރިކާގެ އިތުރު ސިފައިން އެ ސަރަޙައްދަށް ފޮނުވާނެކަން އެމެރިކާގެ ރައީސް ޑޮނާލްޑް ޓްރަމްޕްވަނީ ހުކުރު ދުވަހު އިޢުލާނުކުރައްވާފައެވެ.
މިމަހުގެ 14ވަނަ ދުވަހު ސަޢުދީ ޢަރަބިއްޔާގެ ތެޔޮ ސާފުކުރާ ކާރުޚާނާއަކާ ތެޔޮ ދަނޑަކަށް އަމާޒުކޮށް ދިން ޙަމަލާގެ ޒިންމާ ނަގާފައިވަނީ ޔަމަނުގެ އިދިކޮޅު ހޫޘީ ޖަމާޢަތުންނެވެ. އެހެންނަމަވެސް، އެމެރިކާއާ ސަޢުދީ ޢަރަބިއްޔާއިން ބުނެފައިވަނީ މި ޙަމަލާގެ ފަހަތުގައިވަނީ އީރާނުކަމަށެވެ.