ލީބިޔާގެ ތެޔޮ އުފައްދާ ޤައުމީ ކުންފުނި ނޭޝަނަލް އޮއިލް ކޯޕަރޭޝަން (އެން.އޯ.ސީ)އަކީ އެ ޤައުމުގެ ހަކަތައިގެ ސިނާޢަތުގެ އެންމެ އިސް ފަރާތްކަމުގައި ނިންމާ އެ ކުންފުންޏަށް އެއްބާރުލުން ދިނުމަށް ހުޅަނގުގެ ފަސް ޤައުމަކާ ތުރުކީވިލާތާ ޔޫއޭއީން ނިންމައިފިއެވެ.
މި ޤައުމުތަކުން މިގޮތަށް ނިންމާފައިވަނީ ލީބިޔާގެ އިރުމަތީގައި އެ ޤައުމުގެ ސަރުކާރާ ވަކިން ވެރިކަން ކުރަމުންދާ އިދިކޮޅު ހަނގުރާމަވެރިން، އެ ކުންފުނީގެ އިތުރު ބޯޑެއް ޢައްޔަނުކޮށް މެމްބަރުން ހަމަޖައްސާފައިވާ ދަނޑިވަޅެއްގައެވެ. އދއާ ބައިނަލްއަޤްވާމީ ދުނިޔެއިން ލީބިޔާގެ ސަރުކާރުގެ ގޮތުގައި ޤަބޫލުކުރަނީ އެ ޤައުމުގެ ތަރާބުލްސްގައި ވެރިކަންކުރަމުންދާ ސަރުކާރެވެ.
ލީބިޔާގެ ތެޔޮ އުފައްދާ ޤައުމީ ކުންފުނި އެން.އޯ.ސީއަށް ލިބިފައިވާ ބާރުތައް ފާހަގަކުރަމުން ހުޅަނގުގެ 5 ޤައުމާ ތުރުކީވިލާތް އަދި ޔޫއޭއީން ގުޅިގެން ނެރުނު ބަޔާނުގައި ބުނެފައިވަނީ ލީބިޔާގެ އިޤްތިޞާދީ އަދި ސިޔާސީ ހަމަޖެހުމާ، އެ ޤައުމުގެ ރައްޔިތުންގެ ސަލާމަތަށް އެ ޤައުމުތަކުން އެއްބާރުލުންދޭނީ އެންއޯސީއަށް އެކަނިކަމަށެވެ. އަދި މިކަމުގައި މި ޤައުމުތަކުން އެކުންފުންޏަށް އެއްބާރުލުން ދެމުންގެންދާނެކަމަށްވެސް މި ޤައުމުތަކުން ނެރުނު ބަޔާނުގައި ބުނެފައިވެއެވެ.
މި ބަޔާނުގައި ބައިވެރިވި ހުޅަނގުގެ ޤައުމުތަކުގެ ތެރޭގައި އެމެރިކާ، އިނގިރޭސިވިލާތް، ފަރަންސޭސިވިލާތް، އިޓަލީވިލާތް އަދި ޖަރުމަނުވިލާތް ހިމެނެއެވެ.
ލީބިޔާގެ އިރުމަތީގެ ސަރަޙައްދުތައް ކޮންޓްރޯލްކުރާ އިދިކޮޅު ހަނގުރާމަވެރިން މިހާރުދަނީ އެ ޤައުމުގެ ވެރިރަށް ތަރާބުލްސް ހިފުމަށް ވަރުގަދަ އޮޕަރޭޝަނެއް ހިންގަމުންނެވެ.