ތިން ޤާޟީއަކާއި މެޖިސްޓްރޭޓެއްގެ މައްސަލަ ބަލަން ޖުޑީޝަލް ސާރވިސް ކޮމިޝަން (ޖޭއެސްސީ)އިން ނިންމަވައިފިއެވެ.
އެކޮމިޝަނުން ނިންމަވާފައިވަނީ ކްރިމިނަލް ކޯޓުގެ ޤާޟީއަކާއި، ސިވިލް ކޯޓްގެ ދެ ޤާޟީއެއްގެ އިތުރުން ލ. ދަނބިދޫ މެޖިސްޓްރޭޓް ކޯޓްގެ ކޯޓް އިސްމެޖިސްޓްރޭޓުގެ ސުލޫކީ މައްސަލަތަކެއް ބެލުމަށެވެ.
ޖޭއެސްސީން މިމައްސަލަތައް ބެލުމަށް ނިންމާފައިވަނީ މިއަދުގެ ބޭއްވި އެކޮމިޝަނުގެ 65ވަނަ ޖަލްސާގައެވެ. އެކޮމިޝަނުގެ ރައީސް އަލްއުސްތާޛު ޢަބްދުﷲ އަރީފް ރިޔާސަތު ބެލެހެއްޓެވި މިޖަލްސާގައި ނިންމަވާފައިވަނީ ކްރިމިނަލް ކޯޓްގެ ޤާޟީ އަލްއުސްތާޛު ޙަސަން ނަޖީބުގެ މައްސަލައަކާއި، ސިވިލް ކޯޓްގެ ދެ ޤާޟީންކަމަށްވާ އަލްއުސްތާޛު ޙަސަން ފަހީމް އިބްރާހީމާއި، އަލްއުސްތާޛު ޙުސައިން ފާއިޒް ރަޝާދުގެ މައްސަލައާއި ލ.ދަނބިދޫ މެޖިސްޓްރޭޓް ކޯޓްގެ އިސްމެޖިސްޓްރޭޓް ޢަލީ ޝަރީފްގެ 2 މައްސަލައެކެވެ.
ޖޭއެސްސީގެ ޤާނޫނުގައިވާގޮތުން، މައްސަލަ ބެލުމާމެދު ގޮތެއްނިންމައި މައްސަލަބަލާ ކޮމިޓީން ބެލުމަށްފަހު، ޖޭއެސްސީގެ މިއަދުގެ ބައްދަލުވުމަށް 31 މައްސަލައެއް ތާވަލުކުރިކަަމަށް އެކޮމިޝަނުން ވިދާޅުވިއެވެ. އަދި ކޮމިޓީގެ ނިންމުމާ އެއްގޮތަށް ހަތަރު ބޭފުޅެއްގެ 5 މައްސަލަ ބަލަން މިއަދު ނިންމާފައިވާކަމަށް ޖޭއެސްސީންވަނީ ހާމަކުރައްވާފައެވެ.
ޖޭއެސްސީގެ މިއަދު ޖަލްސާގައި އެކޮމިޝަނުގެ 6 މެމްބަރަކު ބައިވެރިވެވަޑައިގަތެވެ.