އުތުރު ކޮރެއާގެ ނިއުކްލިއަރ މައްސަލައިގައި އެ ޤައުމުގެ ޒަޢީމް ކިމް ޖޮންގް އުންއާއި އަލުން ބައްދަލުކުރެއްވުމަށް ފަސްޖެހިވަޑައިނުގަންނަވާނެކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ވައިޓްހައުސްގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ އުތުރު ކޮރެއާގެ ނިއުކްލިއަރ މައްސަލައިގައި އެ ޤައުމުގެ ޒަޢީމް ކިމް ޖޮންގް އުންއާއި ބައްދަލުކުރައްވަން ތައްޔާރުކަމަށާއި މި އަހަރުގެ ފަހުކޮޅު ބައްދަލުވުން ބޭއްވުމަށް އެދިވަޑައިގަންނަވާކަމަށެވެ. ޓްރަމްޕް މިކަން އިޢުލާނުކުރައްވާފައިވަނީ އެމެރިކާއާއެކު މި މަހުގެ ފަހުކޮޅު އަލުން ނިއުކްލިއަރ މަޝްވަރާތައް ބޭއްވުމަށް ތައްޔާރަށް އޮތްކަން އުތުރު ކޮރެއާއިން ހޯމަ ދުވަހު އިޢުލާނުކޮށްފައިވަނިކޮށެވެ.
2018ވަނަ އަހަރުގެ ޖޫން މަހަށްފަހު އުތުރު ކޮރެއާގެ ރައީސް ކިމް ޖޮންގް އުންއާއި އެމެރިކާގެ ރައީސް ޑޮނަލްޑް ޓްރަމްޕްވަނީ ތިން ފަހަރެއްގެ މަތިން ބައްދަލުކުރައްވާފައެވެ. އެގޮތުން، މި އަހަރުގެ ތެރޭގައި ދެ ފަހަރު އެ ބޭފުޅުންވަނީ ބައްދަލުކުރައްވާފައެވެ.
އުތުރު ކޮރެއާގެ ނިއުކްލިއަރ މައްސަލައިގައި އެ ޤައުމާއި އެމެރިކާއާ ދެމެދު މަޝްވަރާތަކެއް އެންމެފަހުން ކޮށްފައިވަނީ މި އަހަރުގެ ފެބްރުއަރީ މަހުގެ ތެރޭގައެވެ. މި އަހަރުގެ ޖޫން މަހު ދެ ޤައުމުގެ އިސްވެރިންގެ މެދުގައި ބޭއްވި ކުއްލި ބައްދަލުކުރެއްވުމުގައި އެމެރިކާގެ ރައީސް ޑޮނަލްޑް ޓްރަމްޕާ އުތުރު ކޮރެއާގެ ޒަޢީމް ކިމް ޖޮންގް އުންއާ ދެމެދު ފަންނީ މަޝްވަރާތައް އަލުން ފެށުމަށް އެއްބަސްވެވަޑައިގެންނެވިއެވެ. ނަމަވެސް، މިކަމުގެ ޢަމަލީ މަސައްކަތްތަކެއް އަދި ފަށައިފައެއް ނުވެއެވެ.