ހުޅަނގު އައްސޭރީގެ މައްސަލައިގައި އިސްރާއީލާ ދެކޮޅަށް ފިޔަވަޅު އެޅުމަށް އުރުދުނުން ގޮވާލައިފި
މި މަހުގެ ފަހުކޮޅު އިސްރާއީލުގައި އޮންނަ އިންތިޚާބުގައި ކާމިޔާބީ ލިބިވަޑައިގެންފިނަމަ ފަލަސްޠީނުގެ ހުޅަނގު އައްސޭރީގެ ބައެއް ވަކިކުރާނެކަމަށް ވިދާޅުވެ އިސްރާއީލުގެ ބޮޑުވަޒީރު ބެންޔަމިން ނަތަންޔާހޫ ކުރެއްވި އިޢުލާނާ ދެކޮޅަށް، މިހާރުން މިހާރަށް ފިޔަވަޅު އެޅުމަށް އދގެ ސަލާމަތީ މަޖިލީހުގެ ދާއިމީ 5 މެންބަރު ޤައުމަށް އުރުދުނުން ގޮވާލައިފިއެވެ.
އދގެ ސަލާމަތީ މަޖިލީހުގެ ދާއިމީ 5 މެންބަރު ޤައުމުކަމަށްވާ އެމެރިކާ، އިނގިރޭސިވިލާތް، ފަރަންސޭސިވިލާތް، ޗައިނާ އަދި ރަޝިޔާއިން އުރުދުނަށް ކަނޑައަޅާފަ ތިއްބަވާ ސަފީރުންނާ ބައްދަލުކުރައްވާ ވާހަކަދައްކަވަމުން އުރުދުންގެ ޚާރިޖީ ވަޒީރު އައިމަން ސަފާދީ ވިދާޅުވީ އިސްރާއީލުގެ ބޮޑުވަޒީރުގެ މި އިޢުލާނާ ދެކޮޅަށް ބައިނަލްއަޤުވާމީ ފަރާތްތަކުން ސުވާލު ނުއުފެއްދޭނޭވަރުގެ ރައްދެއް ދޭންޖެހޭކަމަށާއި މިކަމާ ވަގުތުން ދެކޮޅުހަދަން ޖެހޭކަމަށެވެ. ސަފާދީ ވިދާޅުވީ މިކަމަކީ އެ ސަރަޙައްދުގައި ޤާއިމުކުރުމަށް މަސައްކަތްކުރާ ސުލްޙައިގެ ބިންގަލަށް ބުރޫ އަރާނެކަމެއްކަމަށާއި އިސްރާއީލުގެ މި ޢަމަލުގެ ސަބަބުން އެ ސަރަޙައްދުގައި އިތުރު ނުތަނަވަސްކަމާއި ހަމަނުޖެހުންތައް އުފެދިގެންދާނެކަމަށެވެ.
އުރުދުންގެ ޚާރިޖީވަޒީރު ވިދާޅުވީ އިސްރާއީލު ބޮޑުވަޒީރުގެ އިޢުލާނަށް ޢަމަލުކުރުމުގެ ފުރުޞަތުދީފިނަމަ އިސްރާއީލާއި ފަލަސްޠީނު މިނިވަން ދެ ދަޢުލަތެއްގެ ގޮތުގައި ކަނޑައެޅުމަށް ކުރާ މަސައްކަތްތައް މުޅިން ފެއިލްވެގެންދާނެކަމަށެވެ. އޭނާ ވިދާޅުވީ އިސްރާއީލާއި ފަލަސްޠީނު މިނިވަން ދެ ދަޢުލަތް އުފެއްދުމަކީ މެދުއިރުމަތީގެ ސުލްޙައިގެ މައްސަލައަށް އޮތް ހަމައެކަނި ޙައްލުކަމަށެވެ.
މިދިޔަ އަންގާރަ ދުވަހު އިސްރާއީލުގައި ހުންނަވާ ވާހަކަދައްކަވަމުން ނަތަންޔާހޫ ވިދާޅުވީ މީގެ ހަފުތާއެއް ފަހުން އިސްރާއީލުގައި އޮންނަ ވާދަވެރި ޢާއްމު އިންތިޚާބުގައި ކާމިޔާބީ ލިބިވަޑައިގެންފިނަމަ ހުޅަނގު އައްސޭރީގެ ސަރަޙައްދެއްކަމަށްވާ އުރުދުންގެ ވާދީ ނަމަކަށް ކިޔާ ސަރަޙައްދު ވަކިކުރާނެކަމަށެވެ. ހުޅަނގު އައްސޭރިން ވަކިކުރާނެކަމަށް ނަތަންޔާހޫ ވިދާޅުވެފައިވާ ސަރަޙައްދަކީ ފަލަސްޠީނުގެ 65،000 މީހުން ދިރިއުޅޭ ސަރަޙައްދެކެވެ.