ދައުލަތުގެ ބެލުމުގެ ދަށުގައި ތިބި ކުދިންނަށް އަމާޒުކޮށްގެން ސްކޫލް ޗުއްޓީ ދުވަސްވަރާ ދިމާކޮށް ޚާއްޞަ ހޮލިޑޭ ޕްރޮގްރާމްތަކެއް މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްއިން ހިންގަވައިފިއެވެ.
މިޕްރޮގްރާމްތައް ހިންގިފައި ވަނީ ކުދިންގެ ޢުމުރުފުރާއާގުޅޭ ގޮތުން ޝައުޤުވެރިކަން ހުންނަ އެކި ދާއިރާތަކުން ކުދިންގެ ހުނަރުތައް ތަރައްޤީކުރުމަށެވެ. ފިޔަވަތީގައި ކުރިއަށް ގެންދިޔަ ޕްރޮގްރާމް ތަކުގެތެރޭގައި "ކިޑްސް ބޭކިންގ" ޕްރޮގްރާމަކާއި މޯލްޑިވްސް ޕޮލިސް ސަރވިސްއާ ގުޅިގެން ވަނީ "ޕޮލިސް ކޭމްޕް"އެއް ހިންގަވާފައެވެ.
މީގެ އިތުރުން ކުޑަކުދިންގެ ހިޔާގައި ކުރިއަށް ގެންދިޔަ ޕްރޮގްރާމްތަކުގެ ތެރޭގައި ބާބަކިއުއަކާއި، ލަވަކިޔުންތެރިޔާ ޝަލަބީ އިބްރާހީމާއެކު ހިންގި މުނިފޫހިފިލުވުމުގެ ހަރަކާތެއް ވަނީ ކުރިއަށް ގެންގޮސްފައެވެ. އަދި ސްކައުޓް އެސޯސިއޭޝަނާ ގުޅިގެން ކ.ހުރާގައި ކުރިއަށް ގެންދިޔަ ފިކްނިކާއި، ތާޖް އެކްޒޮކްޓިކާ ރިސޯޓް އެންޑް ސްޕާއާ ގުޅިގެން އިންތިޒާމުކުރެވުނު ރިސޯޓް ޓުއަރ ހިމެނެއެވެ.
ދައުލަތުގެ ބެލުމުގެ ދަށުގައި މި ވަގުތު ޖުމުލަ 149 ކުދިން ދިރިއުޅެމުންދާއިރު، މިކުދިންގެ ތެރެއިން 12 އަހަރުން ދަށުގެ 106 ކުދިން ދިރިއުޅެމުންދަނީ ފިޔަވަތީގައެވެ. އަދި 12 އަހަރުން މަތީގެ 43 ކުދިން ދިރިއުޅެމުންދަނީ ކުޑަކުދިންގެ ހިޔާގައެވެ.