ދައުލަތުގެ މުސާރައިގެ އައު އޮނިގަނޑަށް އަންނަ އަހަރުތެރޭގައި ޢަމަލުކުރަން ފަށާނެކަމަށް ނެޝަނަލް ޕޭ ކޮމިޝަނުން ހާމަކުރައްވައިފިއެވެ.
ފިނޭންސް މިނިސްޓަރ އިބްރާހިމް އަމީރު ރިޔާސަތު ބަލަހައްޓަވާ ނެޝަނަލް ޕޭ ކޮމިޝަނުން ބުނީ ދައުލަތުގެ މުސާރައިގެ އައު އޮނިގަނޑު އެކުލަވާލާނީ ދައުލަތުގެ އިދާރާތަކުގެ މިހާރު ޢަމަލުކުރަމުންދާ މުސާރައިގެ އޮނިގަނޑުތަކާ ގުޅޭގޮތުން އެ ކޮމިޝަނުން ކޮށްފައިވާ ދިރާސާތަކުގެ އަލީގައާއި ބައިނަލްއަޤްވާމީ ބެސްޓް ޕްރެކްޓިސްއަށް ރިޢާޔަތްކޮށްކަމަށެވެ. އަދި މުސާރައިގެ އައު އޮނިގަނޑު އެކުލަވާލާއިރު ދައުލަތުގައި ހިމެނޭކަމަށް ފާހަގަކުރެވިފައިވާ 96 ފަންނުތަކުގެ ގިންތިތަކާއި ފަންތިތަކާއި ޝަރުޠުތައް ކަނޑައެޅުމަށްފަހު، އެއިން ކޮންމެ ފަންނެއްގެ މުސާރަތައް ހިމެނޭނެކަމަށް ޕޭ ކޮމިޝަނުން ބުނެއެވެ.
ޕޭ ކޮމިޝަނުން ބުނީ ދައުލަތުގައި ހިމެނޭކަމަށް ފާހަގަކުރެވިފައިވާ 96 ފަންނުތަކުގެ ގިންތިތަކާއި ފަންތިތަކާއި ޝަރުޠުތައް ކަނޑައަޅާނީ އެއިން ކޮންމެ ފަންނެއްގެ ގިންތިތަކާއި ފަންތިތަކާއި ޝަރުޠުތަކާބެހޭ ގޮތުން މަޝްވަރާކުރުމަށްފަހުކަމަށެވެ.
މުސާރައިގެ އައު އޮނިގަނޑުގެ އިތުރުން، ދައުލަތުގެ މުވައްޒަފުންނަށް މިހާރު ދެމުންދާ އެލަވަންސްތައް އެއްހަމަކުރުމުގެ ގޮތުން، ދައުލަތުގެ މުވައްޒަފުންނަށް ދެވޭނެ އެލަވަންސްތަކާއި އެ އެލަވަންސްތަކުގެ ހަމަތަކާއި މިންގަނޑުތަކާއި އުޞޫލުތައް އެކުލަވާލުމުގެ މަސައްކަތްވެސް ކުރަމުންދާކަމަށް ޕޭ ކޮމިޝަނުން ބުނެއެވެ. އަދި އެލަވަންސްތަކުގެ ތަފްސީލްވެސް މުސާރައިގެ އޮނިގަނޑާއެކު އާންމުކުރާނެކަމަށް ޕޭ ކޮމިޝަނުން ބުނެއެވެ.
ދައުލަތުގެ މުސާރައިގެ ސިޔާސަތުގެ ގާނޫނުގައި ބުނެފައިވަނީ ޕޭ ކޮމިޝަނަކީ ދައުލަތުގެ މުވައްޒަފުންގެ މުސާރަ ކަނޑައެޅުމާއި، މުސާރައިގެ ކުރިއެރުން ދިނުމާއި، ދައުލަތުގެ މުވައްޒަފުންގެ އުފެއްދުންތެރިކަން އިތުރު ކުރުމަށް އެމީހުންނަށް ދެވިދާނެ އިނާޔަތްތަކާއި، ވަޒީފާ އިން ނުވަތަ މެމްބަރުކަމުން ވަކިވެގެންދާއިރު އިނާޔަތްތައް ދޭނެ ސިޔާސަތުތަކާއި މިންގަނޑުތަކާއި ހަމަތައް ކަނޑައަޅައިދޭ ކޮމިޝަނެކެވެ.